Hoziya 5
5
1“Tolilileni vyuma evi, yeni vaka-kukombelela! Umbeniko mbunge, yeni vanu va mu Isalele! Tolilileni, yeni vaka-naanga ya vumwene! Munapandele kusompa mu vushunga, ngecivene, cihiso cikaija ali yeni! Yeni munapu ngwe nganjo ku Mizipa, munapu ngwe linimbwa lije vajangumwina a Munkinda wa Tambole. 2Yeni munapu ngwe mbulu ya ku Akasha, co njikaminyanyamesa yeni voshe. 3Njazivuka muje mwafwa Isalele, kasa kuvanda ku mesho ange embwe. Napu muka-kujeneka kulongwa kuli yange, co vanu vendi kuvafwilililemo mukunjilemesa.”
Hoziya alinakunangula a tumponya
4Vuvi vuje vuvanalingi vanu vunavonwesa kwiluka kuli Njambi yavo. Vanakakateya manene tumponya, co kuvesi nakwononoka Shukulu Kalunga. 5Co kulyalesa kwa vanu va mu Isalele kulinakumwesa mulonga wavo. Vuvi vwavo vulinakuvatanukisa nakuwa, co na vanu va mu Yunda valinakuwa amo navo. 6Co vatwala vimanga vavo na vingombe mukukombelela kuli Shukulu Kalunga, oloni valinakulipesa ngoco. Kuvasa kumuwana, omwo navaseza. 7Vanapu vakujeneka kulongwa kuli Shukulu Kalunga, co vana vavo kuvakundamene kuli ikeye embwe. Ngecivene, ololo vakevo na lifuti lyavo vakavanyongesa.
Nzita akati ka Yunda na Isalele
8Imbeni malupembo a nzita mu Ngimbeya! Imbeni mwondo wa nzita mu Lama! Tambekeni mutambi wa nzita mu Mbetele! Koveleni mu nzita yeni vanalume va Mbenjemani! 9Isalele akakala mu ngundu a litangwa lije omo kunyanyamesa ciketa. Vanu va Isalele, mwa vushunga vene cuma eci cikasholoka!
10Shukulu Kalunga alinakwendeka ngwendi “Yange njinaluvala omwo vantwama va mu Yunda vanakovelela Isalele nakwiva lifuti lyendi. Ngecivene, njikamwanyena cihiso ali vakevo ngwe livazi. 11Isalele valinakumuyandesa. Nazimbalesa lifuti lije lyapwile vufuko vwendi vavenya, omwo washakele manene kuya mukuwana vukwasi kuli vaje kuvasa kumwanavwo. 12Ngecivene, njikahisa Isalele, nakunyongesa vanu va mu Yunda.
13“Omo Isalele wamwene alinakuvinja, co omo Yunda wamwene vimbandu vyendi vavenya, asinoni Isalele waile ku Asilya nakukalomba mwene wakama mukumukwasa, oloni kasele kuvasaka nameme kukangwisa vimbandu vyavo. 14Njikalwisa vanu va mu Isalele na vanu va mu Yunda ngwe ndumba. Co njikavasanyozola vipuka-vipuka nakuvaseza. Omo njikavakokangeya nakuvatwala, naumo wai akasa kuvamena.
15“Co njikakengesa nima vanu vange noo vanapwisamo kuyanda omwo vivi vyavo, co vakeluka lalo nakunjishakezeka. Amo omo a tuyando twavo vakeseka kunjishakezeka.”
The Bible in Mbunda ©The Bible Society of Zambia, 2006