Myaso 40
40
Mwaso wakushangazala
Mwaso wa Ndaviti
1Njavandamenene Shukulu Kalunga
nakusimpa ngeci anjikwase,
asinoni wazivile mutambi wange.
2Ikeye wanjitundisile mu mbulu ya vushonde,
mu lindova lya vutome!
Wemikile mendi ange a limanya,
nakunjinyunga mwamuvwa.
3Wanjilongesele kwimba mwaso wauha,
mwaso wakushangazala Njambi yetu.
Vavangi vakamona eci, co vakaziva lyova,
co vakakulaela kuli Shukulu Kalunga.
4Navezika munu uje akulaela kuli Shukulu Kalunga,
munu uje kesi kutengulukila ku tumponya,
nambe kulipandakana na vanu vaje vaka-kulemesa
vinjambi va makuli.
5Unatulingila vyuma vyavingi
yove Shukulu Kalunga Njambi yetu,
kukwesi weka lalo wakufwa ngwe yove!
Yove unatulingila matumbe amangi akukomokesa,
aje kunjasa kuwatumbula oshe,
anapu amangi manene.
6Yove kuushaka kukukombelela vin̄ombelo,
yove kuwesi kulomba tusitu twamutunu
twa kwenyeka a mutula,
nambe vin̄ombelo vya a vuvi.
Oloni unanjana matwi akukuziva,
7co njakumbulwile ngwange,
“Yange uno,
kulikundika kwange kuli yove#40:7 KULIKUNDIKA KWANGE KULI YOVE: Nambe, vilongesa vyove ali yange, vavisoneka mu livulu lya Lishiko.
vanacisoneka mu livulu lyove.
8 #
VaHe 10:5-7
Njambi yange njizema kulinga cizango cove,
njikanyunga vilongesa vyove mu mbunge yange.”
9Mu cikungulukilo cakama ca vanu vove voshe
yove Shukulu Kalunga,
njambulwile vin̄anda vyavivwa vyakutwamena.
Yove uzivuka ngeci kunjikalikela kuvyambulula.
10Yange kunjashwekele mu mbunge yange
vin̄anda vyavivwa vyakwamena embwe,
oloni visimbu vyoshe njinambulula
vushunga vwove nakwamena kwove.
Mu vikungulukilo vya vanu vove voshe
kunjolokele ngoco kuluu ngwe kaveveve,
oloni njinambulula kulongwa kwove
na cizemo cove cije kucesi kutenguluka.
11Shukulu Kalunga njazivuka kuukalikela
kunjizivilako mema ku mbunge!
Cizemo cove cije kucesi kutenguluka
na kulongwa kwove vikanjinyunga simbu yoshe.
Lilombelo lyakukwasa
(Mya 70)
12Tuyando twatungi tunanjizengeleka
kunjasa kutulava!
Vivi vyange vinanjikakateya mbe,
kunjasa kumona lalo embwe,
vivi vyange vinatumu manene
kutuvakana vin̄ambu
vya ku mutwe wange,
co mbunge yange inazeye.
13Yove Shukulu Kalunga,
njamene, yove Shukulu Kalunga,
zambula ngeci unjikwase!
14Shwamwa ivakole vaje vashakezeka
mwonyo wange ngeci vaunyongese,
ilwisa vuseta-nima nakuzivisa shwamwa,
vaje vavwaelela omwo tuyando twange!
15Voshe vaje vanjishendumuna,
nakwendeka nange ngwavo, “Mbwatu,”
vazive shwamwa nakulikomokela.
16Voshe vaje vaija kuli yove,
vavwaelele nakujolela!
Voshe vaje vazema kwamena kwove,
simbu yoshe vendeke ngwavo,
“Shukulu Kalunga wapwa wakama!”
17Shukulu Kalunga yange njapwa
njiwakuzeya na kuutwa,
oloni kuwanjivalele.
Yove wapwa muyoyesi wange na Njambi yange,
kesi wishwale mukunjamena.
The Bible in Mbunda ©The Bible Society of Zambia, 2006