Myaso 102
102
Mukwenje ali mu tuyando alombela kuli Njambi
1Njitolilile omo njilombela yove Shukulu Kalunga,
mutambi wange wete kuli yove ngeci unjikwase!
2Kesi unjikengese nima a litangwa lya n̄avava yange,
a litangwa lije njitambeka unapande kunjitolilila,
nakunjikumbulula vwasi.
3Omwo matangwa ange alinakuhwa ngwe vwisi,
co vitsiya vyange vilinakwenya ngwe cimbundi ca tuhya.
4Mbunge yange inazeye,
co inomu cau ngwe mwila,
nange kunjesi lalo na cizango cakulya vyakulya.
5Njinayondwa manene omwo kukemanga kwange.
6Njinapu ngwe likuvi mu mambo,
njinafu lalo ngwe likungulu uje ali mu ngundu.
7Njinalala cilavu-lavu,
njinapu ngwe kazila uje ali endi lika
a kashongwa ka njuvo.
8Vitozi vange vanjishaula litangwa lyoshe,
voshe vaje valinakunjiyengula
valinakukun̄ula lizina lyange.
9Omwo njinali lito ngwe likende,
vyakunwa vyange vanavikumbasana na misozi,
10omwo vukalu vwove nakuluvala kwove,
unanjumbila kuti.
11Matangwa ange anafu ngwe munzinze wa cingwezi,
njinapu ngwe mwila wakuma.
12Oloni yove Shukulu Kalunga
wapwa u mwene ku myaka yoshe,
visemwa vyoshe vakakwanuka.
13Kala na mema ku mbunge na Siyone,
omwo simbu inete yakumutetela,
ino ikeyo vene simbu yaivwa!
14Vangamba vove vazema Siyone,
nameme ikeyo vanainyongesa,
vangamba vove vaizivila mema ku mbunge,
nameme inapu ngundu.
15Ngecivene, miyati yoshe
vakasingimika Shukulu Kalunga,
co vimyene voshe va ano asi
vakashangazala vumpau vwove.
16Omo Shukulu Kalunga akatungulula Siyone,
co vumpau vwendi vukasholoka.
17Akatolilila nakukumbulula malombelo a vanu vaje
vakele nakuyanda.
18Sonekela vyuma evi ku cisemwa cije cikaija kulutwe,
ngeci vanu vaje kanda vasemuke,
navo lalo vakashangazale Shukulu Kalunga,
soneka ngwove,
19“Shukulu Kalunga wakengele asi
oku ali mwilu mu mwela wendi wakujela,
oku ali mwilu Shukulu Kalunga wakengele ano asi,
20ngeci azive kukemanga kwa vinzinda,
nakupatula voshe vaje vavanatumbwila kutsa.”
21Vakambulula lizina lya Shukulu Kalunga mu Siyone,
co vakamushangazala lalo mu Yelusalema,
22omo vanu va ku miyati yoshe vakakunguluka amo,
nakulemesa Shukulu Kalunga.
23Shukulu Kalunga nanjizeyesa omo njicili nji mukwenje,
matangwa akuyoya kwange lalo naakeesa.
24Ngecivene, njendekele ngwange,
“Yove Njambi yange, kesi unjambate ololo vene
simbu kanda njicikuluvale!
Yove Shukulu Kalunga unapande kuyoya ku myaka yoshe.”
25Ku san̄ulu yove wajalele luvula lwa asi,
co melu akewo vipangi vya mavoko ove.
26Vyoshe evi vikahwa, oloni yove kuuli,
vikevyo lalo vikakula ngwe vuzalo.
Yove ukavitengulula ngwe muukatengulula vuzalo,
co vyoshe vikanyonga.
27 #
VaHe 1:10-12
Oloni yove simbu yoshe wafwa mumo,
co myaka yove kuyikahu embwe.
28Vana vetu vakakala mwamuvwa,
co akunyunga kwove vatekulwila vavo vakakala mu kwoloka.
The Bible in Mbunda ©The Bible Society of Zambia, 2006