Myaso 68
68
Mwaso wa mbunga wakulisamba
Mwaso wa Ndaviti
1Omo Njambi akakatuka,
akashandola vitozi vendi!
Vaje vamuzinda vakatunda ku mesho endi!
2Akavatundisa ku mesho endi,
ngwe muvukapekumuka vwisi,
Njambi akanyongesa vaka-vuvi,
ngwe muyikanyongolokota sela mu tuhya.
3Oloni vaka-vushunga vavwaelela
nakujolela ku mesho endi,
mwa vushunga vene vavwaelela nakujolela.
4Imbeni kuli Njambi,
imbeni nakushangazala lizina lyendi,
vwaeseni ngila ya uje alinakwita mu mambo.
Lizina lyendi ikeye Shukulu Kalunga,
vwaeleleni ku mesho endi!
5Njambi uje wakala mu Njuvo yendi yakujela,
ikeye muka-kulela visiwa nakunyunga vifwile.
6Njambi akana njuvo yakukala kuli vaje vali avo lika,
atundisa vinzinda nakuvavezikisa,
oloni vaka-kumutengulukila vakakala mu mambo.
7Omo watwamenenene vanu vove yove Njambi,
nomu wavetisile mu mambo,
8asi ajajele,
co lilu lyanyokesele nyonzi,
omwo kwija kwa Njambi wa Sinai,#68:8 NJAMBI WA SINAI: Kenga Kutuuka 19:16-25.
kwija kwa Njambi wa Isalele.
9Wanyokesele nyonzi yaingi manene,
ije yakolesele livu lyakukushungukwa
10mbunga ya vanu vatungile muje,
muvuvwa vwove yove Njambi,
wamwesele cizemo cove kuli tuutu.
11Shukulu Kalunga washikile lishiko,
co vanakazi vavangi vambulwile muzimbu ngwavo,
12“Vimyene na mahunzi a mashwalale vavo vatewele!
Co vanakazi vaje vasalele hembo
valipangezelele vije vyakupukula,
13nameme mulala mukati ka limba lya vimanga,
oloni mukafwa ngwe mambava a liyembe
akulameka na siliva,
na maunga endi akulameka
na ngolinde yavushompo.”
14Omo Njambi Muka-nzili yoshe washandwele vimyene
a munkinda wa Zalemone,
co mema akukonda awililile aje.
15Munkinda wa Mbashane ukewo munkinda wakama,
wapwa munkinda waulaja.
16Omwo vikajo munkinda wa Mbashane,
ulingacije ngwe munu ali na cipululu
ku munkinda uje wanalyangwila Njambi?
Ukapwa limbo lya Shukulu Kalunga ku myaka yoshe!
17Shukulu Kalunga watundile ku Munkinda wa Sinai#68:17 SHUKULU KALUNGA WATUNDILE KU MUNKINDA WA SINAI: Oloni mu ciHevelu ngwavo, Njambi akati kavo ku Sinai.
na matemba endi amangi-mangi a nzili,
co wezile ku mutambela wakujela.
18Omo walondele a munkinda waulaja,
waile na vinzinda vavangi,
co watambwile vwana kuli vanu vaka-kutengulukila.
Shukulu Kalunga Njambi akakala kuje.
19Wakushangazala Shukulu Kalunga,
uje akatulingi mwamuvwa a litangwa na litangwa,
ikeye vene Njambi muka-kutwamena.
20Njambi yetu wapwa Njambi muka-kutwamena,
ikeye wapwa Njambi, Shukulu Kalunga
uje muka-kutupatula ku kutsa.
21Mwa vushunga Njambi akatavozola mitwe ya vitozi vendi,
vaje vakakateya mu vingila vyavo vya vuvi.
22Shukulu Kalunga nendeka ngwendi,
“Njikatundisa vitozi veni ku Mbashane,
co njikavatundisa lalo ku nzinga ya mema a kalunga,
23ngeci mukenda mu maninga avo,
co tutali tweni vakakacula maninga avo.”
24Yove Njambi yetu na mwene yetu,
tunamono laja vimbunga vya vanu,
vaya ku mwela wove wakujela.
25Vaka-kwimba vakele kulutwe,
co vaka-kwimba na vyuma vyakwimbisa vakele munima,
mukati kavo mwakele vambanda
vaje vaimbile tumbulumbumba.
26Vezile oku vatambeka ngwavo,
“Shangazaleni Njambi
mu vikungulukilo vya vanu vendi,
yeni voshe vatekulwila va Yakomba,
shangazaleni Shukulu Kalunga!”
27Akulivanga kwezile Mbenjemani,
muyati waundondo-ndondo,
asinoni kwakavele vantwama va Yunda
na vimunga vyavo,
kwatele vantwama va Zembuloni na Nafetali.
28Mwesa nzili yove Njambi,
ije wapangesele ali yetu mukutwimanena.
29Omwo ya Njuvo yove ya mu Yelusalema,
vimyene vakakunenela vwana.
30Vindika Ingito,
cikashama uje wa mu mahongo,
vindika miyati ya vanu
ije vantwama vavo vanapu ngwe
vingombe va nkomba va vukalu,
voshe vatsikame nakukwana siliva yavo.
Shandola vanu vaje vazema nzita!
31Vaka-kwimanena mafuti vakatunda ku Ingito,
co vaka-Sundane vakajundula mavoko avo
nakulombela kuli yove Njambi.
32Imbileni kuli Njambi,
vumwene vwoshe vwa asi,
imbeni nakushangazala Shukulu Kalunga.
33Kuli uje endela a lilu lya melu a ku san̄ulu!
Mutolilileni omo endeka na lijwi lyendi lya nzili!
34Ambululeni nzili ya Njambi,
vumpau vwendi vuli mu Isalele,
nzili yendi ili mwilu lya melu.
35Njambi ya Isalele wapwa wakukomokesa
mu Njuvo yendi yakujela!
Ikeye akana nzili ku vanu vendi.
Shangazaleni Njambi!
The Bible in Mbunda ©The Bible Society of Zambia, 2006