VaLevi 17
17
Kujela kwa maninga
1Shukulu Kalunga wendekele kuli Mosesa ngwendi, 2“Leka Alone na vana vendi, na vanu voshe va Isalele ngwove, omu mukemwo mwanashiki Shukulu Kalunga. 3KaIsalele woshe akombelela kuli Shukulu Kalunga ngombe, nambe manga, nambe membe mu cilombo, nambe anja ya cilombo, 4oloni nga kamunenele ku cikolo ca Mbalaka Mwakuliwanena nakumukombelela kupwa mulambu kuli Shukulu Kalunga napokola Lishiko. Ali na mulonga wakwitila maninga. Co uje munu kuvakamulava lalo kupwa munu wa Njambi embwe. 5Kunungulula kwa lishiko eli kunapu ngeci vanu va Isalele voshe ololo vasa kunena vimuna kuli Shukulu Kalunga vaje vakele nakutsiila mushandangala yangoco, co vanapande kuvanena kuli muka-kukombelela ku cikolo ca Mbalaka nakuvatsiilako kupwa milambu ya kulitombola. 6Muka-kukombelela akashamwine maninga ku mitambela ya mutula ku cikolo ca Mbalaka nakwenyeka mazi ngeci lwengo lwaluvwa luvwaelelese Shukulu Kalunga. 7Vanu va Isalele vanapande kupwa va kulongwa kuli Shukulu Kalunga. Kuvapandele kutsiila vimuna vavo mushandangala yangoco, nakukombelela vin̄ombelo ku minzinzime yakujwala ije yakulifwa na vimembe. Vanu va Isalele vanapande kunyunga lishiko eli ku visemwa vyavo vyoshe vya kulutwe.
8“Co ukendeka kuli vakevo ngwove kaIsalele woshe, nambe muka-kwija uje alinakukala akati kavo, uje akombelela n̄ombelo ya kwenyeka, nambe n̄ombelo yeka 9kupwa n̄ombelo kuli Shukulu Kalunga kujeneka kuyinena ku cikolo ca Mbalaka, kuvakamulava lalo kupwa munu wa Njambi embwe.”
Kuvindika kulya maninga
10 #
Kus 9:4; VaLe 7:26-27; 19:26; Kwi 12:16,23 “Nga kaIsalele, nambe muka-kwija uje alinakukala akati ka vanu, alya situ ili na maninga, nambe alya maninga, co Shukulu Kalunga akamutengulukila, co kakamulava lalo kupwa munu wendi embwe. 11Omwo mwonyo wa cuma coshe cakuyoya wakala mu maninga, eci cikeco cashikile Shukulu Kalunga ngeci maninga oshe vawetile ku mutula mukwambesa vuvi vwa vanu. Maninga akewo anapu mwonyo, co akewo akaambesa vuvi. 12Omu mukemwo Shukulu Kalunga nashiki mbunga yoshe, nambe vanu va Isalele, nambe vaka-kwija vaje valinakukala akati kavo, kesi valye situ na maninga ayo, nambe kulya maninga.
13“KaIsalele woshe, nambe muka-kwija uje alinakukala akati ka vanu, nga aya nakuyomba, co atsiya kasitu nambe kazila wakulya, co ikeye napande kwitila maninga endi asi nakwofwelao livu. 14Omwo mwonyo wa cuma coshe cakuyoya wakala mu maninga. Omu mukemwo Shukulu Kalunga naleke vanu va Isalele ngeci kesi valye situ na maninga ayo, nambe kulya maninga. Co woshe uje alingamo kuvakamulava lalo kupwa munu wendi.
15“Munu woshe-iwoshe, nambe kaIsalele, nambe muka-kwija, uje alya situ ya kasitu wakulitsila, nambe wakutsiya ku vikashama, napande kukusha vuzalo vwendi, co ajwele a muvila wendi, co akapwa wakujeneka kujela noo ku cingwezi, asinoni akajela. 16Nga ikeye kalingimo, co ngongo yendi.”
Currently Selected:
VaLevi 17: MBB
Highlight
Copy
Compare
Share
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006
