Luka Cizivukiso
Cizivukiso
Cizemo ca Njambi capwa ca kuli vanu voshe! Yesu wezile muno mu kaye kupwa Muyoyesi wa vanu voshe! Evi vikevyo viyongola vivali vyakama vili omu mu livulu. Vin̄anda vyavingi Vyavivwa vya cindambo vije vyapangesele Yesu mukulongesa a cizemo ca Njambi tuviwana lika mu Vin̄anda Vyavivwa vyasonekele Luka ngeci mwa kaSamaliya wamuvwa (10:25-37), manga wakuzimbala (15:1-7) na mwana wakuzimbala (15:11-32). Kuvanga Luka lika ikeye endeka muje mwaile Yesu kwimbo lya uje muka-kutambula lisimu ivazindile (19:1-10) na Yesu muje mwakulaesele mwonyo mu Vumwene vwa Njambi kuli uje lipwepwe watsile a cilindakano (23:39-43).
Luka endeka vya Munzinzime wa Njambi lwalungi kutuvakana vaka-kusoneka veka va mu Lizivasano Lyaliha. Cimwesa nzili ya Munzinzime Wakujela ije yapangele muli Yowano Muka-kumbwitika tunde a simbu yakusemuka kwendi (1:15). Co kangelo wakulaesele Maliya ngwendi, “Munzinzime Wakujela akaija ali yove, ngecivene, munove vakamutumbula Mwana wakujela wa Njambi (1:35).” Yesu wakavangeyeye Munzinzime (4:1,14, 18, 10:21). Co walongesele ngeci Munzinzime wapwa vwana vwakama manene vwa Njambi (11:13).
Luka amwesa muje muyapwile seo ya lilombelo kuli Yesu. Yesu walombelele lwalungi, omo vanamumbwitika laja (3:21), omo kanda aangule vandongisi (6:12), omo kanda ehule vandongisi vendi ngeci ikeye wapwile iya (9:18), omo kanda atule mwonyo wendi a cilindakano (23:34,45). Tulilongesa vya mizimbu itatu kuli Luka ije yendekele Yesu mukulongesaa vya a lilombelo (11:5-9, 18:1-8, 9-14).
Mutambela wa seo wa vin̄anda vya Luka wapwa ngila muje mwanamwesela Yesu kumba mbunge ku tuutu, Vin̄anda Vyavivwa vavyambulula kuli vakevo (4:18, 7:22), vatambula vivezikiso vya Njambi (6:20), vanavalanya ku ciwano (14:13, 21), kautu Lazalu vamwambata tungelo kumutwala kwilu (16:20,22), co Yesu ashika vandongisi vendi kulandesa vije vivalinavyo, co nakwana vimbongo ku tuutu (12:33).
Mwa vushunga vaka-kulava vanapande kuzivuka ngeci Yesu wasangukile ku vatsi wamutunu. Luka aana muzimbu ngeci Yesu uje wasangukile walile mbazuvwila ya isi (24:42, 43). Kukwakele citanga kukusanguka kwa Yesu, kapwile ndumba ya munu. Muvila wendi uje wasangukile nawo ku vatsi wapwile muvila vene, co kesi viyongola vya munu embwe. Luka wasonekele lalo livulu likwavo lya Vilinga vya Miluwa, mukumwesa vije vyalingiwile kuli vandongisi va Yesu omo nasanguka laja nakulonda mwilu, kukwesi Vin̄anda Vyavivwa vyeka vili mu livulu lyamucivali mukuwezelela kutuvakana evi, vyai.
Luka ashoka eli livulu lyakulivanga lyasonekele mukuleka ngeci Yesu welukile mwilu. Oloni omo Yesu kanda aciye laja, washikile vandongisi vendi.
Vanasoneka ngwavo Wakuvwavesa napande kuyanda, asinoni munima ya matangwa atatu akasanguka ku vatsi. Endeka lalo ngeci vanu va miyati yoshe vavambulwile mu lizina lyendi ngeci vatengulukile kuli Njambi, ngeci vavasambese. Ngecivene, kushangumukila mu Yelusalema vanapande kwambulula vyuma vyoshe vije vinalingiwa.
Kulumbununa vyuma vili mu livulu
Vika Luka wasonekelele eli livulu 1:1-4
Kusemuka kwa Yowano Muka-kumbwitika nakusemuka kwa Yesu 1:5–2:52
Muzimbu wa Yowano Muka-kumbwitika 3:1-20
Kumbwitika kwa Yesu na vyeseko vyendi 3:21–4:13
Vipangi vya Yesu mu Ngalileya 4:14–9:50
Yesu aya ku Yelusalema kutunda ku Ngalileya 9:51–19:27
Simano yakumaneselela ya vyeseko vyendi na kutsa kwendi 19:28–23:56
Yesu ayoya 24:1-12
Yesu alisholola, co vamutwala mwilu 24:13-53
Currently Selected:
Luka Cizivukiso: MBB
Highlight
Share
Copy
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006