Nehemiya 3
3
Kutungulula civumbe ca Yelusalema
1Eyi ikeyo ngila ivatungulwile civumbe ca nganda. Elyashimbe Muka-kukombelela Wakama na vakwavo vaka-kukombelela vatungulwile Cikolo ca Vimanga, co vacikundikile, nakwakako vikolo. Co vakundikile civumbe kutunda ku Kaposhi ka Ciita nakweta ku Kaposhi ka Hananele.
2Co vanalume va ku Yeliko vatungile mutambela wakwatako. Zakule muna Imeli watungile mutambela wakwatako.
3Vaka-cikota ca Hasena vatungile Cikolo ca Visi. Vaakele mikambo na vikolo mu myela yavyo, co vaakeleko tupateso na mikambo yakupatesa ku cikolo.
4Melemote, muna Uliya mutekulu wa Hakoze, watungile mutambela wakwatako.
Meshulame, muna Mbelekiya mutekulu wa Meshezavele, watungile mutambela wakwatako.
Zandoke muna Mbana watungile mutambela wakwatako.
5Co vanu va ku Tekowa vatungile mutambela wakwatako, oloni vantwama va limbo vavyanene kupanga vipangi vije vivavaanene kuli vaka-kupangesa.
6Njoyanda muna Paseya na Meshulame muna Mbesondeya vatungulwile Cikolo ca Njeshana.#3:6 CIKOLO CA NJESHANA: Nambe, Cikolo Calaja. Vakevo vaakele mikambo na vikolo mu myela yavyo, co vaakele tupateso na mikambo yakupatesa ku cikolo.
7Melatiya wa ku Ngimbiyone, na Njandone wa ku Melonote, na vanalume va ku Ngimbiyone na Mizipa vatungile mutambela wakwatako, kweta na ku njuvo ya nguvulu wa lifuti lya mu Kangombe ka Yambi ka Yufuleti. 8Uziyele muna Halehaya muka-kufula ngolinde, watungile mutambela wakwatako.
Co Hananiya, muka-kupanga mazi akunika lwengo, watungile mutambela wakwatako, nakweta ku Civumbe Cakujanjavala.
9Co Lefaya muna Hule, muka-kushwana litambelo lya lifuti lya Yelusalema, watungile mutambela wakwatako. 10Yendaya muna Halumafe watungile mutambela wakwatako, uje wakele kuyehi na njuvo yendi.
Co Hatushe muna Hashambeneya watungile mutambela wakwatako.
11Malekiya muna Halime, na Hashumbe muna Pahate Mowavi vatungile mutambela wakwatako, na Kaposhi ka Lutengo.
12Shalume muna Haloheshe, muka-kushwana mutambela ukwavo wa Yelusalema, watungile mutambela wakwatako. (Vana vendi va vanakazi vamukwasele cipangi eci.)
13Hanune na vandambo va mu nganda ya Zanowa vatungulwile mutambela wa ku Cikolo ca ku Cana, vaakele vikolo mu myela yavyo, co vaakele tupateso na mikambo yakupatesa ku cikolo, co vatungulwile civumbe cakweta ku mamita 440, kweta ku Cikolo ca Vyuma vya Mazilo. 14Malekiya muna Lekave, muka-kushwana lifuti lya Mbete Hakeleme, watungulwile Cikolo ca Vyuma vya Mazilo. Co waakele vikolo mu myela yavyo, waakele tupateso na mikambo yakupatesa ku cikolo. 15Shalume muna Kolehoze, muka-kushwana lifuti lya Mizipa, watungulwile Cikolo ca Lisima. Co wacishokele, waakele vikolo mu myela yavyo, waakele tupateso na mikambo yakupatesa ku cikolo. Co ku Lishali lya Shela watungilileko civumbe cakwata ku lihya lya vumwene, nakweta ku vindendelo vyakushelumukila ku Nganda ya Ndaviti.
16Nehemiya muna Azembuke, muka-kushwana mutambela wa Lifuti lya Mbetezule, watungile mutambela wakwatako, nakweta ku mbumbo ya Ndaviti, na ku lishali lyakwinda, na ku vinjuvo vya mashwalale.
VaLevi vaje vapangele ku civumbe
17VaLevi ava vatungulwile mitambela yaingi ya civumbe yakwatako. Lehume muna Mbani watungile mutambela wakwatako, Hashaviya, muka-kushwana mutambela wa lifuti lya Keila, watungile mutambela wakwatako mukwimanena lifuti lyendi.
18Mbavai muna Henandande, muka-kushwana mutambela ukwavo wa lifuti lya Keila, watungile mutambela wakwatako.
19Ezele muna Njeshuwa, muka-kushwana ku Mizipa, watungile mutambela wakwatako kulutwe lwa njuvo ya vitwa, kweta na ku mwela kuje kucazingulukile civumbe.
20Mbaluke muna Zavai watungile mutambela wakwatako, nakweta ku vukovelelo vwa njuvo ya Elyashimbe Muka-kukombelela Wakama.
21Melemote, muna Uliya mutekulu wa Hakoze, watungile mutambela wakwatako, kweta na ku shongo ya njuvo ya Elyashimbe.
Vaka-kukombelela vaje vapangele ku civumbe
22Vaka-kukombelela ava vakevo vatungulwile mitambela yaingi ya civumbe.
Vaka-kukombelela va mu mitambela yazengelekele Yelusalema vatungile mutambela wakwatako.
23Mbenjemani na Hashumbe vatungile mutambela wakwatako, uje wakele kulutwe lwa vinjuvo vyavo.
Co Azaliya, muna Maseya mutekulu wa Ananiya, watungile mutambela wakwatako, uje wakele kulutwe lwa njuvo yendi.
24Mbinui muna Henandande watungile mutambela wakwatako, kutunda ku njuvo ya Azaliya nakweta ku mbango ya civumbe.
25Palali muna Uzai watungile mutambela wakwatako, kushangumukila ku mbango ya ku civumbe na ku kaposhi ka kwilu ku lipela kuyehi na cipango ca vaka-kunyunga.
Pendaya muna Paloshe watungile mutambela wakwatako, kushungama mu ngangela kuyehi na Cikolo ca Mema na kaposhi ka vaka-kunyunga Njuvo ya Shukulu Kalunga.
26Evi vyakele kuyehi na mutambela wa nganda uje vatumbwile Ofele, kuje kuvakele vaka-kupanga ku Njuvo ya Shukulu Kalunga.
Vaka-kutunga vakwavo
27Vanu va ku Tekowa vatungile mutambela wakwatako, uje wapwile wamucivali, wakulishungama na kaposhi kakama kakunyunga ku Njuvo ya Shukulu Kalunga nakweta kuyehi na civumbe ca Ofele.
28Mbunga ya vaka-kukombelela vatungile mutambela wakwatako, uje wakengeselele ku kunto ku Cikolo ca Tuvalu, co munu na munu wakele nakutungila kulutwe lwa njuvo yendi.
29Zandoke muna Imeli watungile mutambela wakwatako, uje wakele kulutwe lwa njuvo yendi.
Shemaya muna Shekaniya, muka-kunyunga Cikolo ca mu ngangela, watungile mutambela wakwatako. 30Hananiya muna Shelemiya, na Hanune muna Zalafe wamucitanu na umo, vatungile mutambela wakwatako, wapwile mutambela wavo wamucivali. Meshulame muna Mbelekiya watungile mutambela wakwatako, uje wakele kulutwe lwa njuvo yendi.
31Malekiya, muka-kufula ngolinde, watungile mutambela wakwatako, nakweta ku njuvo ije vakele nakupangesa vaka-kupanga na vaka-kulandulula, uje wakele ku Cikolo ca Mifikande kuyehi na mulili uje wa akamwa ku mbango ya civumbe ca ku kunto ya ngangela.
32Vaka-kufula ngolinde na vaka-kulandulula vatungile mutambela wakumanesela, kutunda ku mulili wa ku mbango nakweta ku Cikolo ca Vimanga.
The Bible in Mbunda ©The Bible Society of Zambia, 2006