Hoziya 9
9
Hoziya ambulula vyakunyanyamesa Isalele
1Vanu va mu Isalele, likeleni kulinga viwano vyeni vyakulisamba ngwe vaka-kujeneka kukulaela. Munatengulukila kweka nakutunda kuli Njambi yeni, co kumwapwile va kulongwa kuli ikeye. Co mu lifuti mwoshe munalilandesa yeni vavenya ngwe vikwizi kuli Mbale nakuzema vimbuto vije mwayongwele ngweni ikeye wamifwetelevyo! 2Oloni ololo kumukakala na vimbuto vyakupwisamo, na mazi a olive, co kumukakala na vinyu. 3Vanu va mu Isalele kuvakasala mu lifuti lya Shukulu Kalunga, oloni vakeluka ku Ingito, co vakalya vyakulya vyakujeneka kujela#9:3 VYAKULYA VYAKUJENEKA KUJELA: Lishiko lya Mosesa lyavindikile kulya vyakulya vimo vayongwele ngeci vinapu vyakujeneka kujela (kenga vaLevi 11). mu lifuti lya Asilya. 4Co mu mafuti aje a vungenzi kuvakasa kukombelelamo vin̄ombelo vya vinyu kuli Shukulu Kalunga, nameme kunena vin̄ombelo vyavo kuli ikeye embwe. Vyakulya vyavo vikajwalesa munu woshe uje akavilya, ngwe vyakulya vyakulila mu myala. Vakavipangesa lika kushulisa mafu avo, nacimo cai civakatwala ku Njuvo ya Shukulu Kalunga kupwa mulambu. 5Vakalinga vati omo simbu ya matangwa a viwano vivemika vya kusingimika Shukulu Kalunga iketa? 6Omo tuyando twakama tukaija, co vanu voshe vakalishandoka, co vaka-Ingito vakavakungulula, vakavakungulula nakuvatsinda ku Mefise! Vufuko vwavo vwa ngolinde na mitambela aje vatungilile membo avo vikakupuka mu shaku na mu mambimbo.
7 #
Luk 21:22
Simbu yakunyanyamesa inete, simbu ije omo vanu vakatambula vije vinavapande. Omo cuma eci cikalingiwa, Isalele vakacizivuka! Mulinakwendeka ngweni, “Ou muka-kwimanena napu cikolokomba. Munalume ou wa Njambi nazaluka.” Yeni vanu mwanjizinda manene omwo vuvi vweni vunapu vwavungi manene. 8Njambi nanjitumu kupwa muka-kwimanena wakunangula vanu vendi va Isalele. Oloni kwoshe kuje kunjiila, mweseka kunjitela nganjo ngwe nji kazila. Nameme mu Njuvo ya Shukulu Kalunga vanu vanapu vitozi va muka-kwimanena. 9#Maa 19:1-30 Vanapu vavavi manene mu vije valinakulinga, ngwe muje muvafwile ku Ngimbeya. Njambi akanuka vuvi vwavo nakuvanyanyamesa.
Tuyando tuje twezilile Isalele omwo ya vuvi vwavo
10 #
Kul 25:1-5
Shukulu Kalunga alinakwendeka ngwendi, “Omo njawanene Isalele akulivanga, capwile ngwe munu nawana mikolovozi ya vushuka vwa vinyu vumena mu mambo. Omo njamwene vakukulwila veni akulivanga, capwile ngwe kumona vushuka vwa mukuyu vwakulivanga kuhya akushangumuka kwa mwaka. Oloni omo vezile ku Munkinda wa Peole, co vashangumukile kulemesa Mbale, co vapwile va vunyengwe manene ngwe lalo vaje tumponya vavazemene. 11Vukama vwa Isalele vukapulwila kulyala ngwe kazila, co kukukasemuka lalo vana kuli vakevo, kukukakala lalo vanakazi va tufumba-kazi, naumo mwana ivakemita wai. 12Oloni nameme valela vana, anga njikavatambulavo naumo wai njikasezao wakuyoya. Omo njikajenjuka vanu ava, co vyuma vyavikalu vikalingiwa kuli vakevo.”
13Shukulu Kalunga, njilinakumona vana vavo valinakuvayomba nakuvatsiya. 14Vikajo njikulomba ngeci uvilinge kuli vanu ava? Pwisa vanakazi vavo mumba! Mavele avo ominine ngeci kesi vajamwese vana vavo!
Kusompa kwa Shukulu Kalunga ali Isalele
15Shukulu Kalunga alinakwendeka ngwendi, “Vilinga vyavo vya vuvi vyoshe vyashangumukilile mu Ngilingale. Kuje vene kukekwo njashangumukilile kuvazinda. Omwo a vuvi vuje vuvanalingi, co njikavasheka mu lifuti lyange. Kunjikavazeme lalo nalumo lwai, vantwama vavo voshe vananjitengulukila. 16Vanu va mu Isalele vanapu ngwe muti uje wakuma mizi, co kuwesi lalo nakwima vushuka. Kuvakakala lalo na vana, oloni nameme vakakala navo, co njikatsiya vana vavo vaje vavazema manene.”
Muka-kwimanena endeka ali Isalele
17Njambi uje njilinakupangela akavyana vanu vendi, omwo vanavyana kumutolilila. Vakapwa vaka-kwendangana akati ka miyati ya vanu.
The Bible in Mbunda ©The Bible Society of Zambia, 2006