Myaso 72
72
Lilombelo lya mwene
Mwaso wa Solomoni
1Longesa mwene kusompa na vushunga vwove yove Njambi,
mulongese kupanga mwa vushunga,
2ngecivene, akaakwile vanu vove mu vushunga,
nakusompela vaka-kuyanda mu vushunga.
3Vimbuto vimene mwamuvwa mu livu,
livu limenese vimbuto mu vushunga.
4Mwene asompele vaka-kuyanda mwamuvwa,
akwase vaka-kujeneka,
nakufungulula vaje vavayandesa!
5Vanu vove vakulemese#72:5 VANU VOVE VAKULEMESE: Nambe, yoya ku myaka yoshe. ku myaka yoshe,
ngwe mulyakala litangwa ku myaka yoshe,
ngwe muyikatu ngonde ceke ku myaka yoshe,
ku cisemwa cikaija kulutwe.
6Mwene apwe ngwe nyonzi inyokela mu mahya,
ngwe nyonzi ya vusuku-mbundu ije inyokela mu lifuti.
7Mwene alinge vushunga na vanu voshe,
kukale kwoloka simbu yoshe noo ngonde inatsi.
8Vumwene vwendi vukashangumukila ku mema a kalunga,
vuketa na ku mema a kalunga akwavo.
Vumwene vwendi vukatunda ku Ndonga ya Yufuleti
nakweta ku shongo ya kaye.
9Vanu va mu mambo vakalemesa vumwene vwendi,
co vitozi vendi vakalimbondinga mu livu.
10Vimyene va ku Sipeini#72:10 SIPEINI: Nambe, Tashishi.
na ava va ku man̄anda
vakamulambwila milambu,
na vimyene va ku Shemba na ku Semba
vakamunenela vwana.
11Vimyene voshe vakatsikama ku mesho endi,
co miyati yoshe vakamupangela!
12Apatula tuutu vaje vatambeka kuli ikeye,
vaje voshe vanajeneka na vaje vavanayengula
ikeye avapatula.
13Azivila mema ku mbunge
vaka-kuzeya na tuutu,
co amena voshe vaje vanajeneka.
14Ikeye avamena kuli vaka-muuka,
na kuli vaka-kuvalinga mwamuvi,
maninga avo akala na seo ku mesho endi.
15Mwene ayoye myaka yoshe!
Vamwane ngolinde ya ku Shemba,
co vanu vamulombelele simbu yoshe,
vivezikiso vya Njambi vikale ali ikeye simbu yoshe!
16Tiliku ipwe yaingi mu lifuti,
akamwa ya malundu ashule na vimbuto,
vipwe vyavingi ngwe vimbuto vya ku Lembanone.
Vinganda vishule na vanu,
ngwe mwila wa mu mahya.
17Lizina lyendi likale ku myaka yoshe,
lutsimo lwendi lukale simbu yoshe
ngwe mulyakala litangwa.
Vanu voshe vakavezika muli ikeye,
miyati yoshe vehule Njambi ngeci avavezikise
ngwe muje mwanavezikisa mwene!
18Shangazaleni Shukulu Kalunga,
Njambi ya Isalele!
Ikeye lika muka-kulinga vyuma vyakukomokesa!
19Shangazaleni lizina lyendi lya vumpau ku myaka yoshe!
Kaye koshe kashule na vumpau vwendi!
Ewa! Ewa!
20Malombelo a Ndaviti muna Njesi anahwila aa vene.
The Bible in Mbunda ©The Bible Society of Zambia, 2006