Mako 16
16
Kusanguka kwa Yesu
(Mateo 28:1-8; Luka 24:1-12; Yowano 20:1-10)
1Omo Litangwa Lyakuhwima lineti, Maliya Mandalena, na Maliya vaina ya Yakomba, na Salome valandele n̄undu ngeci vaye nakukavwavesa muvila wa Yesu. 2Co a mungulungengu a litangwa lya Calumingo, mutondo, vaile ku mbumbo. 3Co a ngila valihozwele umo na mukwavo ngwavo, “Iya akatutundisilako limanya ku cikolo ca mbumbo?” (Lyapwile limanya lyakama manene.) 4Asinoni vakengele kulutwe, vamwene ngeci limanya vanalitundisako laja ku cikolo. 5Ngecivene, vakovelele mu mbumbo, vamwene munalume natumbama ku cilyo, nazala cikoveyo cacilaja cakutoka, co valikomokelele manene.
6Co wendekele navo ngwendi, “Kesi mulikomokele, njazivuka ngeci mushakezeka Yesu wa ku Nazaleta, uje ivashukikile a cilindakano. Nasanguka, waimo muno! Kengeni, omu mukemwo mu mwela muvamulangekele. 7Oloni mukalekeko vandongisi vendi, na Petulu lalo ngweni, ‘Nai laja kulutwe ku Ngalileya, kuje vene kukekwo mukamumwena, ngwe muje mwamilekele.’ ”
8Ngecivene, vatuukilemo, co vashatukile kutunda ku mbumbo, vazivile lyova nakujaja. Co kuvambulwile ku munu naumo wai, omwo vazivile lyova.
MAMANESELELO ALAJA A VIN̄ANDA VYAVIVWA#16:8 MAMANESELELO ALAJA A VIN̄ANDA VYAVIVWA: Kunungulula kumo mamaneselelo awa alaja a Vin̄anda Vyavivwa aimo (vesi 9-20).
Yesu alishololo kuli Maliya Mandalena
(Mateo 28:9-10; Yowano 20:11-18)
[ 9Omo Yesu wasangukile a mungulungengu a litangwa lya Calumingo, walisholwele akulivanga kuli Maliya Mandalena, uje yatundisile minzinzime yakujwala itanu na ivali. 10Waile nakulekako vaje vakwavo vakele na Yesu. Vakele na vusiwa nakulila, 11co omo vazivile ngwavo Yesu alinakuyoya ngwendi ikeye vene namumono, kuvamukulaelele.
Yesu alisholola kuli vandongisi vendi vavali
(Luka 24:13-35)
12Munima ya vyuma evi, Yesu walisholwele mu cifwa ceka kuli vaje vavali omo vakele nakuya vungenzi vwavo. 13Co velukile lalo nakukalekako vakwavo, oloni vakevo kuvakulaelele.
Yesu alisholola kuli vaje likumi na umo
(Mateo 28:16-20; Luka 24:36-49; Yowano 20:19-23; Vilinga vya Miluwa 1:6-8)
14Akukotoka, Yesu walisholwele kuli vandongisi likumi na umo omo vakele nakulya. Co wavaluvalesele, omwo kuvakulaelele, nomwo vakaluwisile vimbunge vyavo omwo kuvakulaelele vaje vamumwene omo wasangukile. 15Co wendekele kuli vakevo ngwendi, “Yeni ku mafuti oshe a ano a kaye nakwambulula Vin̄anda Vyavivwa kuli vanu voshe. 16Woshe uje akulaela nakumumbwitika akovoka, oloni woshe uje kakulaela vakamuhisa. 17Co vaka-kukulaela vakavana nzili yakulinga vizivukiso, co vakatundisa minzinzime yakujwala mu lizina lyange, vakendeka vindaka vyaviha, 18Vakakwata manyoka, co nambe nga vakanwa vyuma vya vushungu, kuvikavavulumuna, vakakambeka mavoko avo ali vaka-kuvinja, co vakenduka.”
Yesu vamutwala mwilu
(Luka 24:50-53; Vilinga vya Miluwa 1:9-11)
19Ngecivene, omo Mwene Yesu wamanesele kwendeka navo, co vamutwalele mwilu, co watumbamene ku livoko lya cilyo lya Njambi. 20Vandongisi vaile nakwambulula kwoshe, co Mwene wapangele amo navo nakushulisa ngeci kwambulula kwavo kwapwile kwa vushunga a vizivukiso vije vyalingiwile.]
MAMANESELELO AKWAVO ALAJA#16:20 MAMANESELELO AKWAVO ALAJA: Kunungulula kumo muli mamaneselelo awa alaja kuwezelela ku mamaneselelo aje akwavo (vesi 9-20).
[ 9 Vanakazi vaile kuli Petulu na vasamba vendi, co vavalekele vukaleo vwa vyuma vyoshe vije vavalekele. 10 Munima yevi, Yesu ikeye vavenya watumine vandongisi vendi kutunda mu ngangela kutwala mu kangombe ka yambi ngeci vatwale lijwi lyakujela lyakwovoka kwa myaka yoshe.]
Currently Selected:
Mako 16: MBB
Highlight
Share
Copy
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006