Visimo 31
31
Majwi akunangula mwene
1Awa akewo majwi a vaina ya Mwene Lemwele, aje avamulongesele.
2“Yove unapu munange injazema, yove wasemukile akunjimbulula ku malombelo ange. Tolilila mwamuvwa. 3Kesi uviisile nzili yove ku vupangala, na vimbongo vyove vyoshe ku vanakazi, vakevo vananyongesa vimyene vavangi. 4Ove Lemwele tolilila, vimyene kuvapandele kunwa vinyu, nambe vaka-kushwana kuvapandele kushungwiya kunwa vwala. 5Omo vimyene vanwa vwala vevala mashiko, co kuvombuko mbunge ku vije vinapande vaka-kuyanda. 6Vwala vanapande kuvunwa vanu vaje vashaka kutsa, nambe vanu vaje kuvesi lalo na cinyangavili. 7Vanu va cifwa eci vanapande kunwa ngeci vevale vuutu vwavo, na tuyando twavo.
8“Oloni yove unapande kwendekelako vanu vaje kuvasa kulyendekela vakevo vavenya. Nyunga vije vinapande kuli kautu na muka-kujeneka. 9Vendekeleko nakusompa mwa vushunga. Nyunga vije vinapande kuli kautu na muka-kujeneka.”
Munakazi wamuvwa
10Munakazi wa seo iyajo asa kumuwana? Seo yendi inatuvakana mamanya a lumbi!
11Munalume wendi wamukulaela, co kakapu kautu.
12Matangwa akuyoya kwendi oshe, akalingila munalume wendi vyuma vyavivwa, kesi vyavivi embwe. 13Akakala na cipangi cakutonga maka a vimanga na vuzalo vwa linyu.
14Napu ngwe vwato vwa vaka-kulandesa vuje vunena vyakulya vyendi kutunda kulyala.
15Enduka omo kanda litangwa lituuke, mukuvwaesela naanga yendi vyakulya, nakuleka vangamba vendi va vambanda vije vivanapande kupanga.
16Akulivanga ayongola mu mbunge yendi kulanda lihya na vimbongo vije vyakawana, co akunamo mikolovozi ya vushuka vwa vinyu.
17Muka-kuundangana manene, muka-nzili nakupanga mwamuvwa.
18Azivuka seo ya vyuma vyoshe vyalinga, co apanga na nzili noo mukati ka vutsiki.
19Livoko lyendi limo nakwata citi cili na mukamango wa vwanda, co livoko lyendi likwavo nakwata limbambale lyakwombwesa vwanda.
20Ikeye wakala na cizemo kuli vaka-kuutwa, na kuli vaka-kujeneka.
21Ikeye kesi kulinyenyeta omo kuli lisika, omwo naanga yendi vali na vuzalo vwa ntwima.
22Akatongela vinanga a vulili, co akazala vuzalo vwavuvwa vwa linyu vwakuvenguluka.
23Munalume wendi vamuzivuka, omo akakala akati ka vakulunu va mu nganda.
24Munakazi ou akatongo vuzalo na miva, co avilandesa kuli vaka-kulandulula.
25Wapwa muka-nzili na kasingimiko, co kesi kulishoshomwena na vyuma vije vikaija kulutwe.
26Akendeka na lyovwa-ovwa na mana.
27Simbu yoshe muka-kuundangana, co akenga vije vanajeneka naanga yendi.
28Co vana vendi vakamwesa kuvwaelela kwavo, co munalume wendi amushangazala,
29nakwendeka ngwendi, “Vanakazi va seo vavangi, oloni yove u wa seo manene kutuvakana voshe.”
30Citso ca munu cikakwisa, na vuvwa vwa cihanga cendi vwapwa vwangoco, oloni munakazi uje asingimika Shukulu Kalunga vakamushangazala.
31Mwaneni cikandelela a vije vyoshe vyakapanga. Vanu voshe vanapande kumusingimika.
The Bible in Mbunda ©The Bible Society of Zambia, 2006