VaHevelu 4
4
1Ololo, Njambi natusezela cikulaeso ngeci tukakovele mukuhwima kuje kwendekele. Ngecivene, nyanyameni kutewa akati keni akakala umo kakakovela mukuhwima kuje kwanatukulaesa.
2Omwo tunazivi Vin̄anda Vyavivwa, ngwe muvavizivilile vakevo. Vazivile lijwi oloni kulyavakwasele, omo valizivile, co kuvalitambwile nakukulaela. 3#Mya 95:11 Ngecivene, yetu tunakulaela, tukakovela mukuhwima kuje kwakulaesele Njambi. Ngwe mwendekele ngwendi,
“Njaluvalele, co njalisingile ngwange,
‘Kumukakovela mu lifuti lije linjashakele kumyana
ngeci mukahwiminemo!’ ”
Ikeye wendekele evi nambe vipangi vyendi vyahwile tunde ku san̄ulu omo watangele kaye. 4#Kus 2:2 Omwo mu Visoneka vyeka vanendeka a litangwa lyamucitanu na avali ngwavo, “Njambi wahwimine a litangwa lyamucitanu na avali ku vipangi vyendi vyoshe.” 5#Mya 95:11 Evi vin̄anda vavyendekele lalo ngwavo, “Kumukakovela mu lifuti lije linjashakele kumyana ngeci mukahwiminemo.” 6Vaje vazivile Vin̄anda Vyavivwa akulivanga kuvakovelele mukuhwima omwo kuvakulaelele. Ngecivene, kuli veka oni vanavatavesa kukovelamo. 7#Mya 95:7-8 Ngecivene, cinasholoka ngeci Njambi nemika litangwa likwavo, eli vanatumbula ngwavo “Lelo.” Myaka yaingi kunima wendekele a litangwa eli kuli Ndaviti mu visoneka tunalava akamwa, ngwendi, “Lelo vene nga muziva lijwi lya Njambi, kesi mukaluwise vimbunge vyeni.”
8 #
Kwi 31:7; Yos 22:4 Nga Yoshwa wahwimisile vanu, nga Njambi kemikile lalo litangwa likwavo kulutwe. 9Nameme ngoco anga kunasala vanu va Njambi vahwime lumo ngwe mwahwimine Njambi a litangwa lyamucitanu na avali. 10#Kus 2:2 Omwo woshe uje akakovela mukuhwima kuje kwakulaesele Njambi akahwima ku vipangi vyendi ngwe mwahwimine Njambi ku vipangi vyendi. 11Ngecivene, tutakameni ngeci tukatambule kuhwima kuje, moneni ngeci naumo wai wetu onwe ngwe muvalingile vakevo omwo kuvakulaelele.
12Lijwi lya Njambi lilinakuyoya nakupanga, lyavambuka kuhyana moko ya mukwale ya vuvela kuvali. Lishalava mwoshe muje mukaliwanena mwonyo na munzinzime, na muje mukaliwanena manunga na vusoso. Likelyo liilula viyongola na vizango vya vimbunge vya vanu. 13Cuma nacimo cai cakushweka kuli Njambi, vyuma vyoshe vije vivatangele kukwesi cuma cakufwika, vyoshe vili anja ku mesho endi. Co kuli ikeye tuvavoshe tunapande kulyambulwila vyetu yetu vavenya.
Yesu ikeye Muka-kukombelela Wakama
14Ngecivene, tukakateyeni kukukulaela oku tunatava. Omwo tuli na Muka-kukombela Wakama uje ali ku mesho a Njambi, ikeye Yesu Muna Njambi. 15Omwo kutwesi na Muka-kukombelela Wakama uje kasa kututetela kukuzeya kwetu, oloni a cuma eci vene, tuli na Muka-kukombelela Wakama uje ivesekele mu vingila vyoshe ngwe yetu lalo, oloni kalingile vuvi. 16Ngecivene, tupweni vaka-kusimpa, akushwenya ku litanda lya Njambi, tukatambule mema ku mbunge na kutetela kuje akatukwasa omo tunajeneka.
The Bible in Mbunda ©The Bible Society of Zambia, 2006