Myaso 10
10
Lilombelo lya vushunga
1Omwo vikajo uli kulyala nange yove Shukulu Kalunga?
Omwo vikajo kuusholokela a simbu ya tuyando?
2Vaka-vuvi vali na kulyalesa nakuyandesa vaka-kuutwa,
vatse mu myeto ije ivanalitela vakevo vavenya.
3Muka-vuvi alyalesa na mashungu a mu mbunge yendi,
co muka-cipululu asinga nakuvyana Shukulu Kalunga.
4Muka-vuvi kombuko mbunge kuli Shukulu Kalunga,
mu kulyalesa kwendi ayongola ngwendi
Njambi waiko.
5Muka-vuvi avezika mu vyuma vyoshe
vije vyalinakulinga.
Kasa kuzivisisa kusompa kwa Njambi,
co lalo apopolola vitozi vendi.
6Endeka mu mbunge yendi ngwendi,
“Kunjikonwa embwe,
co lalo kunjikakala mu tuyando.”
7 #
Lom 3:14
Endekesi yendi inashulu na visingo,
na makuli, na muuka,
akazambula kwendeka majwi amavi
akuluvalesa.
8Alishweka mu membo,
mukuvandamena kutsiya vanu vakujeneka mulonga.
Alalela vushonge uje nazeye,
9avandamena mu mwela wendi wavushweke ngwe ndumba,
alinakuvandamena muje ngeci akwate tuutu,
co avakwata nakuvakokela mu mweto wendi.
10Vaje vanazeye vawa,
omwo nzili yendi yakama inavahyana.
11Muka-vuvi endeka mu mbunge yendi ngwendi,
“Njambi nevala, nakenge kweka, co kasa kunjimona!”
12Hisa vaka-vuvi Shukulu Kalunga!
Anuka vaje valinakuyanda!
13Vatijo muka-vuvi asa kushaula Njambi?
Nakulyendekesa mu mbunge yendi ngwendi,
“Njambi kakanjihisa embwe!”
14Oloni yove unacimono unazivuka vukalu na tuyando,
co walivwaesela kukwasa.
Muka-kuzeya aliita kuli yove,
omwo simbu yoshe u muka-kukwasa vaka-kujeneka.
15Tundisa nzili ya vaka-vuvi,
vahise omwo vuvi vwavo vuvanalingi,
noo vanalikela kuvulinga.
16Shukulu Kalunga ikeye wapwa mwene
wa ku myaka yoshe,
vaje valemesa vinjambi veka vakanyonga mu lifuti lyendi.
17Yove Shukulu Kalunga,
ukatolilila ku malombelo a vaka-kulikeesa,
co ukavatakamesa.
18Ukaziva mutambi wa vaka-kuyanda na visiwa,
ukavasompela mu vushunga,
ngeci munu naumo wai akavazivise lalo lyova.
The Bible in Mbunda ©The Bible Society of Zambia, 2006