VaLevi 26
26
Vivezikiso vya kwononoka mashiko
(Kwi 7:12-24, 28:1-14)
1 #
Kut 20:4; VaLe 19:4; Kwi 5:8; 16:21-22; 27:1 Shukulu Kalunga wendekele ngwendi, “Kesi mukalishongele tumponya nambe kesi mukemike cifwa cimo cakushonga, nambe vimanda vya mamanya, nambe kulemesa mamanya akutaleka. Yange njapwa Kalunga Njambi yeni. 2Mukanyunga Litangwa Lyakuhwima, co mukasingimika mwela uje vakanjilemesela. Yange njapwa Kalunga.
3“Nga mukavangeya mashiko ange nakwononoka kushika kwange, 4co njikanyokesa nyonzi a simbu yayo yaivwa, co livu likamenesa vimbuto, na miti lalo ikaima vushuka vwavungi. 5#Kwi 11:13-15; 28:1-14 Ngecivene, vimbuto vyeni vikatuma manene, mukalya simbu yoshe nakukuta, noo a simbu yakuvuya vushuka, co mukavuya vushuka noo a simbu yakulima vimbuto, co mukakala mwamuvwa mu lifuti lyeni.
6“Mukakala mu kwoloka kuluu mu lifuti lyeni, co kumukazivi lyova. Njikatundisa vushonde vwa tusitu vavavi mu lifuti lyeni, kumukakala lalo nzita muje. 7Co mukafungulula vitozi veni. 8Vanu vatanu akati keni vakafungulula ciita, co vanu ciita vakafungulula makulukazi likumi. Vitozi veni vakafunguluka mu nzita. 9Njikamivezikisa nakumyana vana vavangi, co njikanyunga cikumiiyo cije njalikumiiye neni, 10mukateja vimbuto vyavingi manene, vikamanesa mwaka, nameme ngoco kumukakala noku kwakuvitulikila. Co mukombila kuti vije vyalaja ngeci muwane mwela wakutulikila vije vyaviha. 11Njikakala akati keni mu mbalaka yange yakujela, co kunjikamikengesa nima. 12#2 Koli 6:16 Yange njikakala neni, njikapwa Njambi yeni, co neni lalo mukapwa vanu vange. 13Yange njapwa Kalunga Njambi yeni, njamitundisile mu Ingito ngeci kesi mupwe vindungo vavo. Co njamanesele nzili ije yamikutile, co njamyecele ngeci mwende nakundikangela.”
Cihiso cakujeneka kwononoka mashiko
(Kwi 28:15-68)
14Shukulu Kalunga wendekele ngwendi, “Oloni nga kumwononoka mashiko ange, co njikaminyanyamesa. 15Nga muvyana kwononoka vizilika vyange, nakulimbulula vilongesa vyange, kunyunga mashiko ange, nakupokola cikumiiyo cange cije njalikumiiye neni, 16co njikalinga evi, njikamitumina mishongo yaikalu ya lulanga na lisika-sika, ikamipwisa vupuputwa nakuminyongesa, co mukalima vimbuto vyeni, oloni kuvikamikwasa, omwo vitozi veni vakamifungulula, co vakalya vije vimwalimine. 17Co njikamikengesa nima, co vitozi veni vakamifungulula nakumishwana. Co mukakala na cova-ova, mukatewa ngwe kuli umo ali na kumisheka, kumani naumo wai amisheka.
18“Oloni nga anga sheni kunjononoka, co njikamihisa visimbu vitanu na vivali a vuvi vweni, 19co njikamanesa likamba lyeni, na kulyalesa kweni kwakuvi. Kukukakala nyonzi yai, lifuti likominina cau ngwe mulyakola limanya. 20Co vipangi vyeni vyoshe vya nzili kuvikamikwasa, omwo livu lyeni kulikamenesa vimbuto, co na miti lalo kuyikemi vushuka vwai.
21“Nga munjitengulukila nakuvyana kunjononoka, co njicikawezelelako lalo cihiso visimbu vitanu na vivali a vuvi vweni. 22Co njikatuma tusitu vavavi akati keni, co vakevo vakatsiya vana veni, nakunyongesa vimuna veni, vakaseza lika vavandondo, na vingila vyeni vikapunda.
23“Oloni nga sheni kunjitolilila, mucitwalao kujeneka kunjononoka, 24co njikamitengulukila nakumihisa visimbu vitanu na vivali a vuvi vweni kutuvakana akulivanga. 25Njikanena nzita ali yeni ya kumihisa omwo munapokola cikumiiyo cange, nga mukalikungulwila mu vinganda vyeni nakuvandamo, co njikatuma mushongo wa lulanga akati keni, njikamikundika kuli vitozi veni ngeci vakamishwane. 26Njikatepulula ku vyakulya vyeni. Ngeci vanakazi likumi voshe vakocela makende avo a liko limolika, co vakamipangezelawo, oloni omo munamanesa kuwalya oshe, anga mucikaziva njala.
27“Oloni nga anga sheni kunjitolilila, mucitwalao kujeneka kunjononoka, 28co mukuluvala kwange njikamitengulukila nakumihisa lalo visimbu vitanu na vivali a vuvi vweni kutuvakana a simbu yakulivanga. 29Njala ikaama manene, co mukalya vana veni. 30Njikanyongesa myela yeni yakulemesela a malundu, nakusiwula mitula yeni ya insense, co njikombangela vivimbi vyeni a tumponya tweni twakuwa twa mwonyo. Co mukapwa va vunyengwe ku mesho ange. 31Njikapwisa membo eni vingundu, co njikanyongesa myela yeni yakulemesela, co kunjikavwaelela na vwisi vwa lwengo lwaluvwa lwa vin̄ombelo vyeni. 32Co njikanyongesa lifuti lyeni lyoshe njwa, ngeci vitozi vaje vakakalamo vakalisimoke akuviya kwangacije. 33Co nzita ikaija akati keni yakumishandwela ku mafuti eka. Mu lifuti lyeni mukapwa mwangoco, na membo akapwa vingundu. 34Asinoni livu likajolela a myaka yalyo yakuhwima simbu yoshe omo likasala ngundu oku yeni muli mu lifuti lya vitozi veni, co livu likahwima nakujolela. 35Simbu yoshe livu likelila ngoco, likahwima kuhwima kuje kukwakeleko a matangwa aje akuhwima, omo yeni mwakelemo.
36“Co njikalingisa cova-ova kuli vaje vanasalamo. Eli likapwa lyova lyakama manene, co vakatewa nameme cililimo ca liputa lije lilinakulipekumukila ngoco na lihunzi. Vakatewa ngwe vanu vatewa nzita, co vakaliwila-wila ngoco, nambe vitozi vavo kuvavashwenyele. 37Vakalitanozoka umo na mukwavo ngwe kuli munu umo alinakuvasheka, co kuvakakala na nzili yakulwa na vitozi vavo. 38Co mukatsila mu vundungo, mukavolela mu lifuti lya vitozi veni. 39Vamo veni vaje vanasala mu lifuti lya vitozi veni, vakongwa omwo vuvi vweni na a vuvi vwa vakukulwila veni.
40“Oloni nga vatekulwila veni vakalitavela vuvi vwavo, na vuvi vwa vakukulwila vavo, vaje vanjivyanene nakunjitengulukila, 41ngeci njaluvalele nakuvatengulukila nakuvashekela ku vundungo mu lifuti lya vitozi vavo. Cooni nga vatekulwila veni valitavela mulonga wa vuvi vwavo, co vashangumuka kukala mwamuvwa, 42#Kus 17:7-8; 26:3-4; 28:13-14 co njikanuka cikumiiyo cange cije njalikumiiye na vakukulwila vavo, Avilahama, na Isake, na Yakomba, co njikavezikisa livu lyeni. 43Nameme ngoco, akulivanga vanu vaIsalele vanapande kuseza livu, ngeci livu lihwime omo naumo wai alinakulimamo, co vakevo vanapande kufweta mulonga wakuvyana mashiko ange, na vilongesa vyange. 44Oloni nameme ngoco, omo vacili mu lifuti lya vitozi vavo, kunjikavombila kuti embwe, nambe kuvanyongeselela. Kunjikapokola cikumiiyo cange navo, omwo yange njapwa Kalunga Njambi yavo. 45Co njikanuka cikumiiyo cije njalikumiiye na vakukulwila vavo omo njasholwele nzili yange ku miyati yoshe akutundisa vanu vange mu Ingito, ngeci njipwe Njambi yavo. Yange Njapwa Kalunga.”
46Evi vikevyo vizilika, na vilongesa, na mashiko aje aanene Shukulu Kalunga kuli Mosesa a Munkinda wa Sinai ali vanu vaIsalele.
Currently Selected:
VaLevi 26: MBB
Highlight
Copy
Compare
Share
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006
