Myaso 41
41
Lilombelo lya munu wa kuvinja
Mwaso wa Ndaviti
1Navezika munu uje ayongola
ali vaka-kuzeya,#41:1 VAKA-KUZEYA: Nambe, tuutu.
Shukulu Kalunga akamukwasa
a litangwa lya tuyando.
2Shukulu Kalunga akamunyunga nakumuyoyesa,
co akavezika mu lifuti,
kakamuseze ku mavoko a vitozi vendi.
3Shukulu Kalunga akamukwasa omo avinja,
co akamutakamesa nakumukangwisa.
4Njendekele ngwange,
“Njizivileko mema ku mbunge yove Shukulu Kalunga,
njikangwise omo njinavulumuna kuli yove!”
5Vitozi vange valinakwendeka vyuma vyavivi ali yange,
vendeka ngwavo, “Mwaka ukajo akatsa
ngeci lizina lyendi linyonge?”
6Vaje vaija nakunjimona vanapu vaka-civembulu,
vambulula muzimbu wauvi ali yange,
co vaya nakuwambulula kwoshe-ikwoshe.
7Voshe vaje vanjizinda vaya nakunjifweya
ku umo na mukwavo,
nakunjitumbila matumbe akunjivulumuna.
8Vendeka ngwavo,
“Mushongo wendi umutwala ku kutsa,
co kakenduka lalo a vulili vwendi.”
9 #
Mat 26:23; Mak 14:18; Luk 22:21; Yow 13:18 Nameme musamba wange vene wa a mbunge,
uje njakulaelele manene,
nanjitengulukila nakunjilwisa.
10Oloni yove Shukulu Kalunga,
njizivileko mema ku mbunge nakunjikangwisa,
ngeci njikavelwisile vuvwa ku vuvi.
11Omwo a cuma eci njizivuka ngeci
yove uvwaelela nange,
omwo vitozi vange kuvanjifungulula.
12Yove ukanjikwasa,
omwo njikalingi vya vushunga,
co njikatumbama ku mesho ove ku myaka yoshe.
13 #
Mya 106:48
Wakushangazala Shukulu Kalunga Njambi ya Isalele,
mushangazaleni lelo na ku myaka yoshe!
Ewa! Ewa!
The Bible in Mbunda ©The Bible Society of Zambia, 2006