Visimo 30
30
Majwi a Angule
1Awa akewo majwi a Angule muna Njake wendekele ngwendi,
“Njambi kesi nange, Njambi kesi nange, co njinazeye.”
2Mwa vushunga njinapu nji cilema
kutuvakana vanu voshe, kunjesi na mana a vunu.
3Kunjalilongesele mana, co kunjizivuka Njambi mwafwa.
4Iyajo wazivuka mana a mwilu?
Iyajo wakwatele lihunzi mu livoko lyendi?
Nambe kuzengela mema mu vuzalo vwendi?
Nambe kutwa vinginga vya kaye?
Nga kwali munu wangacije njilekeni lizina lyendi.
Njilekeni lalo na lizina lya munendi.
5“Vyoshe vije vyendeka Njambi vyapwa vya vushunga, wapwa ntelo ya vaje voshe vatewela kuli ikeye. 6Kesi uwezelele ku majwi anendeka Njambi, kutewa akakuluvalesa, nakukupwisa munu wa makuli.”
Visimo vikwavo
7Njilomba vyuma vivali kuli yove Njambi simbu-kanda njitse. 8Njitundise makuli, ngeci kesi njipwe muka-kufuka, nambe kupwa muka-kuutwa, njane vyakulya vije vinanjipande. 9Nga njikakala na vyuma vyavingi, amo kunjikakuzeme, oloni nga njipwa kautu, amo njikaiva, nakukuzivisa shwamwa yove Njambi yange.
10Kesi ufweyele ngamba kuli shukulu yendi, kutewa akakusinga, co ukamona tuyando.
11Kuli vanu vamo vakasingi vaishavo, co kuvesi kushangala vainavo.
12Kuli vanu vamo vakaliyongola ngeci vanapu vakujela, oloni kuvalijelesele ku mazilo avo.
13Kuli vanu vamo vakaliyongola ngeci vanapu vavavwa manene, eyo, valiyongola ngeci vanapu vavavwa!
14Kuli vanu vamo vali na mayo akufwa ngwe mikwale, na mavundi avo ngwe vimoko ngeci valye vaka-kuutwa nakuvatundisa ano asi, nakutundisa vaka-kuyanda akati ka vanu.
15Lishunju wakala na vana vendi vavali va vanakazi, mazina avo, “Njane!” Kuli vyuma viwana vije kuvyesi kukuta vikevyo evi,
16vukalo vwa vatsi,
limo lya mumba,
livu lyakuma,
na tuhya twakuzima.
17Munu woshe uje ashendumuna ishe, nambe kujeneka kwononoka vaina, napande kuliwa ku makuvi nambe makololo kumucakuvula mesho endi.
18Kuli vyuma lalo viwana vije vyavikalu kuli yange kuvizivisisa,
19ngila yakapulula ngonga a mukambwila,
muvuva wa linyoka a mamanya,
ngila ya vwato vwakama ya a mema a kalunga,
ngila yakulizema mukwenje na mumbanda.
20Munakazi muka-kulinga vupangala akendeka ngwendi, “Kulimona na munalume weka cinapu ngwe kulya vyakulya.”
21Kuvili vyuma viwana vije vikajajesa lifuti,
22ndungo uje emuka kupwa mwene,
cilema uje alya vyoshe awana,
23munakazi uje vanayengula oloni ashomboka,
na ngamba wa mumbanda omo ahinga mu mwela
wa shukulu yendi wa munakazi.
24Kuli tusitu vavandondo vawana muno mu kaye, oloni vakunyanyama manene.
25Mishwa, vapwa va nzili,
oloni vakalitulikila vyakulya vyavo
mu simbu ya ndombo.
26Mashea, na vakevo kuvesi na nzili,
oloni vakatungila membo avo mukati ka mamanya.
27Vimbimba, kuvakele na mwene, oloni vakende mu mukana.
28Misanga, wasa kukwata umo mu livoko lyove,
oloni wasa kuvawana na mu mapela.
29Kuli vyuma viwana vije vikomokesa akuvikenga omo vyenda,
30vindumba, vapwa va nzili manene,
kutuvakana tusitu voshe,
co kuvesi kutewa cuma nacimo cai.
31Vimembe, na vindemba,
na vimyene vaje venda kulutwe lwa vanu vavo.
32Nga ulinga vulema mu kulyalesa, nakutumba vutumbe vwavuvi, likele, co yongola! 33Nga ukucwangeya mavele, co kutunda mazi, nga upupa a lijulu lya mukweni, co anokola, nga ukala na matoto, co ukala mu vukalu.
The Bible in Mbunda ©The Bible Society of Zambia, 2006