Mbimbi 3
3
Kunyanyamesa nakutenguluka na cinyangavili
1Yange njizivuka mucapwa
kunyanyamesa ca Njambi.
2Wanjishekele nakunjikovelesa mu lisusulungu,
3co wanjipupile kwilukilamo nakwilukilamo lalo
kujeneka kunjizivila mema ku mbunge.
4Wasezele muvila wange na cikonde cange mikiki mikiki,
napokozola vitsiya vyange.
5Nanjishokela mu kamenga kakukaluwa na tuyando.
6Nanjisindiya kukala mu lisusulungu lya kutsa,
ngwe munu uje watsile laja.
7Nanjikutu mu malyenge, co njinapu nji cinzinda,
kunjesi lalo na cinyangavili cakuputumukamo cai.
8Njilinakuteta nakutambeka ngeci vanjikwase,
oloni Njambi shendi kunjitolilila
9Njipelyangela omo njenda,
co vivumbe vya mamanya vinanjizikinina
kwoshe kunjitengulukila.
10Vilinakunjivandela ngwe mbeya#3:10 MBEYA: Kenga 2 Vimyene 2:24.
nakunjijombokela ngwe ndumba.
11Wanjishekele kunjitundisa mu tapalo,
nakunjisanyozola vipuka-vipuka,
co wanjisezele mbwa.
12Wananele vuta vwendi vwa lusipa
ngeci njipwe cimango ca mikili yendi.
13Washele manene mikili yendi
a muvila wange nakuyikovelesa manene.
14Vanu valinakunjijola litangwa lyoshe,
co yange njinapu cuma
cakujolesa kuli vakevo voshe.
15Wanjisindiiye kunwa vyakulula
nakunjilisa vyakulya na vyakunwa vyakulula.
16Wakwitiiye cihanga cange asi
nakunjisindiya ngeci njilye mamanya.
17Co njinevala muvwafwa vukangule,
kwoloka nakuvwaelela.
18Kunjesi na simbu yakama
yakuyoya lalo yai,
cinyangavili cange muli Shukulu Kalunga cinahu.
19Viyongola vyakukemanga kwange,
na vulika vwange vilula ngwe mwaze.
20Njilinakuviyongola simbu yoshe,
ngeci mwonyo wange unazeye.
21Oloni cinyangavili ciiluka omo
njanuka cuma cimolika cikeco eci.
22Cizemo ca Shukulu Kalunga
cije kucesi kutenguluka
na mema ku mbunge yendi,
kuvyesi kuhwa embwe,
23Vyapwa vyaviha mutondo na mutondo,
kulongwa kwove Shukulu Kalunga,
kwapwa kwakama manene.
24Shukulu Kalunga lika ikeye njishaka,
muli ikeye njinaka cinyangavili cange.
25Shukulu Kalunga wapwa wamuvwa
kuli voshe vaje vamukulaela,
26ngecivene, cinapu cacivwa
kuli yetu kumuvandamena
nakusimpa ngeci atwamene.
27Co lalo cinapu cacivwa kuli yetu
a simbu ya vwanike vwetu,
kulilongesa kusimpa eci.
28Omo tulinakuyanda,
tunapande kutumbama mwetu lika
mukusimpa ca kwoloka,
29tunapande kukulama nakwononoka,
amo kucili cinyangavili.
30Nambe valinakutupupa nakututuka
oloni tunapande kuvitambula vyoshe.
31Shukulu Kalunga muka-mema ku mbunge
kasa kutumbila kuti ku myaka yoshe embwe.
32Nameme atunenela vusiwa,
oloni cizemo cendi ali yetu
mwa vushunga anga cili na nzili.
33Nalumo lwai avwaelela mukutuyandesa
nambe kutuzivisa kuvavala.
34Shukulu Kalunga azivuka
omo minzinzime yetu
valinakuyiyandesa mu kamenga,
35azivuka omo vatuvyanena vushunga
vuje vwatwanene,
36omo vavindika kusompa
mwa vushunga mu mbanja,
ikeye avizivuka vyoshe evi.
37Naumo wai asa kulinga cuma cimo
kwakujeneka cizango ca Shukulu Kalunga.
38Vuvwa na vuvi vyoshe vilingiwa
akushika kwa Shukulu Kalunga.
39Vikajo tulinakulinyenyetela
omo Shukulu Kalunga atunyanyamesa
omwo vuvi vwetu simbu tucili nakuyoya?
40Twiluleni vingila vyetu yetu vavenya
nakwiluka kuli Shukulu Kalunga.
41Tushokololeni vimbunge
vyetu kuli Njambi wa mwilu nakumulomba ngwetu,
42“Tunalingi vuvi nakukutengulukila,
co yove Shukulu Kalunga,
kuwatusambesele embwe.
43“Mu vukalu vwove watushekele nakututsiya
kujeneka kutuzivilako mema ku mbunge.
44Walifwika mu lishelwa lyakama manene
ngeci malombelo etu kuwasa kweta kuli yove.
45Unatava miyati yeka kutupangesa
ngwe lishito lyakukombela.
46“Vitozi vetu voshe
valinakututuka nakutushendumuna.
47Tunakala mu tuyando twakama nakunyonga,
co tulinakuyoya mu vushonde na mu lyova.
48Mesho ange alinakwita misozi
ngwe vana va vindonga vya mita
akunyonga kwa vanu vange.
49“Misozi yange ilinakwitika
kujeneka kulikela ngwe muna ndonga,
50noo Shukulu Kalunga
nakenge ano asi oku ali mwilu nakutukwasa.
51Mbunge yange ili na vusiwa
omo njamwene vije vyalingiwile
kuli vanakazi va mu nganda.
52“Vitozi vanjikwatele ngwe kazila
kwakujeka mulonga wakunjizindila.
53Vanjumbilile mu mbulu vutona,
nakushoka ku cikolo na limanya.
54Mema ashangumukile kunjifwika,
co njayongwele ngwange kutsa kuli muyehi nange.
55“Omo njakele mwisi yaije mbulu,
njatambekele kuli yove Shukulu Kalunga.
56Omo njakulambelelele
ngeci utolilile ku mutambi wange,
co yove wanjizivile.
57Wanjikumbulwile nakunjileka ngeci kesi njizive lyova.
58“Shukulu Kalunga wezile nakunjipatula,
co waamenene mwonyo wange.
59Njisompe mwamuvwa,
yove uzivuka vivi vije vivanalingi kuli yange.
60Uzivuka muje vitozi vange muvanjizindila,
na muje muvakanjitumbila vutumbe vwakunjilwisa.
61“Yove Shukulu Kalunga wavazivi muvali nakunjituka,
uzivuka matumbe avo oshe.
62Litangwa lyoshe vendeka lika
vya ali yange nakuyongola viyongola vyavo.
63Tunde mutondo kweta ku vutsiki
vashendumuna lika yange.
64“Yove Shukulu Kalunga,
vanyanyamese a vije vanalingi,
65vasinge nakuvajenekesa cinyangavili!
66Yove Shukulu Kalunga,
vasheke na vukalu nakuvanyongesa ano a kaye!”
The Bible in Mbunda ©The Bible Society of Zambia, 2006