Myaso 22
22
Kutambeka omwo n̄avava na mwaso wakushangazala
Mwaso wa Ndaviti
1 #
Mat 27:46; Mak 15:34 Njambi yange, Njambi yange, vikajo unanjisezela?
Vikajo unemanena kulyala kujeneka kunjikwasa,
omwo njilinakukemanga?
2Mutanya woshe njitambeka kuli yove Njambi yange,
oloni kuwesi kunjikumbulula,
njitambeka vutsiki vwoshe,
oloni kunjesi kujuka embwe.
3Oloni yove vanakutumbika a litanda
kupwa Umo Wakujela,
yove uje ivakashangazala vaIsalele.
4Vakukulwila vetu vakulaelele muli yove,
vakukulaelele, co yove wavamenene.
5Vatambekele kuli yove, co vovokele,
vakukulaelele, co shwamwa kuyavakolele.
6Oloni yange kunjapwile lalo nji munu,
njinapu lika nji musonginyi,
njinapu nji munu wakushauka,
munu uje ivakayeluwisa vanu voshe!
7 #
Mat 27:39; Mak 15:29; Luk 23:35 Voshe vaje vanjikenga vanjishendumuna,
nakulipika ku mitwe yavo.
8 #
Mat 27:43
Co vendeka ngwavo,
“Yove wakulaelele kuli Shukulu Kalunga,
omwo vikajo lalo kakwamena?
Nga Shukulu Kalunga wakushaka,
vikajo kakukwasela?”
9Oloni yove wanjinyungile tunde akusemuka
na simbu yakunjilela.
10Yove wanjinyungile tunde aje njasemukilile.
Yove wapwa u Njambi yange.
11Kesi ukale kulyala nange!
Omwo tuyando tuli muyehi,
omwo kukwesi umo wakunjikwasa.
12Vitozi vavangi vananjizengeleka
ngwe vingombe va nkomba,
voshe vananjaka mukati,
ngwe vingombe va nkomba
va vukalu va ku lifuti lya Mbashane.
13Vakevo vaneshama tunwa twavo
ngwe vindumba,
valinakwaana nakunjisanyozola.
14Nzili yange inahu,
ngwe mema akwitikila asi.
Mu vitsiya vyange mwoshe munatsi njenje,
co mbunge yange inasangunuka ngwe sela.
15Mulivu wange unominina cau,
co ndaka yange inasata mu ndakwilo.
Yove unanjiseza mu livu ngeci njitsilemo.
16Mbunga ya vaka-vuvi vananjizengeleka,
vashwenya kuli yange ngwe tutali va vukalu,
vakevo vanasanyozola mavoko na mendi ange.
17Vitsiya vyange vyoshe vinasholoka anja kwau.
Co vitozi vange vanakenge ali yange shwii,
18 #
Mat 27:35; Mak 15:24; Luk 23:34; Yow 19:24 valipangezela vuzalo vwange,
nakuvuta n̄ela akati kavo.
19Kesi ukale kulyala nange yove Shukulu Kalunga,
ija vwasi wakunjamene!
20Njamene ku moko ya mukwale,
amena mwonyo wange ku vitozi.
21Njamene ku vitozi vange ava,
omo kunjesi na nzili yakulwa navo.
22 #
VaHe 2:12
Njikaleka vanu vange vije viwunalingi,
njikakushangazala mu cikungulukilo cavo ngwange,
23“Mushangazaleni, yeni vangamba va Shukulu Kalunga!
Musingimikeni, yeni vatekulwila va Yakomba!
Mulemeseni, yeni vanu va Isalele!
24Ikeye kesi kumbila kuti tuutu,
nambe kuyengula tuyando twavo,
nambe kuvakengesa nima,
oloni avakumbulula
omo vatambeka kuli ikeye mukuvakwasa.”
25Mu mbunga yakama njikakushangazala,
omwo vije viwunalingi,
ku mesho a vaje vaka-kukulemesa
njikakombelela vin̄ombelo
vije vinjakukulaesele.
26Tuutu vakalya nakukuta,
voshe vaje vaija kuli Shukulu Kalunga
vakamushangazala,
vapwe vakuvezika ku myaka yoshe.
27Miyati yoshe vakanuka Shukulu Kalunga,
mitambela yoshe ya mu kaye
vakatengulukila kuli ikeye,
co vanu voshe vakamulemesa.
28Omwo vumwene vwapwa vwa Shukulu Kalunga,
ikeye akashwana miyati yoshe.
29Vaka-kulyalesa voshe vakalya nakumulemesa,
na voshe vaje vashelumukila
mu vukalo vwa vatsi vakamulemesa,
co na woshe uje kasa kwamena mwonyo wendi
ku kutsa akamulemesa.
30Visemwa vya vanu vya kulutwe vakamupangela,
vanu vakendeka vya Shukulu Kalunga
ku cisemwa cije cikaija kulutwe.
31Vanu vaje kanda vasemuke vakavaleka ngwavo,
“Shukulu Kalunga wamenene vanu vendi!”
The Bible in Mbunda ©The Bible Society of Zambia, 2006