Hoziya 8
8
Shukulu Kalunga ahisa Isalele akulemesa tumponya
1Shukulu Kalunga alinakwendeka ngwendi, “Imbeni mwondo wa nzita! Vitozi valinakucuncumukila mu lifuti lyange ngwe vingonga! Vanu vange vanapokola cikumiiyo cije njalikumiiye navo, co vanatengulukila vilongesa vyange nakuvilwisa. 2Nameme vanjitumbula ngwavo nji Njambi yavo nakutumbula ngwavo vapwa vanu vange, co lalo ngwavo vanjizivuka, 3oloni vanavyana vije vinapu vyavivwa. Omwo a vyuma evi, vitozi vavo vakavakavangeya.
4“Vanu vange vaangwile vimyene, oloni vacilingile mu cizango cavo vavenya. Vemikile vantwama, kwakujeneka vukaleo vwange. Co vambatele siliva na ngolinde yavo valingile tumponya, kulinyongesa vakevo vavenya. 5Njazinda ngombe wa nkomba wa ngolinde uje ivakalemesa vanu va mu nganda ya Samaliya. Njinaluvala navo manene. Simbu mukajo vakecela kulemesa tumponya twavo? 6Uje kamponya wamupangele mutongwe wa mu Isalele, co uje kamponya kesi njambi embwe! Uje ngombe wa nkomba wa ngolinde valemesa vanu va mu Samaliya vakamupujula vimbazuvwila-mbazuvwila! 7Omo vakuna lihunzi, vateja kankumba! Nga vimbuto vyakulinga makende kuvihi kuvasa kulinga makende embwe. Oloni nameme vihya, vaka-kwija vakavilya vyoshe njwa! 8Isalele vanemuka ngwe miyati yeka kuvesi na seo ngwe ndeo ya vuma ya kutsa. 9Vanu va mu Isalele vanakaluwa ngwe vimulu vavukalu, co valinakuya mu ngila yavo vavenya. Vanai nakukashakezeka vukwasi ku Asilya, co vanafwete mafuti eka ngeci vavanyunge. 10Oloni ololo njikavakungulula nakuvanyanyamesa. Ololo vakalikotinga mukuvinjoka omo mwene wa Asilya akavayandesa.
11“Vanu va mu Isalele vanawezelela mitula mukutundisa vuvi, oloni valinakutumisa lika mitambela yakulingila vuvi! 12Njisonekela vanu vilongesa vyavingi, oloni valinakuvivyana ngwavo vinapu vyakukomokesa vya vungenzi kuli vakevo. 13Vakombelela vin̄ombelo kuli yange nakulya situ ya vin̄ombelo. Oloni yange Kalunga, kunjesi nakuvwaelela navo embwe, njikanuka vuvi vwavo nakuvanyanyamesa, co njikavelwisa lalo ku Ingito!
14“Vanu va mu Isalele vanatungu mapela, oloni vanevala Muka-kuvatanga. Co vanu va mu Yunda vanatungu vinganda vya vimpaka. Oloni njikatuma tuhya mukwenyeka mapela avo na vinganda vyavo.”
The Bible in Mbunda ©The Bible Society of Zambia, 2006