Kulava 15
15
Mashiko aa kukombelela
1Shukulu Kalunga wendekele kuli Mosesa ngwendi, 2“Leka vanu va Isalele ngwove, omo mukakovela mu lifuti lije linjikamyana. 3Mukalambula milambu ya kwenyeka nambe kukombelela kuli Shukulu Kalunga, ngombe wa nkomba, nambe lijamba lya manga. Nambe manga, nambe membe, mukushulisa milambu ya cisingo, nambe milambu ya cizango, nambe ya viwano vije vemika, co vweko vwavuvwa vwa milambu eyi ya vyakulya vukavwaelelesa Shukulu Kalunga. 4Co woshe uje akakombelela manga nambe membe kupwa mulambu wa kwenyeka kuli Shukulu Kalunga, napande kutwala kilo imo ya vunga vwavuvwa vwakuseneta vwakukumbasana na mazi a olive kupwa mulambu wa vimbuto vya vinona. 5Co akatwale lita imo ya vinyu ngwe ku muna manga umo na umo kupwa mulambu wa vyakunwa wakwaka a milambu ya kwenyeka nambe wa vyakukombelela. 6Omo akakombelela lijamba lya manga, akatwale makilo avali a vunga vwavuvwa vwakuseneta vwakukumbasana na lita imo na litambelo lya mazi a olive. Co akavilambule kupwa mulambu wa vimbuto vya vinona, 7amolika na lita imo na litambelo lya vinyu kupwa mulambu wa vyakunwa, co vweko vwavuvwa vwa vin̄ombelo evi vukavwaelelesa Shukulu Kalunga. 8Omo akalambula ngombe wa nkomba kuli Shukulu Kalunga kupwa mulambu wa kwenyeka, nambe n̄ombelo ya kushulisa cisingo, nambe mulambu wa kulitombola, 9akatwale makilo atatu a vunga vwavuvwa vwakuseneta vwakukumbasana na malita avali a mazi a olive kupwa mulambu wa vimbuto vya vinona, 10amo na malita avali a vinyu. Co vweko vwavuvwa vwa n̄ombelo eyi vukavwaelelesa Shukulu Kalunga.
11“Omu mukemwo mumukalinga omo mukalambula ngombe wa nkomba umo, nambe lijamba lya manga umo, nambe muna manga umo, nambe muna membe umo. 12Mukalinga ngeci ngwe ku vungi vwa vimuna ava, co mukemwo mumukalinga a umo na umo kupwisa ku vungi vwavo. 13VaIsalele voshe vakalinge vyuma evi mu ngila eyi vene omo vakalambula mulambu wa vyakulya, co vweko vwavuvwa vwa mulambu ou wa vyakulya vukavwaelelesa Shukulu Kalunga. 14Ku visemwa vyeni vyoshe vikaija kulutwe omo muka-kwija nambe munu woshe-iwoshe uje alinakukala akati keni ashaka kulambula mulambu wa vyakulya, vweko vwavuvwa vuvwaelelesa Shukulu Kalunga, napande kunyunga mashiko awa. 15Co mbunga yoshe vakakale na vizilika vimolika, kuli yeni na kuli muka-kwija uje alinakukala akati keni. Evi vikevyo vizilika vya ku myaka yoshe mu visemwa vyeni vyoshe. Neni na vaka-kwija munapu mumolika ku mesho a Shukulu Kalunga. 16#VaLe 24:22 Co kukakale lishiko limolika na vilongesa vimolika kuli yeni na kuli muka-kwija uje alinakukala akati keni.”
17Shukulu Kalunga wendekele kuli Mosesa ngwendi, 18“Endeka kuli vanu va Isalele ngwove, omo mukakovela mu lifuti lije linjimitwala, 19co cikapwa ngeci omo mukalya vyakulya vya mu lifuti lije mukakombelela n̄ombelo kuli Shukulu Kalunga. 20Omo mukatika makende a vunga vwakulivanga vwa ku vimbuto vyaviha, co mutambela wa mukasha wa makende wakulivanga mukautwale ngeci ukapwe mulambu wakama kuli Shukulu Kalunga. 21Ku visemwa vyeni vyoshe vya kulutwe, mukakombelela n̄ombelo eyi kuli Shukulu Kalunga ya makende eni akulivanga kutika.
Vin̄ombelo vya vuvi vwa ku nzimba
22“Oloni nga munu ali ku nzimba onwa kunyunga mashiko aje ashikile Shukulu Kalunga kuli Mosesa, 23tunde a litangwa lije Shukulu Kalunga waanene mashiko, kutwala ku visemwa vyeni vya kulutwe, 24nga calingiwile ku nzimba ya mbunga, co mbunga yoshe vakakombelele muna ngombe wa nkomba kupwa mulambu wa kwenyeka. Co vweko vwavuvwa vwa mulambu ou vukavwaelelesa Shukulu Kalunga. Amo na mulambu ou wa kwenyeka, co vakalambule mulambu wa vimbuto vya vinona, na mulambu wa vinyu, ngwe ku lishiko. Co lalo vanapande kulambula lijamba lya membe kupwa mulambu wa a vuvi. 25Co muka-kukombelela akaambesa mbunga ya vanu va Isalele nakuvasambesa omwo mulonga unapwile wa ku nzimba, co vakevo vanatwala n̄ombelo yavo ya a vuvi ngwe n̄ombelo ya vyakulya kuli Shukulu Kalunga omwo nzimba yavo. 26Co mbunga yoshe ya vanu va Isalele, na vaka-kwija vaje valinakukala akati kavo vakavasambesa, omwo vacilingile ku nzimba.
27“Nga munu alingila vuvi ku nzimba, co ikeye akakombelele muna membe wa lwavo wa mwaka umolika kupwa n̄ombelo ya a vuvi. 28#VaLe 4:27-31 Co kuje ku mutula muka-kukombelela akajelesa uje munu navulumuna mulonga wa ku nzimba, co vakamusambesa. 29Mukakala na lishiko limolika kuli uje avulumwina ku nzimba nambe kaIsalele, nambe muka-kwija uje alinakukala akati kavo.
30“Oloni munu woshe uje alinga vuvi na kapopolwezi, nambe kaIsalele, nambe muka-kwija, ali na mulonga wa kushaula Shukulu Kalunga, co vakamutsiye, 31omwo nombwanesa vije vyendekele Shukulu Kalunga, co najomboka lishiko lyendi.”
Munu ombwanesa Litangwa Lyakuhwima
32Omo vanu va Isalele vakele mu mambo, vawanene munalume umo wakele nakucava vitale a Litangwa Lyakuhwima. 33Co vaje vamuwanene alinakucava vitale vamutwalele kuli Mosesa na Alone na ku mbunga yoshe ya vanu va Isalele, 34co vamunyungilile mu njuvo omwo kanda vayongole mwakumulingila. 35Co Shukulu Kalunga wendekele kuli Mosesa ngwendi, “Munu ou napande kutsa, mbunga yoshe vamutwale anja ya cilombo vakamwashe mamanya.” 36Ngecivene, mbunga yoshe vamutuwisile anja ya cilombo, co vamwashele mamanya watsile, ngwe muje mwashikile Shukulu Kalunga kuli Mosesa.
Mashiko akukuta vinzombo ku vuzalo
37Co Shukulu Kalunga wendekele kuli Mosesa ngwendi, 38#Kwi 22:12 “Endeka kuli vanu va Isalele ngwove, tungileni vinzombo ku mikundwilo ya vuzalo vweni, co akeniho mukole wakuzivuluka a nzombo imo na imo, mukalinga ngeci ku visemwa vyeni vyoshe vya kulutwe. 39Vinzombo evi vikevyo vikamyanukisa mashiko ange oshe, co mukawononoka, kumukatengulukila lalo kweka kutunda kuli yange nakukava vizango vyeni na mashungu eni. 40Asinoni mukanuka nakwononoka mashiko ange oshe, co mukapwa vakujela kuli Njambi yeni. 41Yange njapwa Kalunga Njambi yeni njamitundisile mu Ingito kupwa Njambi yeni, yange njapwa Kalunga.”
Currently Selected:
Kulava 15: MBB
Highlight
Copy
Compare
Share
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006
