VaLevi 16
16
Litangwa lya Kulyamba
1Shukulu Kalunga wendekele kuli Mosesa omo vana va Alone vavali va vanalume vatsile omo vavwekele tuhya twakujeneka kujela kuli Shukulu Kalunga. 2#VaHe 6:19 Co Shukulu Kalunga wendekele ngwendi, “Leka ndolome yove Alone ngwove, kuvanga a simbu ije lika vemika ikeyo yakaita kunima ya livamba mukukovela mu Mwela Wakujela Manene, omwo muje mukemwo munjikasholokela mu lishelwa akamwa ya cifwiko ca Cikasa ca Cikumiiyo. Nga kononoka, co akatsa. 3#VaHe 9:7 Akakovela mu Mwela Wakujela Manene omo nanena muna ngombe wa nkomba wa n̄ombelo ya a vuvi, na lijamba lya manga wa n̄ombelo ya kwenyeka.”
4“Omo Alone kanda acikovele mu Mwela Wakujela Manene, napande kujwela a muvila wendi nakuzala vuzalo vwa vuka-kukombelela na cikoveyo cacilaja cakujela ca linyu na kaputula na mwiva na kalupusa.
5“Co ku mbunga ya vaIsalele Alone akambateko majamba vavali va vimembe kupwa n̄ombelo ya a vuvi, na lijamba lya manga umo kupwa n̄ombelo ya kwenyeka. 6Co akakombelele ngombe wa nkomba kupwa n̄ombelo mukulyambesa ikeye vavenya ku vuvi vwendi novu vwa naanga yendi. 7Asinoni akatwale vaje vimembe vavali ku cikolo ca Mbalaka Mwakuliwanena. 8Co Alone akate n̄ela mukupangesa mamanya avali, limo vanasonekao ngwavo, ‘wa Shukulu Kalunga,’ co likwavo vanasonekao ngwavo, ‘wa Azazele.’#16:8 AZAZELE: Lijwi eli mu ciHevelu kulyalumbunukile mwamuvwa, amo lilumbunuka ndemone wa mu mambo. 9Co Alone akakombelele uje membe naangukile a n̄ela ya Shukulu Kalunga kupwa n̄ombelo ya a vuvi. 10Oloni uje membe naangukile kupwa ciingo ca vuvi vwa vanu vakamunene kuli Shukulu Kalunga na mwonyo wendi, mukwambeselao vuvi, nakumutuma mu mambo.
11“Asinoni Alone akanene ngombe wa nkomba kupwa n̄ombelo ya a vuvi vwendi vavenya, na vuvi vwa naanga yendi mukulyambesa ikeye vavenya na naanga yendi, co akatsiye uje ngombe wa nkomba kupwa n̄ombelo ya a vuvi vwendi vavenya. 12Co akambate cikango cije cinashulu na manungu aje alinakwenyuka tuhya akutunda ku mutula, na mavoko avali akushula na insense yakutwa mwamuvwa nakuvinena mu Mwela Wakujela Manene. 13Co akaake insense a tuhya ku mesho a Shukulu Kalunga, co vwisi vwa insense vukafwika cifwiko ca Cikasa ca Cikumiiyo, ngeci ikeye kesi acimone kutewa atsa. 14Co akanoneko maninga amo a uje ngombe wa nkomba nakumbwitikamo mulavo wendi nakuwashamwina kulutwe lwa cifwiko. Asinoni ashamwineko amo visimbu vitanu na vivali akamwa na kulutwe lwa Cikasa ca Cikumiiyo.
15 #
VaHe 9:12
“Munima yevi, akatsiye membe wa n̄ombelo ya a vuvi vwa vanu, nakunena maninga endi mu Mwela Wakujela Manene, nakuwashamwina akamwa ya cifwiko, asinoni akashamwine amo lalo kulutwe lwa Cikasa ca Cikumiiyo, ngwe mwalingile na maninga a uje muna ngombe wa nkomba. 16Mu ngila eyi akaambesa Mwela Wakujela Manene omwo yakujeneka kujela kwa vanu va Isalele nomwo vivulumuna vyavo vyoshe, na vuvi vwavo vwoshe. Ikeye napande kulingila evi kuje ku Mbalaka, omwo ikeyo yemana mukati ka cilombo cije kucajelele. 17Naumo wai akakala mu Mbalaka omo Alone akakovela mu Mwela Wakujela Manene mukwambesa vuvi vwendi vavenya, novu vwa naanga yendi, na mbunga yoshe ya vanu va Isalele, noo akatuukamo. 18Asinoni napande kuya ku mutula wa milambu ya kwenyeka nakuwambesa. Co napande kunonako maninga amo a ngombe wa nkomba, na maninga amo a membe nakuwakwita oshe a vyakushongomoka mu vimbango vya mutula. 19Co napande kushamwina maninga amo a mutula na mulavo wendi visimbu vitanu na vivali. Mu ngila eyi akajelesa mutula ku vuvi vwa vanu va Isalele nakuupwisa wakujela.”
Membe wa ciingo ca vuvi vwa vanu
20“Omo Alone namanesa kwambesa Mwela Wakujela Manene, na Mbalaka Mwakuliwanena, na mutula, co akanene uje membe wa mwonyo kuli Shukulu Kalunga uje ivaangwilile Azazele.#16:20 AZAZELE: Kenga 16:8. 21Co akakambeke mavoko endi oshe avali a mutwe wa uje membe wa mwonyo nakulitavela vuvi vwoshe vwa vanu va Isalele, na vivi vyavo vyoshe, na vivulumuna vyavo vyoshe, co nakuvinungulwila a mutwe wa uje membe. Asinoni uje membe vamwecelele aye mu mambo amolika na munu uje vanemika kulinga cuma eci. 22Co uje membe na uje munu vakambata vuvi vwoshe vwa vaIsalele nakuya navwo mu mambo.
23 #
Ezek 44:19
“Asinoni Alone akakovele mu Mbalaka, co akatundise vuzalo vwa vuka-kukombelela vuje vwanazalele akulivanga omo kanda akovele mu Mwela Wakujela Manene, co avuseze muje vene. 24Napande kujwela a muvila wendi mu mwela uje wakujela, co azale vuzalo vwendi. Munima yevi, akatuuke nakukombelela n̄ombelo ya kwenyeka mukulyambesa ikeye vavenya na vanu voshe va Isalele. 25Co akenyekele mazi a mutula a cimuna wa n̄ombelo ya a vuvi. 26Na uje akecela uje membe wa ciingo ca vuvi vwa vanu mu mambo napande kukusha vuzalo vwendi, co ajwele a muvila wendi omo kanda eluke mu cilombo. 27#VaHe 13:11 Co uje ngombe wa nkomba, na membe vanapangesele a n̄ombelo ya a vuvi, maninga avo aje vanenele mu Mwela Wakujela Manene mukwambesa vuvi, vakavatwale anja ya cilombo nakuvenyekelao, vilambu vyavo, na situ yavo, na mila yavo, na vufwati vwavo vyoshe vakavyenyeke. 28Uje avyenyeka napande kukusha vuzalo vwendi, co akajwele a muvila wendi. Asinoni eluke mu cilombo.”
Kunyunga Litangwa lya Kulyamba
29“Eli likelyo lishiko munapande kunyunga simbu yoshe ya kulutwe. A litangwa lyamulikumi ku ngonde yamucitanu na vivali,#16:29 NGONDE YAMUCITANU NA VIVALI: Mu ciHevelu inapu ngonde ya Tishili (ikeyo lalo Etanime) ngonde yamucitanu na vivali, kutunda akati ka Kapepo nakweta akati ka Lipepo. vaIsalele na vaka-kwija, vaje valinakukala akati keni, vanapande kulikela kulya*. Co lalo kuvapandele kupanga cipangi cimo embwe, 30omo ku litangwa lije vakamyambesa mukumijelesa ku vuvi vweni vwoshe, co mukapwa vakujela ku mesho a Shukulu Kalunga. 31Litangwa lije linapu litangwa lyakujela, likelyo mukalikela kulya nakupanga. Lishiko eli munapande kulinyunga ku simbu yoshe ya kulutwe. 32Muka-kukombelela Wakama uje vanavwavesa nakumwimika mukwinga a vipangi vya ishe, akaambesa, omo nazala vuzalo vwakujela vwa linyu vwa vuka-kukombelela. 33Co akaambesa Mwela Wakujela Manene, na Mbalaka Mwakuliwanena, na mutula, na vaka-kukombelela amo na mbunga yoshe ya vanu va Isalele. 34#VaLe 23:26-32; Kul 29:7-11 Lishiko eli mukalinyunge ku simbu yoshe ya kulutwe mukwambesa vanu voshe va Isalele lumo a mwaka mukutundisa vuvi vwavo vwoshe.”
Co Mosesa walingile ngwe muje mwamushikile Shukulu Kalunga.
Currently Selected:
VaLevi 16: MBB
Highlight
Copy
Compare
Share
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006
