VaHevelu 3
3
Yesu napu wakama kutuvakana Mosesa
1Vakwetu muli Yesu, vaje vasanene Njambi! Yongoleni ali Yesu, uje yatumine Njambi kupwa Muka-kukombelela Wakama kukukulaela kuje tunatava. 2#Kul 12:7 Wapwile wa kulongwa kuli Njambi, uje yangwile kulinga vipangi evi, ngwe Mosesa lalo wapwile wa kulongwa mu vipangi vyendi vyoshe vya mu njuvo ya Njambi. 3Muka-kutunga njuvo vamusingimika manene kutuvakana njuvo. Mu cifwa eci vene, Yesu nahyana kasingimiko kutuvakana Mosesa. 4Mwa vushunga, njuvo yoshe vaitunga kuli munu, oloni Njambi ikeye muka-kutunga vyuma vyoshe. 5Mosesa wapwile wa kulongwa mu njuvo ya Njambi ngwe ngamba, co wendekele vyuma vije vyakendeka Njambi kulutwe. 6Oloni Kilistu wapwile wa kulongwa ngwe Mwana ashika vya mu njuvo ya Njambi. Yetu tunapu njuvo yendi nga tukakateya nakusimpa nakutakamesa kwetu mu vije tuli navyo na cinyangavili.
Vanu va Njambi vahwima
7 #
Mya 95:7-11
Ngecivene, ngwe mwanendeka Munzinzime Wakujela ngwendi,
“Lelo vene nga muziva lijwi lya Njambi,
8kesi mukaluwise vimbunge vyeni
ngwe muvalingile vakukulwila veni omo vatengulukilile Njambi,
ngwe muvalingile litangwa lije mu mambo omo vamwesekele.
9Kuje vanjesekele mwanendeka Njambi ngwendi,
nambe vamwene vije vinjalingile a myaka makumi awana.
10Ngecivene, njaluvalele na vanu vaje,
co njendekele ngwange,
‘Visimbu vyoshe kuvesi nakwononoka,
valinakuvyana kwononoka mashiko ange.’
11Njaluvalele, co njalisingile ngwange,
‘Kumukakovela mu lifuti lije linjashakele kumyana ngeci vakahwiminemo!’ ”
12Vakwetu vaka-kukulaela, nyanyameni ngeci mukati keni kesi mukale umo ali na mbunge yaivi yakujeneka kukulaela ngeci atunde kuli Njambi wakuyoya. 13Oloni umo weni kesi vuvi vumukwise nakukaluwisa mbunge yendi, munapande kulinangula umo na mukwavo a litangwa na litangwa, ngwe mulinendeka lijwi mu visoneka ngwalyo “Lelo” lilinakupanga kuli yetu. 14Omwo tunatambula kuli Kilistu nga tukakateya na ku shongo kusimpa kuje twakele nakwo akulivanga.
15 #
Mya 95:7-8
Visoneka vinendeka ngwavyo, “Lelo vene nga muziva lijwi lya Njambi, kesi mukaluwise vimbunge vyeni ngwe muvalingile vakukulwila veni omo vatengulukilile Njambi.”
16Veya vaje vazivile lijwi lya Njambi, co vamutengulukilile? Vaje voshe vatwamenenene Mosesa vene calingiwile akuvatundisa mu lifuti lya Ingito. 17#Kul 14:1-35 Njambi waluvalele na veya myaka makumi awana? Ikeye waluvalele na vanu vaje valingile vuvi, vaje vatsililile mu mambo. 18Omo Njambi walisingile ngwendi, “Nalumo lwai vakakovela mu lifuti lije njinesi kuvana ngeci vahwiminemo.” Wendekele kuli veyajo? Wendekele kuli vaje vamutengulukilile. 19Ngecivene, tumona ngeci kuvasele kukovela mu lifuti omwo kuvakulaelele.
The Bible in Mbunda ©The Bible Society of Zambia, 2006