Nehemiya 4
4
Nehemiya ahyana vaka-kuyeluwisa vipangi vyendi
1Omo Sanevalate wazivile ngeci yetu vaYunda tunashangumuka kutungulula civumbe, waluvalele manene, nakutuyeluwisa. 2Co wendekele ku mesho a vavushoko vwendi na kuli mashwalale va vaSamaliya ngwendi, “Vikajo vivalinga ava vaYunda vakuzeya? Vashaka kutungulula nganda? Kuma vayongola ngeci akukombelela vin̄ombelo, vasa kumanesa vipangi mu litangwa limo ndi? Kuma a vyuma vije vinenye vasa kulingao mamanya indi?” 3Co Toviya kaAmoni wemanene amo nendi, wendekele ngwendi, “Civumbe mukajo civalinakutunga? Nameme mbanje asa kuciwisa!”
4Njalombelele ngwange, “Yove Shukulu Njambi yetu ziva omo valinakutushendumuna! Kuyeluwisa kwavo kuvelukile vakevo vavenya. Tava ngeci vavanyeke vyoshe vije valinavyo, co tava ngeci vavatwale mu lifuti lya vungenzi kupwa vinzinda. 5Kesi uvasambese ku vuvi vuvalinakulinga, kesi wivale vuvi vwavo, omwo vanatushaula yetu vaka-kutunga.”
6Ngecivene, twatungile civumbe, co twetele ku litambelo lyaco mu vulaja, omwo vanu vakele manene na ntwima yakupanga.
7Omo Sanevalate, na Toviya, na vanu va ku Alambiya, na ku Amoni, na va ku Ashendonde vazile ngeci vipangi vilinakuya kulutwe mukutungulula civumbe ca Yelusalema, na mukuzika-zika mu vimbengwa muje mwatuvikile, co valuvalele manene. 8Ngecivene, voshe amolika valingile vutumbe vwakwija nakulwisa Yelusalema nakunena citanga cakama, 9oloni twalombelele kuli Njambi yetu, co twaakele vaka-kunyunga mutanya na vutsiki ngeci kesi vatulwise.
10Vanu va Yunda vembile mwaso ngwavo,
“Tunajuka kwambata vitele,
vishati vinatumu manene.
Vatijo twasa kutunga civumbe
ku litangwa lya lelo?”
11Vitozi vetu vayongwele ngeci kutwasa kuvamona nambe kuzivuka vije vilinakulingiwa, kuvanga noo vanaija kuli yetu, nakututsiya nakwimika vipangi vyetu. 12Oloni a simbu na simbu vaYunda vaje vakele mukati ka vitozi vetu, vakele nakwija nakutunangula a matumbe avo akutulwisa. 13Ngecivene, njapangezelele vanu mikwale, na makunga, na mata a lusipa, co njavemikile mu vikota vyavo kunima ya civumbe, kuje kwoshe kucahwile kutunga. 14Njamwene ngeci vanu vakele na cishota-mbunge, ngecivene, njendekele kuli vakevo, na kuli vantwama vavo, na kuli vamyata ngwange, “Kesi muzivile lyova vitozi vetu. Anukeni ngeci Shukulu Kalunga wapwa wakama wakukomokesa, co lwileni vavushoko vweni, na vana veni, na vanakazi veni, na vinjuvo vyeni.” 15Vitozi vetu vazivile ngeci tunawana laja vije vivayongwele, co vanangukile ngeci Njambi nahyana matumbe avo. Asinoni tuvavoshe twelukile mukutungulula civumbe.
16Co capwile ngeci kutunda aje vene, litambelo lya vanu vange vapangele, co litambelo likwavo lya vanu vemanene nakunyunga, vazalele vuzalo vwa nzita nakukwata makunga, na vintelo, na mata a lusipa. Co vantwama vetu vakwasele vanu na mbunge imo, 17vaje vakele nakutungulula civumbe. Nameme vaje vakele nakwambata vyakutungisa vapangele na livoko limo, co ku livoko likwavo vakwateleko citwa, 18co munu na munu uje wakele nakutunga, waakele moko ya mukwale mu mbunda yendi. Co munu uje wakele nakwimba lupembo wakele amo nange. 19Njalekele vanu, na vamyata vavo, na vantwama ngwange, “Cipangi cinapu cakama, co tunalyangunuka manene umo na mukwavo a civumbe. 20Nga muziva lupembo lwimba, ijeni mulikungulwile kuli yange. Njambi yetu akatulwilako.” 21Ngecivene, a litangwa na litangwa, kutunda mutondo noo vutsiki, litambelo lya vamo vetu vapangele ku civumbe, co litambelo likwavo lya vamo vetu vemanene na makunga mukunyunga.
22A simbu ije njalekele vanalume vaka-kupangesa ngwange vakevo na vakwasi vavo vakale mu Yelusalema a simbu ya vutsiki, ngeci vanyunge nganda, co ku mutanya vapange. 23Nameme a simbu ya vutsiki kunjashulwile vuzalo vwange, nambe vakwetu kuvashulwile vuzalo vwavo, nambe vangamba vange, nambe muka-kunjinyunga. Co yetu voshe twakele na vitwa vyetu mu mavoko nameme omo twaile ku ndonga.
The Bible in Mbunda ©The Bible Society of Zambia, 2006