Mika 3
3
Mika avayesa vantwama va vaIsalele
1Tolilileni yeni vaka-kushwana va Isalele! Munapande kuzivuka vushunga, 2oloni mwazinda vije vyavivwa nakuzema vije vyavivi. Mujuva vanu vange oku vaciyoya nakuvajamozola mishuni a vitsiya vyavo. 3Mulya situ ya vanu vange. Mujuva cikonde cavo, mupokozola vitsiya vyavo vipazu-vipazu, nakuviteleka ngwe situ ya mu ndeo. 4Simbu ilinakwija omo mukalilila kuli Shukulu Kalunga, oloni kakamikumbulula, kakatolilila ku malombelo eni, omwo munalingi vuvi.
5Vanu vange vanavakwisa kuli vaka-kwimanena vaje vakulaesa kwoloka kuli vaje vavafweta, oloni vambulula muzimbu wa nzita yakujujwisa kuli vaje vajeneka kuvafweta. Shukulu Kalunga alinakwendeka kuli ava vaka-kwimanena ngwendi, 6Vaka-kwimanena, litangwa lyeni ololo lihwa, litangwa lilinakumitokela. Omwo mulinakutanganesa vanu vange, co kumukakala na vimona vya vuka-kwimanena, co kumukasa kuumikiya cuma cai. 7Vaje vakomikiya vya kulutwe vakashauka akwonwa kumona vivomikiiye. Voshe vakavaya omwo Njambi kakavakumbulula.
8Oloni ngeci mwange, Shukulu Kalunga nanjishulisa na munzinzime wendi na nzili yendi, nakunjana mana a vushunga nakusimpa mukuleka vanu va mu Isalele vuvi vwavo muvwafwa. 9Njitolilileni, yeni vaka-kushwana va Isalele, yeni vaje vazinda vushunga nakutengulukila ku vuvi. 10Mulinakutunga nganda ya Njambi, Yelusalema a luvula lwakulitsiya vushunga. 11Vaka-kushwana nganda vashika na mazika-kanwa, vaka-kukombelela vanungulula Mashiko na fweto, co vaka-kwimanena vambulula vya vuka-kwimanena na vimbongo. Oloni vanajendamena ali Shukulu Kalunga omo vendeka ngwavo, “Shukulu Kalunga ali netu. Nacimo cuma cacivi cai ciija kuli yetu.”
12 #
Njele 26:18
Ngecivene, omwo yeni, Siyone vakailima ngwe lihya, co Yelusalema ikemuka numbo ya vivumbe, na lilundu lya Njuvo ya Shukulu Kalunga likemuka shwata.
Currently Selected:
Mika 3: MBB
Highlight
Copy
Compare
Share
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006
