Myaso 112
112
Kuvwaelela kwa munu wamuvwa
1Shangazaleni Shukulu Kalunga!
Navezika munu uje akomoka Shukulu Kalunga,
munu uje avwaelela nakwononoka mashiko endi.
2Vana vendi vakapwa vingenyenye mu lifuti,
co vatekulwila vendi vakapwa vakuvezika.
3Naanga yendi vakapwa vakufuka,
co akavezika ku myaka yoshe.
4Ceke cikatwila mu lisusulungu kuli vaka-vushunga,
omwo Shukulu Kalunga wapwa muka-ngozi,
na mema ku mbunge na vushunga.
5Navezika munu uje ali na ngozi,
munu uje akumwisa vyendi kuli vakwavo,
uje apanga na vushunga mu vipangi vyendi
vyakulanda nakulandulula.
6Muka-vushunga kakonwa embwe,
vakamwanuka ku myaka yoshe.
7Munu wangacije kakazivi lyova
akutambula muzimbu wauvi,
omo ikeye nakulaela kuli Shukulu Kalunga.
8Ikeye kakazivi lyova nambe kujujuka,
noo namono vitozi vendi vanavafungulula.
9 #
2 Koli 9:9
Munu ou muka-vushunga aana vyuma vyendi
kuli vaje vanajeneka na mbunge yendi yoshe,
co ngozi yendi kuyesi kwonwa,
oloni akapwa muka-nzili na kasingimiko.
10Vaka-vuvi vakacimona, co vakaviilila,
vakalishumanga ku mayo nakunyonga,
co kuvakatambula vyuma vije vashakele.
The Bible in Mbunda ©The Bible Society of Zambia, 2006