Mako 9

1Co wendekele lalo ngwendi, “Mwa vushunga njimileka ngwange, kuvali vamo kuno vaje kuvakatsi kuvanga vanamono Vumwene vwa Njambi vunaija na nzili.”

Kulimuka kwa Yesu

(Mateo 17:1-13; Luka 9:28-36)

2 # 2 Pet 1:17-18 Co omo kwetile matangwa atanu na limo, Yesu waile amo na Petulu na Yakomba na Yowano, co wavatwamenenene kulamata akamwa ya munkinda waulaja kwavo lika. Co omo vamukengele wemukile mweka ku mesho avo, 3Asinoni vuzalo vwendi vwatokele too ngwe ceke, naumo munu wa ano a kaye asa kuvukusha nakuvutokesa ngacije wai. 4Asinoni vaje vandongisi vatatu vamwene Elinja na Mosesa valinakusimutwiya na Yesu. 5Co Petulu wendekele kuli Yesu ngwendi, “Mulongisi, mwamuvwa kuli yetu kukala kuno! Co tutunga mambalanda atatu, limo lyove, limo lya Mosesa, co limo lya Elinja.” 6Ikeye amo na vakwavo vakele manene na lyova ngeci kazivukile vika napande kwendeka.

7 # Mat 3:17; Mak 1:11; Luk 3:22 Asinoni lishelwa lyezile nakuvafwika, co lijwi lyatundile mu lishelwa lyendekele kuli vakevo ngwalyo, “Ou ikeye Munange injazema, mutolilileni!” 8Aje vene vakengezekele noku-noku oloni kuvamwene munu weka wai, kuvanga Yesu lika wakele amo navo.

9Co omo vatundile ku munkinda, Yesu wavasin̄ikile ngwendi, “Kesi mukalekeko munu umo a vyuma evi munamono, noo Muna Munu nasanguka ku vatsi.”

10Ngecivene, vononokele lishiko lyendi, oloni akati kavo vashangumukile kulikanangana a n̄anda eyi ngwavo, “Oku ‘kusanguka ku vatsi’ kunalumbunuka vika?” 11#Mal 4:5; Mat 11:14 Co vehwile Yesu ngwavo, “Omwo vikajo valongisi va majwi a Lishiko vakendeka ngwavo Elinja napande kwija akulivanga?”

12Co Yesu wavakumbulwile ngwendi, “Elinja napande kwija akulivanga mukuvwaesela cimweja vyuma vyoshe. Oloni omwo vikajo visoneka vyendeka ngwavyo Muna Munu akayanda manene, co vakamuvyana? 13Oloni njimileka ngwange Elinja naija laja, co vanu vamulingile mwoshe muvashakelele, ngwe visoneka muvyendekele ali ikeye.”

Yesu akangwisa mukwenje uje wakele na munzinzime wakujwala

(Mateo 17:14-21; Luka 9:37-43a)

14Omo vezile kuli vandongisi vaje vasalele, vamwene mbunga yakama yavazengelekele, co vamo valongisi va majwi a Lishiko vavazengelekele nakulinga navo vimata. 15Omo vanu vamwene Yesu, valikomokelele manene, co vashatukilile kuli ikeye nakumukandelela. 16Co Yesu wehwile vandongisi vendi ngwendi, “Vimata vya vika mulinakulinga navo?”

17Co munalume umo wa akati ka mbunga ije wamukumbulwile ngwendi, “Mulongisi, njinanena munange kuli yove, omwo ali na munzinzime wakujwala, co kasa kwendeka. 18Co oshe aje aumuwanena munzinzime wakujwala, umuwisila asi, co atutumuna lifulu ku kanwa, nakulitsakinya ku mayo, co ashinuka woshe ngo. Co njalombele vandongisi vove ngwange vamutundise munzinzime wakujwala, oloni kuvaasele.”

19Co Yesu wendekele kuli vakevo ngwendi, “Yeni vaka-kujeneka kukulaela! Visimbu vingaijo njikakala neni? Visimbu vingaijo njinapande kuyanda omwo yeni? Neneni owo mukwenje kuno kuli yange!” 20Co vamunenele kuli Yesu.

Vwasi-vwasi omo uje munzinzime wakujwala wamwene Yesu, aje vene wapindisile uje mwanike manene, ngecivene, wawililile asi nakulimbondinga, nakututumuna lifulu ku kanwa. 21Co Yesu wehwile ishe ngwendi, “Simbu mukajo washangumukile?”

Co wamukumbulwile ngwendi, “Tunde kuvwanike vwendi. 22Co visimbu vyavingi ou munzinzime wakujwala ukashaka kumutsiya akumuwisila mu tuhya na mu mema. Tuzivileko mema ku mbunge nakutukwasa, nga wasa!”

23Co Yesu wamulekele ngwendi, “Eyo, nga yove vavenya wasa! Vyuma vyoshe vyasa kulingiwa kuli uje akulaela.”

24Aje vene ishe ya uje mwanike watambekele ngwendi, “Yange njinakulaela, oloni kesi manene. Njikwaseko ngeci njikulaele manene!”

25Co omo Yesu wamwene ngeci mbunga ije yakele nakumusindakana, ngecivene, washikile uje munzinzime wakujwala ngwendi, “Ove munzinzime wakujwala wa vusinda-matwi na vuveveve, njikushika ngwange tundamo muli ou mukwenje kesi ukelukile muli ikeye lalo!”

26Co uje munzinzime wakujwala watambekele manene, wawisile mwanike mwamuvi manene, co wamutundile. Mwanike wapwile ngwe civimbi, ngecivene, vanu vendekele ngwavo, “Natsi vene!” 27Oloni Yesu wamukwatele ku livoko nakumwindula, co wemanene.

28Co omo Yesu wakovelele mu njuvo, vandongisi vendi vamwihwile mu vushweke ngwavo, “Omwo vika yetu kutwasele kutundisa uje munzinzime wakujwala?”

29Co Yesu wavakumbulwile ngwendi, “Kuvanga malombelo lika asa kutundisa munzinzime wakujwala wa cifwa eci, kukwesi cuma ceka lalo cai.”

Yesu endeka lalo a kutsa kwendi

(Mateo 17:22-23; Luka 9:43b-45)

30Yesu na vandongisi vendi vatundile ku mutambela uje, co vaile vatuvakanene mu Ngalileya. Yesu kashakele ngeci vanu vazivuke kuje kwakele, 31omwo wakele nakulongesa vandongisi vendi ngwendi, “Muna Munu ololo vamwana ku mavoko a vanu, co vakamutsiya. Oloni omo kuneti matangwa atatu, akasanguka.”

32Oloni kuvazivukile kulumbunuka kwa vilongesa evi, co vakele na lyova lyakumwihula.

Uje napu wakama kutuvakana

(Mateo 18:1-5; Luka 9:46-48)

33Co vetele ku Kapenauma, omo vakovelele mu njuvo Yesu wehwile vandongisi vendi ngwendi, “Vika mwakele na kulikanangana a ngila?”

34 # Luk 22:24 Oloni kuvamukumbulwile, omwo vakele nakulikanangana akati kavo ngwavo iya napu wakama. 35#Mat 20:26-27; 23:11; Mak 10:43-44; Luk 22:26 Co Yesu watumbamene asi, co wasanene vaje vandongisi likumi na vavali, wendekele kuli vakevo ngwendi, “Nga munu ashaka kulipwisa wakama napande kulipwisa ikeye vavenya wamundondo mu vyoshe, co lalo apwe ngamba ya voshe.” 36Co Yesu wakwatele mwanike wamundondo wamwimikile kulutwe lwavo. Co wamuvumbatelele wendekele ngwendi, 37#Mat 10:40; Luk 10:16; Yow 13:20 “Woshe atambula mwanike umo wamundondo ngwe ou mu lizina lyange, natambula yange vene, woshe uje anjitambula, katambwile yange lika, oloni natambula uje wanjitumine.”

Woshe uje katulwisa ali amo netu

(Luka 9:49-50)

38Yowano wendekele ngwendi, “Mulongisi, twamwene munalume umo wakele nakutundisa minzinzime yakujwala mu lizina lyove, co twamulekele ngeci alikele, omwo ikeye kesi wa mu munga yetu embwe.”

39Oloni Yesu wavalekele ngwendi, “Kesi mweseke kumuvindika embwe, omwo naumo wai alinga vizivukiso mu lizina lyange asa kwendeka vwasi vyuma vyavivi ali yange. 40#Mat 12:30; Luk 11:23 Omwo woshe uje katulwisa ali amo netu. 41#Mat 10:42 Mwa vushunga njimileka ngwange munu woshe uje amyana mema akunwa omwo yeni mwakundama kuli yange mwa vushunga vene akatambula cikandelela cendi.

Vyeseko vyakutwala ku vuvi

(Mateo 18:6-9; Luka 17:1-2)

42“Nga munu umo atanganesa mwanike wamundondo ngeci kesi akulaele kuli yange, mwamuvwa munu wangacije kumukutiiya limanya lyakama lyakulolela vunga mu mukoshi wendi nakumumbila mu mema a kalunga. 43#Mat 5:30 Co nga livoko lyove likutanukisa ngeci uzimbalese kukulaela kwove, livatuleko! Mwamuvwa kuli yove kukovela mu mwonyo wa myaka yoshe na livoko limo kutuvakana kukala na mavoko oshe avali ngeci vakumbile mu tuhya twa myaka yoshe tuje kutwesi kuzima. 44Muje mainyo amwo aje alinakuvalya kuwesi kutsa, na tuhya tuje tuvenyeka kutwesi kuzima.#9:44 MUJE MAINYO AMWO...KUTWESI KUZIMA: Kunungulula kumo vesi 44 yaimo. 45Co nga lindi lyove likutanukisa ngeci uzimbalese kukulaela kwove, livatuleko! Mwamuvwa kuli yove kukovela mu mwonyo wa myaka yoshe na lindi limo kutuvakana kukala na mendi avali ngeci vakumbile mu tuhya twa myaka yoshe tuje kutwesi kuzima. 46Muje mainyo amwo aje alinakuvalya kuwesi kutsa, na tuhya tuje tuvenyeka kutwesi kuzima.#9:46 MUJE MAINYO AMWO...KUTWESI KUZIMA: Kunungulula kumo vesi 46 yaimo. 47#Mat 5:29 Co nga lisho lyove likutanukisa ngeci uzimbalese kukulaela kwove, licakuvulemo! Mwamuvwa kuli yove kukovela mu Vumwene vwa Njambi na lisho limo kutuvakana kukala na mesho oshe avali ngeci vakumbile mu tuhya twa myaka yoshe tuje kutwesi kuzima. 48#Isa 66:24 Muje mainyo amwo aje alinakuvalya kuwesi kutsa, na tuhya tuje tuvenyeka kutwesi kuzima.

49“Omwo munu woshe vakamujelesa na tuhya ngwe muvakajelesa n̄ombelo na mwongwa.

50 # Mat 5:13; Luk 14:34-35 “Mwongwa wapwa wauvwa, oloni nga ushamuka, utovala vatijo?

“Co kaleni na mwongwa wa vusamba vwa kulitombola akati keni, kaleni mu kwoloka umo na mukwavo.”

Currently Selected:

Mako 9: MBB

Highlight

Compare

Copy