Myaso 71
71
Lilombelo lya kakulukazi
1Shukulu Kalunga njitewela muli yove,
kesi vanjizivise shwamwa ku myaka yoshe!
2Njipatule nakunjamena mu vushunga vwove,
njitolilile nakunjamena.
3Pwa limanya lyange mwakutewela,
muje njasa kutewela simbu yoshe,
shika lishiko lyakunjamena!
Omwo yove u limanya lyange na cimpaka cange.
4Yove Njambi yange,
njipatule ku livoko lya vaka-vuvi,
nakunjitundisa ku livoko
lya vaka-muuka na vaka-vuvi.
5Shukulu Kalunga wa Akamwa ya Vyoshe,
njaka cinyangavili cange muli yove,
yange njakukulaela tunde ku simbu ya vwanike vwange.
6Mukuyoya kwange kwoshe njayoyela muli yove,
unanjinyungu tunde akusemuka kwange,
simbu yoshe njikakushangazala!
7Kuyoya kwange kunapu cimweso ku vanu vavangi,
omwo yove unapu cimpaka cange cakukola.
8Litangwa lyoshe njikakushangazala,
nakukusingimika nakwambulula vumpau vwove.
9Kesi unjumbile kuti omo njinakuluvala,
co kesi unjiseze omo njinazeye!
10Vitozi vange vashaka kunjitsiya,
vanjikela munga.
11Vendeka ngwavo,
“Njambi namuseza,
tumushekeni ngeci tukamukwate,
naumo wai akamwamena!”
12Yove Njambi kesi ukale kulyala nange,
Njambi yange, zambula unjikwase!
13Vaje voshe vashaka kunjilwisa
vafungulule nakuvanyongesa!
Vaje voshe vashaka kunjivulumuna,
vazivise shwamwa.
14Cinyangavili cange simbu yoshe
cakala muli yove,
co simbu yoshe njikakushangazala.
15Njikambulula vyuma vyavivwa vije viwukalingi,
litangwa lyoshe lyamutunu,
njikambulula kwamena kwove,
nambe kunatuvakana muje munjizivukilamo.
16Shukulu Kalunga Njambi,
njikaya mu nzili yove yakama,
njikambulula vushunga vwove lika.
17Yove Njambi wanjilongesele tunde ku vwanike vwange,
kweta na simbu ino njicili nakwambulula
vilinga vyove vyakukomokesa.
18Ngecivene, nameme njinakuluvala manene
na vwele vuli ku mutwe wange,
yove Njambi kesi unjiseze,
noo njikambulula vilinga vyove
ku visemwa vyoshe vije vikaija kulutwe.
19Vushunga vwove yove Njambi,
vunete mwilu ya melu.
Yove Njambi unalingi vyuma vyakama,
naumo wai nalifu nove.
20Yove unanjimwesa tuyando twakama twakukaluwa,
oloni ukanjiyoyesa lalo,
ukanjitundisa lalo mu mbumbo.
21Ukanjipwisa nji wakama manene,
kutuvakana munjafwile laja,
co ukanjizembeleka lalo.
22Mwa vushunga njikakushangazala
lalo na kalyalya,
njikashangazala kulongwa kwove,
yove Njambi yange.
Njikakwimbila myaso a kalyalya kange,
yove Njambi wakujela wa Isalele.
23Njikatambeka nakujolela,
njikaimba nakukushangazala
na mbunge yange yoshe,
omwo unanjamena.
24Njikendeka vushunga vwove litangwa lyoshe,
omwo vaje vashakele kunjivulumuna,
unavafungulula nakuvazivisa shwamwa.
The Bible in Mbunda ©The Bible Society of Zambia, 2006