Kulava 14
14
Kulinyenyeta kwa vanu va Isalele
1Mbunga ya vanu va Isalele valilile vutsiki vwoshe omwo ya vukalu vwavo. 2Co valinyenyetelele kuli Mosesa na Alone. Asinoni mbunga yoshe vendekele ngwavo, “Tawe! Nga capwile mwamuvwa manene kutsila mu Ingito nambe ngano muno mu mambo! 3Omwo vikajo Shukulu Kalunga natunenela muno mu lifuti ngeci tutse ku nzita? Vanakazi vetu na vana vetu vakavafungulula. Kuma kutwasa kwiluka ku Ingito ndi?” 4Ngecivene, valyendekesele umo na mukwavo ngwavo, “Twanguleni ntwama ngeci atwilwise ku Ingito!” 5Asinoni Mosesa na Alone vakulamene asi ku mesho a mbunga yoshe ya vanu va Isalele vaje vakungulukilile kuje. 6Co Yoshwa muna Nune, na Kalembi muna Njefune, vaje vakele akati ka vaje vakanengele lifuti, vatavwile vuzalo vwavo mukuviilila. 7Vendekele ku mbunga yoshe ya vanu va Isalele ngwavo, “Lije lifuti tunakanengele lyapwa lifuti lyalivwa manene. 8Nga Shukulu Kalunga atava, co akatutwala mu lifuti lije nakutwanalyo, lifuti lije lya vufuko na vwilo nevi vyakujenekamo vyai. 9#VaHe 3:16 Oloni kesi mutengulukile Shukulu Kalunga nambe kesi mutewe vanu vali muje. Tukavafungulula omwo Shukulu Kalunga ali netu, ikeye wafungulwile vinjambi vaje vavakulaelele, ngecivene, kesi muvazivile lyova embwe.” 10Oloni mbunga yoshe vendekele ngwavo, “Tuvasheni mamanya!” Oloni omo vakasumukile, kengeni, kuvyazima kwa vumpau vwa Shukulu Kalunga kwasholokelele vanu voshe va Isalele ku Mbalaka Mwakuliwanena.
Mosesa aakwila vanu va Isalele kuli Njambi
11Shukulu Kalunga wendekele kuli Mosesa ngwendi, “Visimbu vingai vanu ava vakanjishaula? Co lalo visimbu vingai vakavyana kunjikulaela nameme vamwene vikomokeso vyoshe vije njalingile akati kavo? 12Njikavatumina mushongo wakulitambwisa nakuvanyongesa, oloni yove njikakupwisa muyati wakama wa nzili kutuvakana vakevo!”
13Oloni Mosesa wendekele kuli Shukulu Kalunga ngwendi, “Yove Shukulu Kalunga watundisile vanu ava mu Ingito na nzili yove. Co omo vaka-Ingito vakaziva vije viwulinga kuli vanu vove, 14co vakevo vakambulula kuli vanu ava vakala mu lifuti lino. Omwo vanazivi laja ngwavo yove Shukulu Kalunga uli netu, omwo yove Shukulu Kalunga tukakumono mesho na mesho, na lishelwa lyove likemana akamwa yetu. Co yove lalo ukatwama kulutwe lwetu mu manda ya lishelwa ku mutanya na mu manda ya tuhya ku vutsiki. 15Oloni nga ukatsiya vanu voshe ava mu simbu imo, co vanu voshe vaje vazivile lutsimo lwove vakendeka ngwavo, 16‘Shukulu Kalunga natsiila vanu vendi mu mambo omwo nonwa kuvatwala mu lifuti lije wavakulaesele kuvanalyo, mukemwo navatsiila mu mambo?’ 17Cooni ololo Shukulu Kalunga njikulomba ngwange tumwese nzili yove, co linga evi viwatukulaesele omwo wendekele ngwove, 18#Kut 20:5-6; 34:6-7; Kwi 5:9-10 ‘Yange Kalunga kunjesi kuluvala vwasi embwe. Njashula na cizemo cije kucesi kutenguluka nakusambesa vuvi vwavo nakutengulukila kwavo. Oloni kunjikonwa kunyanyamesa vana na vatekulwila a vuvi vwa vaishavo ku cisemwa camucitatu neci camuciwana.’ 19#Kut 32:11-14 Ngecivene, Shukulu Kalunga, ngwe ku vukama vwa cizemo cove cije kucesi kutenguluka, njakulombo ngwange, sambesa vuvi vwa vanu ava, ngwe muwavasambesele simbu ije vatundile mu Ingito kweta na lelo lino.”
20Co Shukulu Kalunga wamukumbulwile ngwendi, “Njinavasambesa, ngwe muunalombo. 21Oloni njikuleka ngwange mwa vushunga vene omo yange njayoya, co na vumpau vwange vwashula asi oshe, 22naumo wai wa ali vanu ava akamona lifuti lije. Vakevo vamwene ceke ca vumpau vwa ku mesho ange na vikomokeso vije njalingile mu Ingito na mu mambo, oloni vanjesekele visimbu likumi, co vavyanene kunjononoka. 23#VaHe 3:18 Co nalumo lwai vakakovela mu lifuti lije njalikulaesele kuli vakukulwila vavo. Naumo wai wa ali ava vananjishaula akamona lifuti lije, 24#Yos 14:9-12 kuvanga ngamba yange Kalembi omwo ikeye ali na viyongola vyeka, co ikeye wapwa wa kulongwa. Njikamutwala mu lifuti lije lyakanengele, co vatekulwila vendi vakashwana lifuti lije mu vyana vyalyo mwakala vaAmaleke na vaKanana. 25Ilukeni imene muye mu mambo ku mutambela wa Linema lya Akava.”
Shukulu Kalunga ahisa vanu akulinyenyeta kwavo
26Shukulu Kalunga wendekele kuli Mosesa na Alone ngwendi, 27“Visimbu vingai ava vanu vaka-vuvi vakalinyenyetela kuli yange? Njazivi kulinyenyeta kwavo! 28Valeke ngwove, ‘Mwa vushunga njilisinga omwo yange njayoya, njikalinga kuli yeni ngwe muje mumunalombo. Yange Kalunga, njinendekamo. 29#VaHe 3:17 Mukatsa, co mivila yeni ikalala muno mu mambo, omwo munalinyenyetela kuli yange, naumo wai uje natuvakana myaka makumi avali akakovela mu lifuti lije. 30Naumo wai akovela mu lifuti lije njamikulaesele kumyanalyo, kuvanga lika Kalembi muna Njefune, na Yoshwa muna Nune. 31Yeni mwendekele ngweni vana veni vakavafungulula, oloni yange njikavatwala mu lifuti lije limwavyanene, co likelyo likapwa lifuti lyavo. 32Oloni yeni, mukatsila muno mu mambo. 33#Vil 7:36 Co vana veni vakapwa tunyungi, vakendangana mu mambo myaka makumi awana, vakayanda omwo kukulaela kweni, kuvanga noo yeni voshe munatsi njwa. 34Ngwe kulava matangwa makumi awana aje mwakanengele lifuti, ngecivene, mukayanda myaka makumi awana omwo vilinga vyeni vyavivi. Litangwa limo linapu mwaka umo, co matangwa makumi awana anapu myaka makumi awana. Co mukanjizivuka akumilwisa. 35Njilisinga ku mbunga eyi yaivi, voshe vananjikungulukila muno mu mambo nakunjilwisa. Voshe vakanyongelamo, co mukemwo lalo muvakatsila. Yange Kalunga, njinendekamo.’ ”
36Vanalume vaje vatumine Mosesa kunenga lifuti, vakevo vaje velukile nakunena vukaleo vwa makuli vuje vwalingisile mbunga yoshe kulinyenyetela kuli Shukulu Kalunga. 37Co vaje vaka-kunenga vanenele vukaleo vwa makuli vwa lifuti lije, vakevo vene vatsile ku mushongo wakulitambwisa. 38Oloni Yoshwa muna Nune, na Kalembi muna Njefune, vakevo lika vasaleleo, akati ka vaje vanalume likumi na vavali vaile nakunenga lije lifuti.
VaIsalele vonwele kukovela mu lifuti omwo kuvononokele
(Kwi 1:41-46)
39Omo Mosesa walekele vaIsalele vije vyendekele Shukulu Kalunga, co valilile manene. 40Co alikaki mutondo-tondo vaile ku lifuti lya malundu. Vendekele ngwavo, “Tunalingi vuvi. Tuya ku mutambela uje watukulaesele Shukulu Kalunga.”
41Oloni Mosesa wendekele ngwendi, “Omwo vikajo kumwesi nakwononoka kushika kwa Shukulu Kalunga? Kumukahyana embwe! 42Kesi muyeko omwo Shukulu Kalunga kesi neni, vitozi veni vakamifungulula. 43Omwo kulutwe lweni kuli vaAmaleke, na vaKanana, mukatsila mu nzita. Omwo mwavyana kukavangeya Shukulu Kalunga, co kakakala neni embwe.”
44Nameme ngoco vakevo vakakateyeye kuya mu lifuti lya malundu, oloni nambe Mosesa nameme Cikasa ca Cikumiiyo ca Shukulu Kalunga, kuvatundile mu cilombo embwe. 45VaAmaleke na vaKanana vaje vakele mu lifuti lya malundu vashelumukile nakulwisa vaIsalele nakuvafungulula, co vavashekele na ku Holema.
Currently Selected:
Kulava 14: MBB
Highlight
Copy
Compare
Share
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006
