VaLevi 23
23
Viwano vya vunjambi
1Shukulu Kalunga wendekele kuli Mosesa ngwendi, 2“Endeka kuli vanu va Isalele ngwove, evi vikevyo viwano vya vunjambi, vimukanyunga omo mukakunguluka amo nakulemesa. 3#Kut 20:8-10; 23:12; 31:15; 34:21; 35:2; Kwi 5:12 Muli na matangwa atanu na limo muje mwasa kulinga vipangi vyeni, oloni anukeni litangwa lyamucitanu na avali lyapwa Litangwa Lyakuhwima. A litangwa lije kesi mukapange vipangi, oloni mukakunguluka nakulemesa. Litangwa Lyakuhwima lyapwa lya Shukulu Kalunga, kwoshe kuje mulinakukala. 4Ambululeni viwano evi a visimbu vije vivemika.”
Ciwano ca Pasovala na Ciwano ca Makende Akujeneka Musima
(Kul 28:16-25)
5 #
Kut 12:1-13; Kwi 16:1-2 “A litangwa lyamucitanu na awana ku cingwezi ku ngonde yakulivanga,#23:5 NGONDE YAKULIVANGA: Ngonde ya Avive (ikeyo Nisane), mu ciHevelu inapu yakulivanga kutunda akati ka Kuwana nakweta akati ka Kuhu. mukashangumuka Ciwano ca Pasovala mukusingimika Shukulu Kalunga. 6Co a litangwa lyamulikumi na atanu, ku ngonde ije vene mukashangumuka Ciwano ca Makende Akujeneka Musima mukusingimika Shukulu Kalunga, co a matangwa atanu na avali kumwapandele kulya makende akwaka musima. 7A litangwa lyakulivanga mukakunguluka nakulemesa, co kesi mukapange vipangi vyeni vya a litangwa na litangwa. 8#Kut 12:14-20; 23:15; 34:18; Kwi 16:3-8 Mukakombelela n̄ombelo ya vyakulya kuli Shukulu Kalunga a matangwa atanu na avali. Co a litangwa lyamucitanu na avali mukakunguluka nakulemesa lalo, oloni kesi mukapange vipangi vyeni vya a litangwa na litangwa.”
9Co Shukulu Kalunga wendekele kuli Mosesa ngwendi, 10“Leka vanu va Isalele ngwove, omo mwija mu lifuti lije lyakamyana Shukulu Kalunga, omo mukateja vimbuto vyeni, twaleni mukuta wakulivanga umunateje kuli muka-kukombelela. 11Co ikeye akawana kuli Shukulu Kalunga kupwa n̄ombelo yaivwa, ngeci akamitambule. Co muka-kukombelela akautwala alikaki omo Litangwa Lyakuhwima lineti. 12A litangwa lije, omo mutwala mulambu wa mukuta wa vimbuto, co mukakombelela n̄ombelo kupwa mulambu wa kwenyeka, lijamba lya muna manga wa mwaka umolika, wakujeneka kapenga. 13Amo na mulambu wa makilo avali a vunga vwakutsingasana na mazi a olive kupwa n̄ombelo ya vyakulya kuli Shukulu Kalunga. Co vweko vwavuvwa vwa mulambu ou vukavwaelelesa Shukulu Kalunga. Co amo na mulambu wa lita imo ya vinyu. 14Kumwapandele kulya tiliku yaiha, nambe yaivishu, nambe yakwoca, nambe kuyilinga makende, noo munayikombelelela kuli Njambi. Co lishiko eli vanapande kulinyunga vatekulwila veni ku visemwa vyeni vyoshe vya kulutwe kwoshe kuje kumukakala.”
Ciwano ca Kuteja
(Kul 28:26-31)
15“Co mukalava visimano vitanu na vivali kutunda a Litangwa Lyakuhwima lije mwalambwile mikuta yeni ya tiliku kuli Shukulu Kalunga. 16A litangwa lyamumakumi atanu, omo Litangwa Lyakuhwima lyamucitanu na avali lineti, mukalambula kuli Shukulu Kalunga mulambu ukwavo lalo wa tiliku yaiha. 17Naanga na naanga vakanene kuli Shukulu Kalunga mikasha ivali ya makende kupwa mulambu wauvwa. Mukasha umo na umo vautike na makilo avali a vunga vwa tiliku vwakuseneta vwakutika na musima, co vakayilambule kuli Shukulu Kalunga kupwa mulambu wakulivanga wa vimbuto vije vanatejele. 18Co mbunga vakanene makende nakulambula lalo vana va vimanga vatanu na vavali va mwaka umolika, na ngombe wa nkomba umo, na majamba vavali, vakujeneka kapenga. Vakavalambule kupwa mulambu wa kwenyeka kuli Shukulu Kalunga, amo na mulambu wa vimbuto vya vinona, na milambu ya vinyu. Co vweko vwa mulambu ou vukavwaelelesa Shukulu Kalunga. 19Co lalo mukakombelela lijamba lya membe umo kupwa mulambu wa a vuvi, na majamba vavali va vimanga va mwaka umo kupwa mulambu wa kulitombola. 20Co muka-kukombelela akavitwala amo na makende a vimbuto vyakulivanga vije vanatejele, kupwa mulambu kuli Shukulu Kalunga, amo na vaje vana va vimanga vavali. Milambu eyi inapu yakujela kuli Shukulu Kalunga, ikapwa ya muka-kukombelela. 21#Kut 23:16; 34:22; Kwi 16:9-12 A litangwa lije naumo wai akapanga vipangi vyendi vya a litangwa na litangwa, oloni mukakunguluka nakulemesa. Co lishiko eli vanapande kulinyunga vatekulwila veni ku visemwa vyeni vyoshe vya kulutwe kwoshe kuje kumukakala.
22 #
VaLe 19:9-10; Kwi 24:19-22 “Omo mukateja mu mahya eni, kesi mukavatozole vimbuto vya kumukulo wa mahya, co kesi mukelukile lalo munima nakuvatozola ije mitwe ya tiliku mwaseza munima. Visezeleni tuutu na vaka-kwija. Yange njapwa Kalunga Njambi yeni.”
Ciwano ca Mwaka Wauha
(Kul 29:1-6)
23Shukulu Kalunga wendekele kuli Mosesa ngwendi, 24“Leka vanu va Isalele ngwove, a litangwa lyakulivanga ku ngonde yamucitanu na vivali munapande kunyunga litangwa lyakama lyakuhwima. Co mukakunguluka amo nakulemesa omo malupembo emba. 25Mukakombelela n̄ombelo ya vyakulya kuli Shukulu Kalunga, co kesi mukapange vipangi vyeni vya a litangwa na litangwa.”
Litangwa lya Kulyamba
(Kul 29:7-11)
26Co Shukulu Kalunga wendekele kuli Mosesa ngwendi, 27“A litangwa lyamulikumi ku ngonde yamucitanu na vivali likapwa Litangwa lya Kulyamba a mwaka na mwaka. A litangwa lije kesi mukalye cuma cimo. Mukakunguluka amo nakulemesa nakulambula mulambu wa vyakulya kuli Shukulu Kalunga. 28Kesi mukapange vipangi a litangwa lije, omwo likelyo linapu Litangwa lya Kulyamba, mukumyambesa ku mesho a Shukulu Kalunga Njambi yeni. 29Woshe uje akalya cuma cimo a litangwa lije, kuvakamulava lalo kupwa umo wa vanu va Njambi. 30Co nga munu umo akapanga vipangi a litangwa lije, yange Kalunga njikamutsiya. 31Kesi mukapange vipangi vimo. Eli likapwa lalo lishiko lya vatekulwila veni voshe kwoshe kuje kuvakakala. 32#VaLe 16:29-34 Kutunda kukulauka kwa litangwa, a litangwa lyamucitanu na awana ku ngonde eyi vene, nakutwala kukulauka kwa litangwa lyamulikumi, mukanyunga mwamuvwa litangwa eli kupwa litangwa lyakama lyakuhwima, co a simbu eyi kesi mukalye cuma cimo.”
Ciwano ca Mapapela
(Kul 29:12-40)
33Co Shukulu Kalunga wendekele kuli Mosesa ngwendi, 34“Leka vanu va Isalele ngwove, a litangwa lyamulikumi na atanu ku ngonde eyi yamucitanu na vivali kukakala Ciwano ca Mapapela. Ciwano eci cikatwalao noo matangwa atanu na avali. 35A litangwa lyakulivanga mukakunguluka amo nakulemesa, co kesi mukapange vipangi vyeni vya a litangwa na litangwa. 36#Kwi 16:13-15 Litangwa na litangwa lyamucitanu na avali mukakombelela n̄ombelo ya vyakulya kuli Shukulu Kalunga. Co a litangwa lyamucitanu na atatu mukakunguluka amo nakulemesa, co mukakombelela n̄ombelo ya vyakulya kuli Shukulu Kalunga. Linapu litangwa lyakama lyakulemesa, co kesi mukapange vipangi vyeni vya a litangwa na litangwa.
37“(Evi vikevyo viwano vya vunjambi vivemika vyakusingimika Shukulu Kalunga, mukakunguluka amo nakulemesa nakukombelela vin̄ombelo vya vyakulya kuli Shukulu Kalunga, na vin̄ombelo vya kwenyeka, na milambu ya vimbuto, na vin̄ombelo, na milambu ya vinyu, vije vishakiwa a litangwa na litangwa. 38Viwano evi vyakukumbasana ku Matangwa Akuhwima, co milambu eyi inakumbasana ku vwana vweni vwa matangwa oshe, na milambu yeni mukushulisa visingo vyeni, na milambu ya vizango vyeni mulinakulambula kuli Shukulu Kalunga.)
39“Kushangumuka a litangwa lyamulikumi na atanu ku ngonde yamucitanu na vivali omo munateje laja mu mahya eni, mukanyunga ciwano eci a matangwa atanu na avali. Co nyungeni lalo litangwa lyakulivanga omwo likapwa litangwa lyakama lyakuhwima. 40A litangwa lije lyakulivanga mukavuya vushuka vwavuvwa vwa ku miti yeni, co mukambata mashakavale, na minango ya miti ije ili na maputa, co mukashangumuka ciwano ca vunjambi mukusingimika Shukulu Kalunga Njambi yeni. 41Lisambeni a matangwa atanu na avali. Lishiko eli vakalinyunge vatekulwila veni ku visemwa vyeni vyoshe vya kulutwe. 42Vanu va Isalele voshe vakakale mu mapapela matangwa atanu na avali. 43Ngecivene, vatekulwila veni vakazivuke ngeci Shukulu Kalunga walingisile vanu vaIsalele kukala mu mapapela a vicapa-capa omo wavatundisile mu Ingito. Ikeye wapwa Shukulu Kalunga Njambi yeni.”
44Ngecivene, mu ngila eyi Mosesa waanene vanu mashiko akunyunga viwano vyakusingimika Shukulu Kalunga.
Currently Selected:
VaLevi 23: MBB
Highlight
Copy
Compare
Share
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006
