Myaso 80
80
Lilombelo lyakwiluka kwa vanu kuli Njambi
Mwaso wa Asafe
1 #
Kut 25:22
Yove Kanyungi ka Isalele,
tolilila kuli yetu,
tutolilile, yove ntwama ya vutanga.
Yove unatumbama akamwa ya vakelumbi,
2sholola nzili yove ku miyati ya Efalime,
na Mbenjemani, na Manase!
Ija utwamene!
3Yove Njambi tupwise vaka-nzili lalo!
Tukenge na mema ku mbunge ngeci twovoke.
4Yove Shukulu Kalunga Njambi Muka-nzili yoshe,
visimbu vingaijo ukaluvala na malombelo a vanu vove?
5Tuyando twetu tunapu ngwe vyakulya vyetu,
vusiwa vwetu vunapu ngwe mema akunwa.
6Yove unatava miyati ije inatuzengeleka kutulwisa,
vitozi vetu valinakutushaula.
7Yove Njambi Muka-nzili yoshe,
tupwise vaka-nzili lalo
tukenge na mema ku mbunge ngeci twovoke.
8Twapwile ngwe mukolovozi wa vushuka vwa vinyu
uje uwatundisile ku Ingito,
washekelemo miyati ya mu Kanana,
co waukunine mu lifuti lyavo.
9Wauvwaeselele mwela ngeci ukolelemo,
co mizi yawo yaile kwisi manene,
yashalavelele mu lifuti mwoshe.
10Yashalavele nakufwika malundu,
co minango yawo yapwile ngwe miti yakama ya kendale.
11Minango yawo yashalavele
kweta ku Lishali lya Menditelenyani,
nakweta lalo ku Ndonga ya Yufuleti.
12Omwo vikajo wasiwilile cimpaka cije cazengelekeleko?
Co ololo munu woshe aita asa kwiva vushuka vwawo.
13Vyombo valinakuulyatangela na tusitu lalo valinakuulya.
14Yove Njambi Muka-nzili yoshe,
lingao cuma cimo.
Kenga ano asi ngeci umone vije vilinakulingiwa
ku mukolovozi ou wa vushuka vwa vinyu!
15Muzi uje uwakunine na livoko lyove lya cilyo,
mukolovozi wa vushuka vwa vinyu
uje uwakolesele yove vavenya!
16Vitozi vetu vanautete,
vanawenyeka na tuhya,
vamwese vukalu vwove nakuvanyongesa!
17Nyunga nakwamena vanu vaje vawaangwile,
muyati uje uwapwisile wa nzili!
18Kutukatenguluka nakutunda kuli yove lalo,
tuyoyese, co tukakushangazala.
19Yove Shukulu Kalunga Njambi Muka-nzili yoshe!
Tupwise vaka-nzili lalo
tukenge na mema ku mbunge ngeci twovoke.
The Bible in Mbunda ©The Bible Society of Zambia, 2006