Isaya 62
62
1Njikendeka nakutakamesa Yelusalema,
kunjikoloka kuluu embwe
kuvanga noo inovoka, co kuhyana kwendi
kukavyazima ngwe ndeya ku vutsiki.
2Yelusalema, miyati ya vanu voshe
vakamona kuhyana kwove!
Vimyene vavo voshe
vakamona vumpau vwove.
Shukulu Kalunga vavenya,
akakwana lizina lyaliha.
3Ukapwa ngwe cilongo cacivwa
ca Shukulu Kalunga.
4Kuvakakutumbula ngwavo,
“Nganda ivanaseze.”
Nameme lifuti lyove
kuvakalitumbula ngwavo,
“Munakazi wa mumba.”
Oloni lizina lyove lyaliha likapwa
“Njambi Avwaelela Nendi.”
Lifuti lyove vakalitumbula ngwavo,
“Nashomboka Nakuvwaelela.”
Omwo Shukulu Kalunga navwaelela nove,
co akapwa ngwe munalume ku lifuti lyove.
5Ngwe mukwenje ambata mumbanda
uje kanda alimone na munalume
kupwa shombolwa yendi,
uje wakutangele akakwambata.
Ngwe muka-kwambata avwaelela
na shombolwa yendi,
ngeci Njambi yove akavwaelela muli yove.
6Yelusalema njinaka vaka-kunyunga
a vivumbe vyove.
Vipangi vyavo vinapu kwendeka mutanya na vutsiki,
vanapande kwanukisa Shukulu Kalunga
vikulaeso vyendi kwakwonwa kuvivala.
7Kuvapandele kumuhwimisa kuvanga noo
nendula Yelusalema,
nakuyipwisa nganda ije
ivakashangazala vaka-kaye voshe.
8Shukulu Kalunga nalingi cikulaeso,
na nzili yendi ngwendi,
“Vimbuto vyeni kuvikapu lalo vyakulya vya vitozi vyeni.
Na vaka-kwija kuvakanu lalo vinyu veni embwe.
9Oloni yeni mwakunine na kuteja vimbuto
mukalya makende,
co mukashangazala Shukulu Kalunga.
Yeni mwakongweyeye nakuungulula
mikolovozi ya vushuka vwa vinyu,
mukanwa vinyu mu vimbanja vya njuvo yange.”
10Eni vanu va Yelusalema,
tuukeni mu nganda,
vwaeseni tapalo ya vanu veni vaje valinakwiluka!
Vwaeseni tapalo, kombenimo mamanya!
Junduleni cizivukiso
ngeci miyati ya vanu vazivuke kwakuya.
11 #
Isa 40:10; Kuj 22:12 Shukulu Kalunga alinakwendeka
ku vanu voshe va mu kaye ngwendi,
“Lekeni vanu va Yelusalema ngweni,
Shukulu Kalunga alinakwija
nakwovola nganda ya Siyone,
nakwana vanu vamwo cikandelela.”
12Vakamitumbula ngwavo,
“Vanu Vakujela va Njambi.”
“Vanu Vanamena Shukulu Kalunga.”
Yelusalema vakaitumbula ngwavo,
“Nganda Yazema Njambi.”
“Nganda Ije Kevalele Njambi.”
The Bible in Mbunda ©The Bible Society of Zambia, 2006