Ngalatiya 5
5
Nyungeni kupatuka kweni
1Kupatuka kukekwo tulinakwo, Kilistu natupatula! Ngecivene, imaneni ngwe vanu vakupatuka, co kesi mulyecelele yeni vavenya lalo kupwa vindungo.
2Tolilileni, yange Paulu njimileka ngwange nga mulyecelela yeni vavenya kutuuka, co eci cinalumbunuka ngeci kuma Kilistu kesi na seo kuli yeni voshe. 3Njiilukilamo lalo kunangula munu woshe uje alyecelela ikeye vavenya kutuuka, ikeye nakutiwa mukunyunga Mashiko oshe. 4Vaje veni veseka kulipwisa vaka-vushunga ku mesho a Njambi akwononoka Mashiko vanavatukiya vakevo vavenya nakutunda kuli Kilistu. Munatundu ku kutetela kwa Njambi. 5Ngwe ali yetu, cinyangavili cetu cinapu ngeci Njambi akatupwisa vaka-vushunga ku mesho endi, co eci cikeco tulinakuvandamena a nzili ya Munzinzime wa Njambi uje alinakupanga mukukulaela kwetu. 6Omwo tuli amo muli Kilistu Yesu, nambe kutuuka nambe kujeneka kutuuka kuvyasa kulinga cuma cimo, cuma cakama lika kukulaela cije cilinakupanga mu cizemo.
7Mwakele nakulinga mwamuvwa! Iyajo namivindika kwononoka vushunga! Iyajo wamisindiiye? 8Eci kacilingile Njambi, uje alinakumisana. 9#1 Koli 5:6 Ngwe muvakendeka ngwavo, “Kamusima kakandondo lika kakafutunwisa mukasha wose wamutunu.” 10Oloni yange anga njicili na lukakateya ali yeni. Mwonyo wetu muli Mwene ulinakunjilingisa lukakateya ngeci kumukakala na viyongola vyeka, co uje munu alinakumitanganesa, nambe wapwa iya, Njambi akamunyanyamesa.
11Oloni ngeci mwange, vakwetu, nga njicitwalao kwambulula ngwange kutuuka kunapu kwakuvwa,omwo vikajo vacili nakunjipakesela? Nga eci capwile ca vushunga, cooni kwambulula kwange kwa cilindakano ca Kilistu nga kucilingisa vitanga. 12Njishaka ngeci vanu vaje valinakumitanganesa kesi valengesele aa lika, veceleni vatwaleo nakulipwisa vayunuke!
13Ngwe ali yeni, vakwetu, vamisanene mukupatuka. Oloni kesi mutave kupatuka oku kupwe lisesa lyakumyecelela ngeci mashungu eni a vunu amipangese. Oloni taveni cizemo cimipwisa vangamba va umo na mukwavo. 14#VaLe 19:18 Omwo Mashiko oshe amutunu vanalilavelao mukushika kumo ngwavo, “Zema mukweni ngwe muwalizema yove vavenya.” 15Oloni nga mulinga ngwe tusitu, kulitwa vimbandu nakulivulumuna umo na mukwavo, co nyanyameni, kutewa mukalinyongesa umo na mukwavo.
Munzinzime na cisemwa ca vunu
16Evi vikevyo njendeka ngwange, eceleni Munzinzime atwamenene myonyo yeni, co mukenukwa mashungu a cisemwa ca vunu. 17#Lom 7:15-23 Omwo cisemwa cetu ca vunu cilinakulwisa vije vyashaka Munzinzime, co lalo vije vyashaka Munzinzime vilinakulwisa vije vishaka cisemwa cetu ca vunu. Vyoshe evi vivali vyakala mu vutozi, co eci cinalumbunuka ngeci yeni kumwasa kulinga vije vimushaka kulinga. 18Oloni nga Munzinzime alinakumitwamenena, co yeni kumwesi mwisi ya Mashiko.
19Vije vicilinga cisemwa ca vunu vinatungukwa manene. Cilimwesa cikeco vavenya mu vupangala nakulijwalesa na vilinga vya kukezima, 20mukulemesa tumponya na mu vulozi. Co vanu vakapwa vitozi, vakalwa, co vakapwa vaka-cipululu, vaka-matoto, na vaka-kulyaka ku vukama. Co vakalyangunuka mu vimbunga na mu vimunga, 21vakevo vaka-mafuwa, vaka-kupenda nakukina nakulinga vyuma vyeka ngwe evi. Njilinakuminangula ngwe munjaminangwile laja ngwange, vaje voshe valinakulinga vyuma evi kuvakakovela mu Vumwene vwa Njambi.
22Oloni vushuka vwa Munzinzime vunapu cizemo, kujolela, kwoloka, lukakateya, ngozi, vuvwa, kulongwa, 23kulikeesa nakulinyunga. Kukwesi lishiko livindika vyuma vya cifwa eci. 24Co voshe vaje vanakundama kuli Kilistu Yesu vanatsii cisemwa cavo ca vunu na mashungu aco oshe. 25Munzinzime natwana mwonyo, co napande lalo kunyunga myonyo yetu. 26Kutwapandele kupwa vaka-kulyalesa nambe kulishangumuna umo na mukwavo nambe kukala na cipululu kuli umo na mukwavo.
The Bible in Mbunda ©The Bible Society of Zambia, 2006