Yoshwa 7
7
Vuvi vwa Akane
1Oloni vanu va Isalele vavulumwine mulonga ku vyuma vyakukundika omwo Akane, muna Kalemi mutekulu wa Zavendi, wa ku cikota ca Zela ku muyati wa Yunda, wambatele ku vyuma vyakukundika, ngecivene, Shukulu Kalunga waluvalele manene na vanu va Isalele.
2Co Yoshwa watumine vanalume kutunda ku Yeliko nakuya ku Ayi, nganda yakele mu ngangela ya Mbetele, kuyehi na Mbetevane, wavalekele ngeci valamate ku malundu vakanenge lifuti. Ngecivene, vaje vanalume valamatele vakanengele lifuti lya Ayi. 3Co velukile kuli Yoshwa nakumuleka ngwavo, “Kukwapandele kuya mashwalale vavangi nakulwa ku Ayi embwe. Oloni tumeniko mashwalale 2,000 nambe 3,000 kunau. Kesi mutumeko mashwalale voshe nakulwa embwe, omwo vanu vavandondo lika valiko.” 4Ngecivene, mashwalale va Isalele vakupwa 3,000 vayileko nakulwa, oloni mashwalale va ku Ayi vakavashekele. 5Co vaje mashwalale va ku Ayi vavashekele kuvatundisa ku cikolo ca nganda ya Ayi nakuvetesa ku vitapu vya mamanya, co akati kavo vatsiileo makumi atatu na vanu vatanu naumo mu ngila ya kushelumuka ku malundu. Co vaIsalele vazivile manene lyova nakujujuka.
6Ngecivene, Yoshwa na vantwama va Isalele vatavwile vuzalo vwavo mukuviilila, co valyumbilile asi kulutwe lwa Cikasa ca Cikumiiyo ca Shukulu Kalunga. Valishuwilile lito ku mitwe yavo kumwesa vusiwa vwavo, co vakele kuje noo cingwezi. 7Asinoni Yoshwa wendekele ngwendi, “Tawe! Shukulu Kalunga Njambi! Omwo vikajo watujavwisilile Yondau nakutukundika ku mavoko a vaAmoli ngeci vatunyongese? Kuma mwamuvwa vene nga twakele musambwa lije lya Yondau! 8Yove Shukulu Kalunga vatijo njendeka? Ololo vaIsalele vanavasheke kuli vitozi vavo! 9Omo vaKanana na vanu veka va mu lifuti vakaziva vyuma evi, co vakatuzengeleka nakutunyongesa. Cooni yove Shukulu Kalunga cuma mukajo ukalinga mukunyunga lizina lyove lyakama?”
10Co Shukulu Kalunga wendekele kuli Yoshwa ngwendi, “Induka! Omwo vikajo unalalela ngacije asi? 11VaIsalele vanalingi vuvi! Vanapokola cikumiiyo cange cije cinjavashikile ngeci vacinyunge. Vanambata ku vyuma vije vyakukundika. Vakevo vanavivi nakwendeka makuli, co vanavikumbasana ku vyuma vyavo. 12Mukemwo vaIsalele kuvasele kwimana ku mesho a vitozi vavo. Vanatewa omwo vapwile vakusinga. Kunjikakala neni lalo kuvanga mutundise vyuma vije vyakukundika vili akati keni. 13Katuka! Jelesa vanu va Isalele. Valeke vaije ku mesho ange, valeke valivwaesele litangwa lya imene, omwo yange Kalunga Njambi ya Isalele njili nevi vyakwendeka. Kuli vyuma vyakukundika vili akati keni yeni vaIsalele, vije vinjamishikile ngeci muvinyongese! Kumukasa kwimana ku mesho a vitozi veni kuvanga munatundisa vije vyakukundika vili akati keni. 14Ngecivene, valeke ngwove imene mutondo mukemana kulutwe, muyati na muyati. Co muyati uje unjikaangula vakaija kulutwe, cikota na cikota. Co cikota cije cinjikaangula vakaija kulutwe, naanga na naanga. Co naanga ije injikaangula vakaija kulutwe, munalume na munalume. 15Co cikapwa ngeci woshe uje vakawana na vyuma vije vyakukundika vakamwenyeka, na naanga yendi, na vyuma vyendi vyoshe, omwo nanena shwamwa yakama ali Isalele, co napokola cikumiiyo cange.”
16Co Yoshwa wendukile mutondo-tondo washwenyesele muyati na muyati wa Isalele kulutwe, co kwaangukile muyati wa Yunda. 17Co wanenele muyati wa Yunda kulutwe, cikota na cikota, co kwaangukile cikota ca Zela. Co vanenele cikota ca Zela kulutwe, naanga na naanga, co kwaangukile naanga ya Zavendi. 18Asinoni wanenele naanga ya Zavendi kulutwe, munalume na munalume, co Akane, muna Kalemi mutekulu wa Zavendi, ikeye waangukileo. 19Asinoni Yoshwa wendekele kuli ikeye ngwendi, “Munange, endeka vushunga ku mesho a Shukulu Kalunga Njambi ya Isalele, co litavele. Njileke evi viwunalingi. Kesi unjishwekelevyo.”
20Co Akane wamukumbulwile ngwendi, “Mwa vushunga vene, njinalingi vuvi ku mesho a Shukulu Kalunga Njambi ya Isalele, evi vikevyo vinjinalingi. 21Akati ka vyuma twakapukwile, njamwene cikoveyo cacivwa manene ca vaMbambilone, na makilo avali a siliva, na livundungulu lya ngolinde lya vulemu vwa litambelo lya kilo. Njavishakele manene ngeci njavyambatele. Co mukaviwana njavishitika mukati ka mbalaka yange, co siliva ili kwisi yavyo.”
22Ngecivene, Yoshwa watumine vamo vanalume vashatukile ku mbalaka ya Akane. Co mwa vushunga vene vakawanene vije vyuma vanavishweke nakuvishitika muje vene, co siliva yakele kwisi yavyo. 23Vavitundisile mu mbalaka, co vavinenele kuli Yoshwa na kuli vaIsalele voshe nakuvitumbika asi ku mesho a Shukulu Kalunga. 24Ngecivene, Yoshwa amolika na vanu voshe va Isalele, vakwatele Akane muna Zela, na siliva, na cikoveyo, na livundungulu lya ngolinde, amolika na vana vendi va vanalume, na ava va vanakazi, na vingombe vendi, na vimulu vendi, na vimanga vendi, na mbalaka yendi, amo na vyuma vyoshe vije vyakele navyo, co vavatwalele ku Cana ca Tuyando. 25Co Yoshwa wamwihwile ngwendi, “Omwo vikajo unatunenela tuyando twangacije? Ololo nove Shukulu Kalunga akakuyandesa ku litangwa lya lelo!” Asinoni vanu voshe vamwashele mamanya nakumutsiya. Co lalo vashele mamanya naanga yendi nakwenyeka vufuko vwendi vwoshe. 26Co vavalundikile mutumbo wakama wa mamanya, nakweta ku litangwa lya lelo kuucili. Eci cikeco civatumbwilile mutambela uje ngwavo Cana ca Tuyando.
Asinoni vukalu vwa Shukulu Kalunga vwahwile.
The Bible in Mbunda ©The Bible Society of Zambia, 2006