VaLevi 24
24
Mwakunyungila vindeya
(Kut 27:20-21)
1Shukulu Kalunga wendekele kuli Mosesa ngwendi, 2“Shika vanu va Isalele vanene mazi amavwa a olive a mu vindeya vya mu Mbalaka, ngecivene, vindeya vishukume simbu yoshe kesi vizime. 3Anja ya livamba, lije lili kulutwe lwa Cikasa ca Cikumiiyo, cije cili mu Mwela Wakujela Manene, Alone akashwameke vindeya ku cingwezi na cingwezi, ngeci vishukume ku mesho a Shukulu Kalunga simbu yoshe noo mutondo. Lishiko eli mukalinyunge ku visemwa vyeni vyoshe vya kulutwe. 4Alone akanyunge vindeya a citumbikilo cavyo ca ngolinde yakujela, co ikeye napande kumona ngeci vindeya vilinakushukuma ku mesho a Shukulu Kalunga simbu yoshe.”
Makende akulambula kuli Njambi
5“Ukambata vunga vwakuseneta makilo likumi na avali, co ukoca mikasha ya makende likumi na ivali. 6#Kut 25:30 Co ukaka mikasha mu mikana ivali, mukana umo na umo mukakale itanu na umo, a mesa yakusata na ngolinde yakujela, ije ili ku mesho a Shukulu Kalunga. 7Co a mukana umo na umo, ukakao insense kupwa canukiso ca mulambu wa vyakulya kuli Shukulu Kalunga, ngeci iinge mu mwela wa makende kupwa n̄ombelo ya vyakulya kuli Shukulu Kalunga. 8A Litangwa Lyakuhwima lyoshe, Alone akaake makende ku mesho a Shukulu Kalunga. Akacilingile vanu va Isalele kupwa cikumiiyo ca ku myaka yoshe. 9#Mat 12:4; Mak 2:26; Luk 6:4 Makende awa akapwa a Alone na vatekulwila vendi ku myaka yoshe, co vakevo vakaalile mu mwela wakujela, omwo ou wapwa mutambela wakujela manene wa vyakulya vyakukombelela kuli Shukulu Kalunga.”
Kunyanyamesa uje ashaula lizina lya Njambi
10Kwakele munalume umo, ishe wapwile kaIngito, vaina vapwile kaIsalele, lizina lyendi Shelomiti muna Ndivile, wa ku muyati wa Ndani. Munalume ou walijokotele na kaIsalele muje mu cilombo. 11Co omo vakele nakulijokota, ikeye washawile nakusinga lizina lya Njambi. Co vamutwalele kuli Mosesa, 12vamwanene ku mavoko a vaka-kunyunga, co vavandamenene Shukulu Kalunga avaleke vika vakalinga na uje munu.
13Co Shukulu Kalunga wendekele kuli Mosesa ngwendi, 14“Tuwiseni anja ya cilombo uje munalume nashawile lizina lyange. Munu na munu uje nazivile omo nashawile akakambeke mavoko endi a mutwe wa uje munalume mukushulisa vukaleo ngwendi ali na mulonga. Asinoni mbunga yoshe vakamwashe mamanya. 15Leka vanu va Isalele ngwove woshe uje ashaula Njambi yendi, napande kutsa. 16KaIsalele woshe, nambe muka-kwija woshe uje ali mu Isalele, nga ashaula lizina lya Shukulu Kalunga, co mbunga yoshe vakamwashe mamanya.
17 #
Kut 21:12
“Woshe atsiya mukwavo nendi lalo vakamutsiye. 18Co lalo woshe uje atsiya cimuna wa mukwavo napande kumwingisilamo weka. Lishiko linapu ngeci mwonyo na mwonyo. 19Nga munu avulumuna mukwavo, vyoshe vije vyanalingi kuli mukwavo navyo lalo vakavilinga kuli ikeye. 20#Kut 21:23-25; Kwi 19:21; Mat 5:38 Nga ikeye apokola citsiya ca mukwavo, nendi lalo vakapokole citsiya cendi. Nga nativi lisho lya mukwavo, nendi lalo vakative lisho lyendi. Nga napukula liyo lya mukwavo, nendi lalo vakapukule liyo lyendi. Nga avulumuna mukwavo, nendi lalo vakamwilwisilekwo. 21Woshe uje atsiya cimuna wa mukwavo akengisemo weka lalo, oloni woshe uje atsiya munu na ikeye vakamutsiye. 22#Kul 15:16 Lishiko eli linapu lyeni muvavoshe, vaIsalele, na vaka-kwija vaje valinakukala akati keni, omwo yange njapwa Kalunga Njambi yeni.”
23Omo Mosesa nendeka evi kuli vanu vaIsalele, co vatuwisile anja ya cilombo uje munalume washawile lizina lya Njambi, co vamwashele mamanya. Mu ngila eyi vanu vaIsalele valingile vije Shukulu Kalunga washikile Mosesa.
Currently Selected:
VaLevi 24: MBB
Highlight
Copy
Compare
Share
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006
