Myaso 9
9
Kukandelela kuli Njambi a vushunga vwendi
Mwaso wa Ndaviti
1Yove Shukulu Kalunga njikushangazala
na mbunge yange yoshe,
nakwambulula vyuma vyoshe
vyakukomokesa vije viwunalingi.
2Njikaimba nakujolela omwo yove,
njikaimba nakushangazala Njambi
Muka-nzili yoshe!
3Vitozi vange vatenguluka nakwiluka munima
omo yove usholoka,
vashatuka nakuwila asi nakunyonga.
4Utumbama a litanda lyove kupwa lyaako,
usompa nakuwana ngeci yange kunjesi na mulonga.
5Uhisa vaka-kujeneka kukulaela,
nakunyongesa vaka-vuvi,
zimangana mazina avo ku myaka yoshe.
6Vitozi vetu vananyongo simbu yoshe,
na vinganda vyavo vinasiwuka,
co nalumo lwai lalo vakavanuka.
7Shukulu Kalunga wapwa mwene ku myaka yoshe,
natumbama a litanda lyendi mukusompesa.
8Ikeye ashika kaye mwamuvwa,
nakusompa vanu mu vushunga.
9Shukulu Kalunga wapwa cimpaka ca vaka-kuyanda,
cimpaka cakutewela a simbu ya tuyando.
10Voshe vaje vasingimika lizina lyove,
vasa kukulaela kuli yove,
omwo yove Shukulu Kalunga wapwa wa kulongwa
kuli vaje vanakulaela kuli yove.
11Imbeni myaso yakushangazala Shukulu Kalunga,
uje wakala mu Siyone!
Lekeni vanu voshe vije vyanalingi!
12Njambi akanuka vaje voshe vali mu tuyando,
ikeye kesi kwivala mutambi wavo,
nambe kwivala kuhisa vaka-milonga.
13Njizivileko mema ku mbunge yove Shukulu Kalunga!
Kenga muvali nakunjiyandesela vitozi vange,
njamene ku kutsa yove Shukulu Kalunga,
14ngeci njikemane ku mesho a vanu va mu Yelusalema,
nakuvaleka vyuma vyoshe vije vinjikushangazala navyo.
Njivwaelela omwo yove unanjovola.
15Vaka-kujeneka kukulaela,
vanendi mbulu nakuwilamo.
Myanja yavo inatsi mu myeto yavo vavenya.
16Shukulu Kalunga nalisholola
ikeye vavenya akusompa kwendi kwa vushunga,
oloni vaka-vuvi vanatsi mu vilinga vyavo vyavivi.
17Kutsa kukekwo mamaneselelo a vaka-vuvi,
na voshe vaje vavyana Njambi.
18Muka-kujeneka na muka-kuutwa kuvakavevala
ku myaka yoshe,
nameme cinyangavili cavo kucikanyongo
ku myaka yoshe.
19Ija, Shukulu Kalunga!
Kesi utave munu akuhyane embwe!
Imika vaka-vuvi mu mbanja ngeci uvasompe.
20Vazivise lyova yove Shukulu Kalunga,
vazivuke ngeci vakevo vanapu vanu.
The Bible in Mbunda ©The Bible Society of Zambia, 2006