Yombi 40
40
1Shukulu Kalunga wendekele kuli Yombi ngwendi,
2“Kuma uje muka-kuwanena vakwavo milonga
asa kusompa na Muka-nzili yoshe ndi?
Woshe uje ali na vimata na Njambi,
mweceleni akukumbulule.”
Yombi akumbulula
Yombi
3Asinoni Yombi wakumbulwile Shukulu Kalunga ngwendi,
4“Kenga, yange iyajo ngeci njikukumbulule?
Vikajo vinjikukumbulula?
Yange nalumo lwai njikendeka lalo.
5Njinendeka lumo kunahu,
co kunjikakumbululako lalo,
njinendeka visimbu vivali,
oloni kunjikatwalao lalo embwe.”
Kukumbulula kwa Shukulu Kalunga
6Asinoni mu kankumba kakama
Shukulu Kalunga wakumbulwile Yombi ngwendi,
7“Kolesa ngwe munalume,
co kumbulula vihula vyange.
8Kuma yove ulinakweseka kunjiwanena mulonga
ngeci yange njihye yove usambe ndi?
9Kuma yove uli na nzili ngwe yange ndi?
Kuma lijwi lyove lyasa kukala
na cililimo cakama ngwe lyange ndi?
10Nga ngoco ni, zala kasingimiko kove
na kulyalesa ngwe vuzalo,
co zala vukama na vumpau ngwe mwiva.
11Mwesa vukalu vwove vwakama,
kenga voshe vaje vaka-kulyalesa
ngeci uvononwese.
12Kenga ali voshe vaje vaka-kulyalesa
ngeci valikeese,
tsena vaka-vuvi aje avanemana.
13Vatsinde mu livu voshe,
co vakutiiye mu lifuti lya vatsi.
14Co njikapwa yange wakulivanga kukushangala,
nakutava ngeci unahyana.
15Kenga Mbehemote#40:15 MBEHEMOTE: Wapwa kasitu, vamo vamwesekesa na nguvu, vamo lalo vamwesekesa na cikashama umo wa ku san̄ulu. uje injatangele
ngwe munjatangele yove.
Ikeye akali mwila ngwe ngombe,
16kenga oni nzili yendi
ije yakala mu muvila wendi,
na nzili yendi ije yakala mu mishuni
ya mwimo lyendi!
17Mukila wendi watindivala ngwe muti wa kendale,
co mishuni ya mu mendi endi yapwa ya nzili.
18Vitsiya vyendi vyakala na nzili ngwe vunengu,
co mendi endi alifwa ngwe mikambo ya vutale.
19“Ikeye wapwa wakukomokesa
ku vitanga vyange vyoshe!
Kuvanga muka-kumutanga lika ikeye asa kumufungulula.
20Mwila wakali ukamene lika ku malundu,
kuje kuvakeela vikashama.
21Ikeye akakala mwisi ya maputa a mambimbo,
co akavanda mukati ka mahongo a mu likava.
22Co maputa a mambimbo,
na minango ya kutepama ya ku ngenge ya muna ndonga,
ikeyo yapwa minzinzime yendi.
23Ikeye kesi kutewa cingungumuta.
Akasimpi omo Ndonga ya Yondau
iitisa mema ayo ku mesho endi.
24Iyajo asa kutsitsivalesa
mesho endi nakumufungulula?
Nambe iyajo asa kukwata lijulu lyendi mu mweto?
The Bible in Mbunda ©The Bible Society of Zambia, 2006