Yoshwa 6
6
Kuwa kwa Yeliko
1Vikolo vya Yeliko vavipatele ngo nakuvinyunga kutewa vanu va Isalele vakovelamo. Naumo wai wasele kukovela nambe kutuuka mu nganda. 2Shukulu Kalunga wendekele kuli Yoshwa ngwendi, “Kenga, njinaaka Yeliko mu mavoko ove, na mwene wamwo, na mashwalale vamwo va nzili. 3Yove na mashwalale vove mukazenguluka nganda lumo a litangwa na litangwa a matangwa atanu na limo. 4Co vaka-kukombelela vatanu na vavali vakambata malupembo a vimbinga vya majamba a vimanga atanu na avali, vakatwame kulutwe lwa Cikasa ca Cikumiiyo. Co a litangwa lyamucitanu na avali yove na mashwalale vove mukazenguluka nganda visimbu vitanu na vivali oku vaka-kukombelela valinakwimba malupembo. 5Asinoni vaka-kukombelela vakaimbe lupembo simbu yakama, co omo mukaziva kwoya kwa lupembo olu, co vanalume voshe vakatambeke manene mutambi wa nzita, co civumbe ca nganda cikalundumuka. Co lishwalale na lishwalale akakovelele mu nganda aje anashungama.”
6Ngecivene, Yoshwa muna Nune wasanene vaka-kukombelela, wavalekele ngwendi, “Ambateni Cikasa ca Cikumiiyo, co vaka-kukombelela vamo vatanu na vavali vambate malupembo atanu na avali vatwame kulutwe lwa Cikasa ca Cikumiiyo.” 7Co washikile vanu ngwendi, “Yeni muzenguluke nganda, co vaka-kulipakata vitwa vatwame kulutwe lwa Cikasa ca Cikumiiyo ca Shukulu Kalunga.”
8Omo Yoshwa nendeka laja na vanu, co vaka-kukombelela vatanu na vavali vaje vambatele malupembo atanu na avali vatwamene kulutwe oku valinakwimba malupembo, asinoni Cikasa ca Cikumiiyo ca Shukulu Kalunga cavakavele munima. 9Co vanalume vaje valipakatele vitwa vatwamene kulutwe lwa vaka-kukombelela vaje vakele nakwimba malupembo, co mbunga yakumanesela yezile munima ya Cikasa oku malupembo anga alinakwimba. 10Oloni Yoshwa washikile vanu ngwendi, “Kesi mutambeke, nambe kwendeka lijwi limo noo a litangwa lije njikamishika kutambeka. Asinoni mukatambeka!” 11Ngecivene, wavalekele vambate Cikasa ca Cikumiiyo ca Shukulu Kalunga vacizengulwise nganda lumo. Asinoni vanu velukile ku cilombo nakukalalako. 12Alikaki Yoshwa wendukile mutondo-tondo, co vaka-kukombelela vambatele Cikasa ca Cikumiiyo ca Shukulu Kalunga. 13Co vaka-kukombelela vaje vambatele malupembo atanu na avali a vimbinga vya majamba a vimanga vatwamene kulutwe lwa Cikasa ca Cikumiiyo ca Shukulu Kalunga oku valinakwimba malupembo, co vaje vanalume vaile kulutwe lwavo, asinoni mbunga yakumanesela yezile munima ya Cikasa ca Cikumiiyo ca Shukulu Kalunga, oku malupembo anga alinakwimba. 14Ngecivene, a litangwa lyamucivali vazengulukile lalo nganda lumolika, co velukile ku cilombo. Valingile eci a matangwa atanu na limo.
15Co a litangwa lyamucitanu na avali vendukile a mungulungengu, vazengulukile nganda visimbu vitanu na vivali mu ngila ije vene, eli likelyo litangwa lika lije vazengulukile nganda visimbu vitanu na vivali. 16Co omo vazengulukile nganda simbu yamucitanu na vivali, vaka-kukombelela vembile malupembo, co Yoshwa washikile vanu ngwendi, “Tambekeni, omwo Shukulu Kalunga namyana nganda! 17Nganda na vyuma vyoshe vilimo mukavyana kuli Shukulu Kalunga nakuvinyongesa vyoshe njwa, kuvanga lika uje cikwizi Lahave na vavushoko vwendi vali mu njuvo yendi vakevo lika vakayoyao, omwo ikeye washwekele vaka-kunenga vaje twatumine. 18Oloni yeni kumwapandele kwambatako cuma cimo ku vije vyakunyongesa, nga mulingamo, co mukanena cisingo na tuyando mu cilombo ca vaIsalele. 19Oloni siliva yoshe, na ngolinde, na vivala vya vunengu, na vikuvo vinapu vyakukundika kuli Shukulu Kalunga. Munapande kuvyaka mu cipau ca Shukulu Kalunga.”
20Ngecivene, vaka-kukombelela vembile malupembo, co vanu vatambekelele. Vwasi-vwasi omo vanu vazivile kwoya kwa malupembo, co vatambekelele manene, ngeci civumbe calundumukile. Co lishwalale na lishwalale woshe wakovelele mu nganda aje ashungamene nakuyifungulula. 21Vanyongesele vyuma vyoshe vya mu nganda, co vatapele vanalume, na vanakazi, na vanike, na tukulukazi na moko ya mukwale. Vatsiile lalo vingombe, na vimanga, na vimulu.
22Asinoni Yoshwa walekele vanalume vavali vaje vanengele lifuti ngwendi, “Yeni ku njuvo ya uje cikwizi mukamunene na naanga yendi, ngwe muje mumwamukulaesele.” 23Ngecivene, vaje vanalume vanengele lifuti vakovelelemo vatuwisile Lahave, na ishe na vaina, na vandolome vendi, na naanga yendi yoshe. Co vavatuwisilemo voshe na naanga yendi yoshe na vindungo, vavaakele anja ya cilombo ca vaIsalele. 24Asinoni venyekele nganda ya Yeliko na vyoshe vije vyakelemo, kuvanga lika ngolinde, na siliva, na vivala vya vunengu, na vikuvo. Co vije vavyambatele nakuvyaka mu cipau ca Shukulu Kalunga. 25#VaHe 11:31 Oloni Yoshwa wayoyeselemo lika mwonyo wa cikwizi Lahave na vavushoko vwendi voshe, omwo ikeye washwekele vaje vaka-kunenga lifuti vavali vavatumine ku Yeliko. Co naanga ya Lahave vacili nakuyoya mu Isalele na lelo lino. 26#1 Vim 16:34 A simbu ije Yoshwa walisingile cisingo ngwendi, “Munu woshe uje akatungulula nganda ya Yeliko akapwe wakusinga ku mesho a Shukulu Kalunga.
Woshe uje akainda luvula,
munendi wa ntwatwa akatsa,
co woshe uje akatungulula vikolo,
munendi wa mutinikila akatsa.”
27Ngecivene, Shukulu Kalunga wakele amo na Yoshwa, co lutsimo lwendi lwashandokelele mu lifuti mwoshe.
The Bible in Mbunda ©The Bible Society of Zambia, 2006