Myaso 103
103
Cizemo ca Njambi
Mwaso wa Ndaviti
1Mbunge yange ishangazale Shukulu Kalunga,
na muvila wange woshe ushangazale lizina lyendi
lyakujela!
2Mbunge yange ishangazale Shukulu Kalunga,
co kesi wivale vivezikiso vyendi vyoshe.
3Ikeye muka-kunjisambesa ku vivi vyange vyoshe,
nakukangwisa mishongo yange yoshe.
4Shukulu Kalunga akanyungu mwonyo wange,
ku vukalo vwa vatsi,
cizemo cendi cije kucesi kutenguluka
na mema ku mbunge,
vinapu ngwe cilongo ku mutwe wange,
5ikeye anjana vyuma vyavivwa mukuyoya kwange,
ngeci njipwe nji mukwenje njikole
na nzili ngwe ngonga.
6Shukulu Kalunga akasompo mwa vushunga,
akalingi lalo vuvwa kuli voshe vaje vavayandesa.
7Washolwele viyongola vyendi kuli Mosesa,
nakumwesa vilinga vyendi vya nzili ku vanu va Isalele.
8 #
Yak 5:11
Shukulu Kalunga ikeye wa ngozi na mema ku mbunge,
kesi kuluvala vwasi, washula na cizemo
cije kucesi kutenguluka.
9Shukulu Kalunga kesi kuhisa simbu yoshe,
ikeye lalo kesi kuluvala simbu yoshe embwe.
10Ikeye kesi kutuhisa ngwe ku vuvi vwetu embwe,
nambe kutwilwisila vuvi vwetu ngwe ku milonga yetu.
11Ngwe omo muwapwa melu aje akala kulyala na asi,
mukemwo mucafwa cizemo cendi
cije kucesi kutenguluka kuli vaje vamukomoka.
12Ngwe muvyalyangunuka ngangela na kangombe ka yambi,
mukemwo lalo mwakatundisa vuvi vwetu.
13Ngwe ishe ya munu atetela vana vendi,
mukemwo lalo Shukulu Kalunga
mwakatetela vaje vamukomoka.
14Omwo ikeye azivuka muje mwatutangele,
azivuka ngeci yetu twapwa likungu.
15Mwonyo wa munu unapu ngwe mwila,
munu akula mwamuvwa ngwe shani ya mu shwata,
16oloni omo lihunzi lihuwa, co shani ipekumuka,
co naumo wai akanuka aje a mwela ayakele.
17Oloni cizemo ca Shukulu Kalunga kucesi kutenguluka
kuli vaje vamukomoka,
cikakalako myaka yoshe,
na vuvwa vwendi lalo vukakala ku cisemwa coshe,
18kuli vaje vanyunga cikumiiyo cendi,
na kuli vaje vakulaela nakwononoka mashiko endi.
19Shukulu Kalunga natumbika litanda lyendi mwilu,
ikeye mwene wa vyoshe.
20Yeni tungelo va nzili shangazaleni Shukulu Kalunga,
yeni vaka-kwononoka mashiko endi,
21yeni voshe vaka-nzili mulinakutolilila
ku lijwi lyendi,
shangazaleni Shukulu Kalunga,
yeni vangamba vendi vaje vakalingi cizango cendi!
22Shangazaleni Shukulu Kalunga yeni voshe vitanga vyendi,
na mu mitambela mwoshe muje mwalinakushwana!
Mbunge yange ishangazale Shukulu Kalunga!
The Bible in Mbunda ©The Bible Society of Zambia, 2006