Mbimbi 2
2
Cihiso ca Shukulu Kalunga a Yelusalema
1Shukulu Kalunga mu vukalu vwendi,
nafwiki Siyone na lisusulungu.
Nawisila asi vuvwa vwa Isalele
nakuvupwisa vwangoco.
A litangwa lya vukalu vwendi
Shukulu Kalunga wasezele nameme vene Njuvo yendi.
2Shukulu Kalunga wanyongesele
membo oshe a mu Yunda
kujeneka mema ku mbunge,
co mu vukalu vwendi wasiwile vimpaka
vije vyanyungile lifuti,
wazivisile shwamwa vumwene
na vaka-kushwana vavwo.
3Mu vukalu vwendi wavindikile nzili ya Isalele,
wavyanene kutukwasa omo vitozi vatulwisile.
Waluvalele netu ngwe tuhya
tuje tunyongesa vyuma vyoshe.
4Wananele mikili yendi ali yetu ngwe citozi,
ikeye watsiile voshe vaje
twavwaelelele nakujolela navo.
Twazivile vukalu vwendi
ngwe tuhya muno mu Yelusalema.
5Shukulu Kalunga nanyongesa Isalele ngwe citozi,
naseza vimpaka vyendi na mapela endi mu ngundu.
Nanena vusiwa vwa myaka yoshe,
ali vanu va mu Yunda.
6Wapujwile Njuvo yendi vimbazuvwila-mbazuvwila
muje twakele nakumulemesela.
Ikeye namanesa matangwa
akujela na Matangwa Akuhwima.
Mu vukalu vwendi vwakama
wavyanene mwene,
na muka-kukombelela.
7Shukulu Kalunga wasezele mutula wendi,
nakuseza lalo Njuvo yendi yakujela,
ikeye watavele vitozi kusiwula vivumbe vyayo.
Vitozi valingile muyoyo
mu Njuvo ya Shukulu Kalunga,
ngwe a litangwa lya ciwano.
8Shukulu Kalunga washakele
ngeci vivumbe vya Siyone viwe,
ikeye wavisetekele ngeci vinyonge.
Tuposhi na vivumbe vilinakulila
nakujaja ngwe vanu.
9Vikolo vinanyongo mu livu,
mikambo yavyo yoshe inatsenozoka.
Mwene na vanu va vulemu
ololo vali mu vunzinda.
Ololo naumo wai lalo alongesa mashiko,
co vaka-kwimanena kuvesi na vimona lalo
vyakutunda kuli Shukulu Kalunga.
10Vakulunu va mu Yelusalema
vanatumbama asi kuluu,
vanalishuwila livu a mitwe yavo,
co vanazala vikeleya.
Vambanda vanakulamesa mitwe yavo asi.
11Mesho ange avenga ngengu nakulila,
mwonyo wange uli mu vukalu.
Njinazeye na vusiwa akunyonga kwa vanu vange.
Vanike na vimbututu valinakulezumukila
mu vitapalo vya mu nganda.
12Valinakulomba vainavo vyakulya na vyakunwa,
co vawila mu vitapalo ngwe vaje vanavetwa,
omwo mwonyo wavo ulinakuhwa,
co vatsila mu mavoko a vainavo.
13Ove Yelusalema, Yelusalema injazema,
vikajo njendeka kuli yove?
Vatijo njikuzembeleka?
Kukwesi umo wayandele ngeci wai.
Tuyando twove tunaama ngwe mema a kalunga,
iyajo asa kukukangwisa?
14Vaka-kwimanena vove navimo vyai
vya vushunga vakulekele,
kuvanga makuli lika,
vakukwisile nakwambulula kwavo,
co yove kuwalitavelele vuvi vwove.
Vakevo vakulingisile kuyongola ngeci
kesi utenguluke ku vuvi vwove.
15Vanu vaita mu nganda vakushendumuna omo vakukenga.
Valipika ku mitwe yavo nakujola akuviya kwa Yelusalema ngwavo,
“Eyi ikeyo vene nganda ije yaivwa?
Nganda yakujolela ano a kaye oshe?”
16Vitozi vove voshe valinakukushendumuna
nakukukenga na cizindo.
Valishumanga ku tunwa nakulipembula ngwavo,
“Tunainyongesa! Eli likelyo litangwa twavandamenene!”
17Shukulu Kalunga nalingi vije vyashakele kulinga,
ikeye natunyongesa kujeneka mema ku mbunge,
ngwe muje mwatunangwile ku san̄ulu.
Ikeye nahyanesa vitozi vetu, navaana kujolela omo tunau.
18Yove civumbe ca Yelusalema,
vimbunge vya vanu vove
vyatambekele kuli Shukulu Kalunga.
Misozi yove iite mutanya na vutsiki ngwe ndonga,
kesi ujuke kulila nakulinyenga!
19Induka-induka vutsiki vwoshe
ngeci ulombele kuli Shukulu Kalunga,
ngeci ecele mbunge yove nakumulomba
ngeci akuzivileko mema ku mbunge
a vana vove vaje valinakulanduka
ku njala mu vimbango vyoshe vya vitapalo!
20Yove Shukulu Kalunga,
kenga ali vaje ulinakuyandesa!
Vanakazi valinakulya
vana vavo vaje vavazema!
Vaka-kukombelela na vaka-kwimanena
valinakuvatsiila mu Njuvo yove!
21Vakwenje na tukulukazi
vanalala mu vitapalo vanatsi.
Vakwenje na vambanda,
vitozi vanavatsii na mikwale.
Yove wavatsiile kujeneka
kuvazivilako mema ku mbunge,
a litangwa lya vukalu vwove.
22Yove walanyele vitozi vange
ngwe ku litangwa lya ciwano,
ngeci vanjizivise munjunju.
Co naumo wai waputumukile
a litangwa lya vukalu vwove.
Vatsiile vana vange,
vaje njalelele nakuvazema.
Currently Selected:
Mbimbi 2: MBB
Highlight
Share
Copy
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006