Mako 10
10
Yesu alongesa a kutsiya vulo
(Mateo 19:1-12; Luka 16:18)
1Asinoni Yesu watundile ku mutambela uje, waile ku lifuti lya Yundeya, co wajavukile waile musambwa ya Ndonga ya Yondau. Co mbunga yakama ya vanu vezile lalo kuli ikeye, co wavalongesele, ngwe cilika cendi.
2Co vaFaliseo vamo vezile kuli ikeye nakumweseka vamwihwile ngwavo, “Tuleke, kuma Lishiko lyetu litavesa munalume kukondola munakazi wendi ndi?”
3Yesu wavakumbulwile ngwendi, “Lishiko muka lyamyanene Mosesa?”
4 #
Kwi 24:1-4; Mat 5:31 Vamukumbulwile ngwavo, “Mosesa watavele munalume kusonekela munakazi wendi mukanda wakutsiya vulo nakumukondola.”
5Oloni Yesu wendekele ngwendi, “Mosesa wasonekele lishiko eli kuli yeni omwo kukaluwa kwa vimbunge vyeni. 6#Kus 1:27; 5:2 Oloni akushangumuka, a simbu yakutanga, ‘Njambi wavatangele munalume na munakazi,’ ngwe muvyendeka visoneka. 7#Kus 2:24 ‘Co omwo a cuma eci, munalume akaseza ishe na vaina nakulikumbasana na munakazi wendi,#10:7 NAKULIKUMBASANA NA MUNAKAZI WENDI: Kunungulula kumo majwi awa aimo. 8co vakapwa muvila umolika.’ Ngecivene, kuvakapu lalo vavali, oloni vakapwa muvila umo. 9Ngecivene, vaje vaanakumbasana Njambi munu kesi avaangunune.”
10Co omo velukile mu njuvo, vandongisi vehwile Yesu a vin̄anda evi. 11#Mat 5:32; 1 Koli 7:10-11 Co wendekele kuli vakevo ngwendi, “Woshe munalume akondola munakazi wendi nakwambata munakazi weka nalingi vupangala. 12Co mu cifwa cimo vene, nga munakazi atunda kuli munalume wendi nakushomboka kuli munalume weka, nalingi vupangala.”
Yesu avezikisa vanike vamo vavandondo
(Mateo 19:13-15; Luka 18:15-17)
13Co vanu vamo vamunenelele vanike vavandondo ngeci avakambeke mavoko, oloni vandongisi vendi vavavindikile. 14Oloni omo Yesu wacimwene, waluvalele wendekele kuli vandongisi vendi ngwendi, “Eceleni vanike vavandondo vaije kuli yange kesi muvavindike, omwo Vumwene vwa Njambi vunapu vwavo. 15#Mat 18:3 Mwa vushunga njimileka ngwange woshe katambula Vumwene vwa Njambi ngwe mwanike wamundondo, kakakovelamo.” 16Asinoni wavajundwile, wavakambekele mavoko umo na umo, co wavavezikisile.
Munalume wakufuka
(Mateo 19:16-30; Luka 18:18-30)
17Co omo Yesu washangumukile lalo vungenzi vwendi, co munalume umo wamushatukilile, watsikamene a mavuli ku mesho endi, co wamwihwile ngwendi, “Mulongisi wamuvwa, vika njinapande kulinga ngeci njitambule mwonyo wa myaka yoshe?”
18Co Yesu wamukumbulwile ngwendi, “Vika unjitumbwila ngwove njiwamuvwa? Naumo wai wamuvwa kuvanga Njambi lika. 19#Kut 20:12-16; Kwi 5:16-20 Yove uzivuka mashiko ngwawo, ‘Kesi utsiye, kesi ulinge vupangala, kesi ukaive, kesi ukavangele mukweni vukaleo vwa makuli, kesi ukwise, singimika isho na vanyoko.’ ”
20Co uje munalume wamukumbulwile ngwendi, “Mulongisi, mashiko oshe awa njawononoka laja tunde kuvukwenje vwange.”
21Co Yesu wamukengele na cizemo, co wendekele kuli ikye ngwendi, “Cuma cimolika cinasalako. Ya ukalandese vyoshe ulinavyo co ukaane vimbongo ku tuutu, co ukakala na vufuko mwilu, asinoni wije unjikave.” 22Omo uje munalume wazivile lijwi eli, co wombwele, co waile na vusiwa, omwo wakele na vufuko vwavungi.
23Co Yesu wakengele kuli vandongisi vendi, co wendekele ngwendi, “Cinapu cacikalu kuli vaka-kufuka kukovela mu Vumwene vwa Njambi!”
24Co vandongisi valikomokelele ku majwi awa, oloni Yesu wendekele lalo ngwendi, “Vana vange, cinapu cacikalu kukovela mu Vumwene vwa Njambi! 25Cinapu cacikalu manene kuli munu muka-kufuka kukakovela mu Vumwene vwa Njambi, kuhyana kamelo kwita mu lisho lya nguya.”
26Co vandongisi vendi valikomokelele omo vazivile vyuma evi, co valihozwele umo na mukwavo ngwavo, “Iyajo asa kwovoka?”
27Yesu wavakengele shwii, co wavakumbulwile ngwendi, “Eci cinakaluwa lika kuli vanu, oloni kuli Njambi vyuma vyoshe vyavyasi.”
28Petulu wendekele ngwendi, “Kenga, yetu tunaseza vyuma vyoshe, co tunakukava.”
29Yesu wendekele kuli vakevo ngwendi, “Eyo, mwa vushunga njimileka ngwange woshe uje naseza limbo lyendi, nambe vandolome vendi, nambe vandokazi vendi, nambe vaina, nambe ishe, nambe vana vendi, nambe mahya endi, omwo yange, nambe omwo Vin̄anda Vyavivwa, 30akatambula vyavingi manene a simbu eyi vene. Akatambula kutuvakana 100 vinjuvo, na vandolome, na vandokazi, na vaina, na vana, na mahya, na tuyando, co a simbu ije ikaija akatambula mwonyo wa myaka yoshe. 31Oloni vaka-kulivanga vavangi vakapwa vaka-kukotokela, co vaka-kukotokela vavangi vakapwa vaka-kulivanga.”
Yesu endeka simbu yamucitatu a kutsa kwendi
(Mateo 20:17-19; Luka 18:31-34)
32Co Yesu na vandongisi vendi vakele nakulamata mu ngila yakuya ku Yelusalema. Co Yesu watwamene kulutwe lwa vandongisi vendi, co valikomokelele, co vanu vaje vamukavele munima yavo vazivile lyova. Co Yesu lalo watwalele vandongisi vendi likumi na vavali kwavo lika wavalekele vyuma vije vikalingiwa kuli ikeye. 33Wendekele ngwendi, “Tolilileni, tulinakulamata nakuya ku Yelusalema, co Muna Munu vakamwana ku mavoko a vakulunu va vaka-kukombelela na kuli valongisi va majwi a Lishiko. Co vakamuhisa nakumutwala ku kutsa, co vakamwana kuli vaka-kujeneka kukulaela, 34co vakamushendumuna, nakumujekwila mate, nakumupupa, co vakamutsiya, oloni omo kuneti matangwa atatu akasanguka.”
Cihula ca Yakomba na Yowano
(Mateo 20:20-28)
35Asinoni Yakomba na Yowano, vana va Zembendeo, vezile kuli Yesu. Co vendekele ngwavo, “Mulongisi, kuli cuma cimo tushaka ngeci utulingileco.”
36Co Yesu wavehwile ngwendi, “Vika mushaka ngeci njimilingilevyo?”
37Co vamukumbulwile ngwavo, “Omo ukatumbama a litanda lyove mu Vumwene vwove vwa vumpau, tushaka ututave tukatumbame amo nove, umo ku cilyo mukwavo ku cimoshwe.”
38Oloni Yesu wendekele kuli vakevo ngwendi, “Kumuzivuka eci cuma cimunalombo. Kuma mwasa kunwa nganja ya kayando ije injikanwa ndi? Nambe kuma mwasa kumimbwitika nakumbwitika kuje vakanjimbwitika nakwo yange ndi?”
39Co vamukumbulwile ngwavo, “Twasa.”
Yesu wendekele kuli vakevo ngwendi, “Mwa vushunga mukanwa mu nganja yange, co vakamimbwitika nakumbwitika kuje vakanjimbwitika nakwo yange. 40Oloni nzili yakwangula uje akatumbama ku livoko lyange lya cilyo, nambe lya cimoshwe kunjesi nayo. Co myela eyi inapu ya vaje Njambi wavavwaeseleleyo laja.”
41Omo vaje vandongisi vakwavo likumi vazivile majwi awa, valuvalele na Yakomba na Yowano. 42Ngecivene, Yesu wavasanene voshe vaije kuli ikeye, co wavalekele ngwendi, “Mwazivuka ngweni vanu vaje valiyongola ngwavo vanapu vaka-kushwana va vanu vaje kesi vaka-kukulaela vali na nzili ali vanu vavo, co na vantwama vavo vali na moko yakama ali vakevo. 43Oloni, eyi kesi ikeyo ngila akati keni embwe. Nga umo weni ashaka kupwa wakama, ikeye napande kupwa ngamba ya vakwavo voshe, 44co nga umo weni ashaka apwe wakulivanga akati keni, ikeye napande kupwa ndungo ya vakwavo voshe. 45Omwo Muna Munu wezile, kezile ngeci vanu vamupangele embwe, oloni wezile mukupanga nakwana mwonyo wendi ngeci apatule vanu vavangi.”
Yesu atonesa mesho a kapuputwa Mbatimeo
(Mateo 20:29-34; Luka 18:35-43)
46Co vezile ku Yeliko, omo Yesu watundile kuje amo na vandongisi vendi na mbunga ya vanu vavangi, kapuputwa umo muka-kulomba vwana lizina lyendi Mbatimeo muna Timeo watumbamene kumukulo wa ngila. 47Omo wazivile Yesu wa ku Nazaleta, washangumukile kutambeka ngwendi, “Yesu! Muna Ndaviti! Njizivileko mema ku mbunge!”
48Co ije mbunga ya vanu vamuvindikile ngeci oloke kuluu. Oloni ikeye watambekele manene-nene ngwendi, “Ove Muna Ndaviti, njizivileko mema ku mbunge!”
49Co Yesu wemanene wavalekele ngwendi, “Musaneni.”
Ngecivene, vamusanene uje munalume wakapuputwa. Vendekele ngwavo, “Simpa! Katuka nakusana.”
50Co wombilile cikoveyo cendi, walupukile, co wezile kuli Yesu.
51Co Yesu wamwihwile ngwendi, “Vika ushaka njikulingilevyo?”
Co uje kapuputwa wamukumbulwile ngwendi, “Mulongisi, njishaka ngeci njimone lalo.”
52Co Yesu wamulekele ngwendi, “Ya, omwo kukulaela kwove kunakukangwisa.”
Co aje vene watonene, co wakavele Yesu mu ngila.
Currently Selected:
Mako 10: MBB
Highlight
Share
Compare
Copy
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006
