Ovandiya 1
1
Shukulu Kalunga akahisa Endome
1Eci cikeco cimona ca Ovandiya.
Omu mukemwo mwendekele Shukulu Kalunga wa Akamwa ya Vyoshe
a muyati wa Endome.
Tunazivi lijwi linatundu kuli Shukulu Kalunga.
Watumine muluwa ngeci aye akaleke miyati ngwendi,
“Livwaeseni tukalwise muyati wa Endome.”
2Shukulu Kalunga alinakwendeka ku muyati
wa Endome ngwendi,
“Mwavushunga njikakupwisa uwamundondo akati ka miyati,
co voshe vakakuyeluwisa.
3Mbunge yove ya kulyalesa inakukwisa,
yove wakala mu cimpaka ca mamanya,
nakutungila limbo lyove akamwa ya minkinda,
co ulyendekesa mu mbunge yove ngwove,
‘Iyajo asa kunjiwisila asi?’
4Nameme upulwila mwilu ngwe ngonga,
nakutungila njuvo yove akati ka vingongonosi,
oloni nambe ngoco njikakuwisila asi.
5“Omo vezi vaija vutsiki,
vaiva lika vije vivashaka.
Omo vanu vakungulula vushuka
vwa mikolovozi ya vinyu,
co vakasezao lika vwavundondo.
Oloni vitozi veni vanamimanesa muvavoshe njwa.
6Yeni vatekulwila va Isau,
vufuko vweni vanavupukula.
7Vanu vaje mwalizivasanene navo,
vanamisheke mu lifuti lyeni.
Vanu vaje vakele mu kwoloka neni,
ololo vanamifungulula.
Vasamba veni va a mbunge vanamitela mweto,
co vendeka ali yeni ngwavo,
‘Kuje kunyanyama kwavo vakelenakwo kuli kulijo?’
8“A litangwa lije omo njikahisa Endome,
njikanyongesa vanu vamwo vakunyanyama,
nakumanesa mana avo oshe.
9Vanalume vaka-kulwa va ku Temane vakalijujukila,
co lishwalale woshe wa mu Endome vakamutsiya.
10“Omwo mwevile nakutsiya vandolome veni,#1:10 VANDOLOME VENI: VaIsalele vatundile kuli Yakomba, uje wapwile ndolome ya Isau, kukulwila ya vaEndome.
vatekulwila va Yakomba,
co mukaziva shwamwa nakumiyengula ku myaka yoshe.
11Mwemanene kumukulo a litangwa lije,
omo vitozi vasiwilile asi vikolo vyavo.
Mwapwile muvavavi ngwe vaka-kwija
vaje vambatele vufuko vwa mu Yelusalema,
nakulipangezelavwo akati kavo.
12Yeni kumwapandele kulyalesa,
a tuyando twa vandolome veni vali mu Yunda.
Kumwapandele kuvwaelela,
a litangwa lyakuvanyongesa.
Kumwapandele kuvajola a tuyando twavo.
13Kumwapandele kukovela mu nganda ya vanu vange,
nakwambata vufuko vwavo,
a litangwa lya tuyando twavo.
14 #
Isa 34:5-17; 63:1-6; Njele 49:7-22; Ezek 25:12-14; 35:1-15; Amo 1:11-12; Mal 1:2-5 Kumwapandele kwimana a masambwa-ngila,
nakukwata vaje vavomboloka,
kumwapandele kuvana mu mavoko a vitozi,
a litangwa lya tuyando twavo.
Njambi akasompa miyati yoshe
15“Litangwa lili muyehi omo yange Kalunga,
njikasompa miyati yoshe.
Muje muunalingi yove Endome,
mukemwo lalo muvakakulinga nove.
Vilinga vyove vikakwilukila yove vavenya.
16Vanu vange vananwila nganja ya cihiso yakulula
a lilundu lyange lyakujela.
Oloni miyati yoshe vaje vanamizengeleka,
anga vakanwa nganja ya cihiso ikwavo yakulula.
Vakainwa yoshe njwa, co vakanyonga.
Kuhyana kwa Isalele
17“Oloni a Munkinda wa Siyone,
vamo vakavomboloka,
co ukapwa mutambela wakujela.
Vanu va Yakomba,
vakashwana lifuti lyavushwana vwavo.
18Vanu va Yakomba na vanu va Yosefa,
vakapwa ngwe tuhya,
vakanyongesa vanu va Isau,
ngwe tuhya twenyeka vishati.
Naumo wai mutekulwila wa Isau akayoya.
Yange Kalunga, njinendekamo.
19“Vanu va ku Nengeve,
vakatambula Lilundu lya Isau,
vanu va ku Shefela,
vakatambula lifuti lya Filisitiya,
vakakala mu lifuti lya Efalime,
na mu lifuti lya Samaliya,
vaMbenjemani vakatambula lifuti lya Ngilyande.
20Mashwalale va vinzinda va ku Hala,
vakeluka nakutambula lifuti lya Fonisha,
kweta na ku kunto ya Zelefate.
Vinzinda va mu Yelusalema
vaje vali mu Shefelande,
vakatambula vinganda vya Nengeve.
21Vanalume vaka-kuhyana va mu Yelusalema,
vakashwana Endome.
Shukulu Kalunga vavenya akapwa Mwene.”
Currently Selected:
Ovandiya 1: MBB
Highlight
Copy
Compare
Share
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006
