Ngalatiya 6
6
Lyambateseni vitele umo na mukwavo
1Vakwetu, nga munu umo vanamuwana na mulonga umo wa kupenga-penga, vaje veni vanakolo mukukulaela vanapande kumushungamesa, oloni munapande kucilinga mu ngila yaivwa. Oloni liiluleni yeni vavenya, kutewa neni mukakala mu ceseko lalo. 2Likwaseni kulyambatela vitele umo na mukwavo, co mu ngila eyi mukononoka#6:2 MUKONONOKA: Kunungulula kumo ngwavo, mwononoka. lishiko lya Kilistu. 3Nga munu umo ayongola ngeci napu wakama oloni kesi mukemwo mwanapu, alinakulikwisa lika ikeye vavenya. 4Co umo na umo asompe futisi yendi vavenya. Nga ikeyo inapu yaivwa, asinoni alyalese a vije vyanalingi, kujeneka kuviseteka na vije vyanalingi munu weka. 5Munu na munu alyambatele citele cendi vavenya.
6Munu uje valinakulongesa lijwi lya vuka-Yesu napande kulipangela vyuma vyoshe vyavivwa vije alinavyo na mulongisi wendi.
7Kesi mulikwise yeni vavenya, naumo wai ashendumuna Njambi. Munu ateja vije vyanakuvile. 8Nga ukuna mu lihya lya cisemwa ca mashungu ove, ku cikeco ukakungulula na kuteja kutsa, nga ukuna mu lihya lya Munzinzime, ku Munzinzime ukakungulula na kuteja mwonyo wa myaka yoshe. 9Ngecivene, kesi tujuke mukulinga mwamuvwa embwe, omwo nga kutujuka, simbu ikaija omo tukateja. 10Ngecivene, ngwe omo tuli na simbu, tunapande kulingila vuvwa kuli munu na munu, vunene vene kuli vaje vanakundama ku naanga yetu mukukulaela.
Kunangula cakumanesela na ciindu
11Kengeni kwama kwa mikanda injikamisonekela ololo na livoko lyange vavenya! 12Vanu vaje valinakweseka kumisindiya ngeci mutuuke vakevo vaje vashaka kulimwesa na kulyalesa a vin̄anda vya anja. Nameme ngoco, vakevo valinakucilinga ngeci kesi vavapakese omwo cilindakano ca Kilistu. 13Nameme vaje vatuuka kuvesi nakwononoka Lishiko, vashaka yeni mutuuke ngeci valyalese ngeci ngwavo yeni mwatava ku cilika eci ca cisemwa. 14Ngwe ali yange, nameme ngoco, yange njikalyalesa lika a cilindakano ca Mwene yetu Yesu Kilistu, omwo a cilindakano cendi kaye kanatsi kuli yange, co yange lalo njinatsi ku kaye. 15Kukwesi mulonga wai nameme kutuuka nambe kujeneka kutuuka, oloni cije cikwasa cinapu kupwa wakutanga kwakuhwa. 16Ngwe ali ava valinakukava lishiko eli mukuyoya kwavo, kwoloka na mema ku mbunge vikale navo, vikale navo na voshe vanu va Njambi!
17Mukumanesela ngwange, kesi kukale umo anjane vukalu, omwo viveve vinjilinavyo a muvila wange vimwesa ngeci yange nji ndungo ya Yesu.
18Kutetela kwa Mwene yetu Yesu Kilistu kukale amo neni voshe, vavusamba vange. Ewa.
The Bible in Mbunda ©The Bible Society of Zambia, 2006