Mateo 18

Uje napu wakama kutuvakana

(Mako 9:33-37; Luka 9:46-48)

1 # Luk 22:24 A simbu ije vene vandongisi vezile kuli Yesu, co vamwihwile ngwavo, “Iyajo wakama kutuvakana vakwavo mu Vumwene vwa mwilu?”

2Co Yesu wasanene mwanike wamundondo, wamwimikile kulutwe lwavo, 3#Mak 10:15; Luk 18:17 co wendekele kuli vakevo ngwendi, “Mwa vushunga njimileka ngwange, kuvanga mutenguluke nakupwa ngwe vanike vavandondo, kumukakovela mu Vumwene vwa mwilu. 4Woshe alikeesa ngwe mwanike wamundondo, ikeye napu wakama mu Vumwene vwa mwilu kutuvakana vakwavo. 5Woshe atambula mwanike wamundondo ngwe ou mu lizina lyange, co atambula yange vene.

Vyeseko vyakutwala ku vuvi

(Mako 9:42-48; Luka 17:1-2)

6“Nga munu umo atanganesa mwanike wamundondo ngeci kesi akulaele kuli yange, mwamuvwa munu wangacije kumukutiiya limanya lyakama lyakulolela vunga mu mukoshi wendi nakumumbila a nzinga ya mema a kalunga. 7Kayando ka ano a kaye omwo ali vyuma vilinakutanukisa ngeci kesi vakulaele! Vyuma evi simbu yoshe vinapande kulingiwa, oloni kayando ka munu uje avilinga!

8 # Mat 5:30 “Co nga livoko lyove nameme lindi lyove likutanukisa ngeci uzimbalese kukulaela kwove, livatuleko ulyumbile kuti! Mwavuvwa kuli yove kukovela mu mwonyo wa myaka yoshe na livoko limo nameme lindi limo kutuvakana kukala navyo vyoshe ngeci vakumbile mu tuhya twa myaka yoshe tuje kutwesi kuzima. 9#Mat 5:29 Co nga lisho lyove likutanukisa ngeci uzimbalese kukulaela kwove, licakuvulemo ulyumbile kuti! Mwamuvwa kuli yove kukovela mu mwonyo wa myaka yoshe na lisho limo kutuvakana kukala na mesho oshe avali ngeci vakumbile mu tuhya twa myaka yoshe tuje kutwesi kuzima.

Cisimo ca manga wakuzimbala

(Luka 15:3-7)

10“Kengeni ngeci kesi muyengule umo wa ava vavandondo. Omwo njimileka ngwange, simbu yoshe tungelo twavo vali mwilu ku mesho a Tate wa mwilu. 11Omwo Muna Munu wezile mukwamena vaka-kuzimbala.#18:11 OMO MUNA MUNU...VAKA-KUZIMBALA: Kunungulula kumo vesi 11 yaimo.

12“Muyongola vati? Nga munu umo ali na vimanga 100, co azimbalesao umo, kuma kakaseza vaje makumi atanu na awana na vatanu na vawana vaje valinakulila kumukulo wa lilundu aye nakushakezeka uje manga umo nazimbala ndi? 13Co nga namuwana, mwa vushunga njimileka ngwange ikeye akavwaelela manene ali uje nazimbalele kutuvakana vaje makumi atanu na awana na vatanu na vawana vaje kuvazimbalele. 14Ngecivene, kesi cizango ca Ishweni ali mwilu ngeci umo wamundondo akanyonge.

Mukweni uje alinga vuvi

15 # Luk 17:3 “Nga mukweni navulumuna mulonga kuli yove, ya ukamuleke mulonga wendi. Oloni cilinge mu vushweke, muvuvali vweni. Nga akutolilila, unovola mukweni. 16#Kwi 19:15 Oloni nga kakutolilila, lanyako munu weka umo nameme vavali amolika nove, ngeci ‘majwi akapwe vukaleo mutunwa twa vanu vavali nameme vatatu,’ ngwe muvinendeka visoneka. 17Co nga kavatolilila, asinoni ambulula ku cikungulukilo. Co nga avyana kutolilila nameme ku cikungulukilo, mupwiseni ngwe munu uje muka-kujeneka kukulaela nameme ngwe muka-kutambula lisimu.

Kuvindika nakwana moko

18 # Mat 16:19; Yow 20:23 “Mwa vushunga njimileka ngwange, vyuma vyoshe vimukakuta ano asi, na mwilu vakavikuta lalo, co vyuma vyoshe vimukazitula ano asi, vakavizitula lalo mwilu.

19“Co njimileka lalo ngwange, nga muvuvali vweni ano asi mulizivasana a cuma coshe-icoshe cimukalomba, vakamilingilaco kuli Tate wa mwilu. 20Omwo kuje kunangulukila vanu vavali nameme vatatu mu lizina lyange, nange lalo njili akati kavo.”

Cisimo ca ngamba wakujeneka kusambesa

21 # Luk 17:3-4 Asinoni Petulu wezile kuli Yesu wamwihwile ngwendi, “Mwene, nga mukwetu anga acinjivulumwina, visimbu vingaijo njikamusambesa? Visimbu vitanu na vivali ndi?”

22Yesu wamukumbulwile ngwendi, “Kunjikuleka ngwange visimbu vitanu na vivali embwe, oloni visimbu makumi atanu na avali na visimbu vitanu na vivali, 23ngecivene, Vumwene vwa mwilu vunalifu ngwe umo mwene washakele kwilula makongo a vangamba vendi. 24Omo washangumukile kulinga ngeci, umo uje watambwile likongo lya vimbongo vyakupwa 1,000,000 vamunenele kuli ikeye. 25Ngamba uje kafwetele likongo lyendi, ngecivene, mwene washikile ngeci vamulandese apwe ndungo, na munakazi wendi na vana vendi, na vyuma vyoshe vije vyakele navyo, ngeci afwete makongo endi. 26Ngecivene, uje ngamba watsikamene asi ku mesho a mwene ngwendi, ‘Acinjivandameneko tai, co njikakufwetela vyuma vyoshe!’ 27Co mwene wamuzivilile mema ku mbunge, ngecivene, wamusambesele aje makongo endi, co wamwecelele.

28“Oloni ngamba uje vene omo watuukile, waliwanene na mukwavo uje wakele na likongo lyalindondo kuli ikeye. Wamukwatele, co washangumukile kumutikinya a mulivu nakumuleka ngwendi, ‘Fweta likongo lyove!’ 29Ngecivene, uje mukwavo ngamba wawile asi wamulambelelele ngwendi, ‘Acinjivandameko tai, co njikakufweta vyuma vyoshe!’ 30Oloni wavyanene, co wamutwalele nakumwaka mu kamenga noo nafwete lije likongo. 31Omo vaje vakwavo vangamba vamwene cije calingiwile, vazivile manene kuvavala ku vimbunge, co vaile nakwambulula kuli mwene vyoshe vije vyalingiwile. 32Ngecivene, uje mwene wasanene uje ngamba ngeci aije, co wendekele kuli ikeye ngwendi, ‘Yove u ngamba wamuvi! Yange njakusambesele likongo lyove lyoshe liwatambwile kuli yange, omwo yove wanjilombele kukusambesa. 33Co yove kuwasa kuzivilako mukweni mema ku mbunge ngwe munjinakuzivilile mema ku mbunge yange ndi?’ 34Co uje mwene waluvalele manene, wamwakele mu kamenga kuli vaka-kuyandesa noo wafwetele makongo endi oshe.”

35Co Yesu wamanesele kwendeka ngwendi, “Mukemwo mwakalinga Tate wa mwilu ku munu woshe, nga kuusambesa mukweni na mbunge yove yoshe.”

Currently Selected:

Mateo 18: MBB

Highlight

Copy