Efeso 6
6
Vana na visemi
1 #
Kol 3:20
Eni vanike, ononokeni kuli visemi veni muli Mwene,#6:1 ENI VANIKE, ONONOKENI KULI VISEMI VENI MULI MWENE: Kunungulula kumo ngwavo, eni Vanike, kanapu kapandi keni ka vuka-Yesu kwononoka kuli visemi veni. omwo eci cikeco cuma cacivwa kucilinga. 2#Kut 20:12; Kwi 5:16 “Singimikeni vaishweni na vanyokweni” eli likelyo lishiko lyakulivanga livawezelelako ku cikulaeso ngwavo, 3“Ngeci vyoshe vikapwe vyavivwa kuli yeni, co mukayoya simbu yakama mu lifuti.”
4 #
Kol 3:21
Eni visemi, kesi mushangumune vana veni, oloni valeleni mu kalemeso na mu vilongesa vya vuka-Yesu.
Vindungo na vashukulu vavo
5 #
Kol 3:22-25
Eni vindungo, ononokeni kuli vashukulu veni va ano asi na lyova nakujaja, co lingeni eci na mbunge ya lyovwa-ovwa, ngwe vene mulinakupangela Kilistu. 6Lingeni eci kesi omo valinakumikengelela, omwo mushaka kuvwaesa ku vimbunge vyavo embwe, oloni na vimbunge vyeni vyoshe lingeni vije vyashaka Njambi, ngwe vindungo va Kilistu. 7Lingeni vipangi vyeni vya vundungo nakujolela, ngwe mulinakupangela Mwene, kesi ngwe vanu. 8Anukeni ngeci Mwene akafweta munu na munu, nambe ndungo nambe wakupatuka, kupwisa ku vipangi vyendi vyalinakulinga.
9 #
Kwi 10:17; Kol 3:25; 4:1 Eni vashukulu vavo, lingeni lalo cifwa cimo kuli vindungo veni, co kesi muvashungwiye. Anukeni ngweni yeni na vindungo veni muvavoshe mwakundama kuli Shukulu umolika ali mwilu, uje asompa munu na munu mu cifwa cimolika.
Vitwa vyoshe vya Njambi
10Akukotoka, koleseniko muli Mwene na mu nzili ya vukama vwendi. 11Zaleni vitwa vyoshe vije vyanamyana Njambi, ngeci mwase kwimana nakulwisa matumbe amavi a Liyavola. 12Omwo kutwesi nakulwa na vanu embwe, oloni tulinakulwa na nzili yavivi vya minzinzime ya a mukambwila na vaka-kushwana na vaka-moko ya kushika na ava vaka-kushwana na nzili mu lisusulungu eli lya myaka ino iliko. 13Ngecivene, zaleni vitwa vya Njambi ololo! Co omo litangwa lyalivi liketa, mukase kwimana nakulwisa uje citozi akamilwisa, co omo munalu nakweta ku shongo, mukasa kwimana mbe.
14 #
Isa 11:5; 59:17 Ngecivene, livwaeseleni cimweja, na vushunga munalizitikavwo ngwe mwiva mu vimbunda vyeni na kulongwa ngwe ntelo a vinulo vyeni, 15#Isa 52:7 co ngwe vin̄aku ku myanja yeni, mukulivwaesela cimweja kwambulula Vin̄anda Vyavivwa vya kwoloka. 16Simbu yoshe ambateni kukulaela ngwe ntelo, omwo na ikeyo mwase kuzima mikili ya tuhya ya Uje Muka-vuvi. 17#Isa 59:17 Co zaleni tepa yakwovoka, na lijwi lya Njambi ngwe moko ya mukwale ije yanamyana Munzinzime. 18Lingeni vyoshe evi mukulombela, lombeni Njambi ngeci amikwase. Lombeleni simbu yoshe ngwe omo Munzinzime amitwamenena. Omwo a cuma eci toneni kesi mujuke, lombeleni visimbu vyoshe ali vanu va Njambi. 19Co nange lalo njilombeleleniko, ngeci Njambi anjane lijwi omo njalivwaesela kwambulula, ngeci njambulule nakusimpa nakusholola cisin̄iko ca muzimbu wauvwa. 20Omwo a lizina lya lijwi eli yange njinapu nji muka-kwimanenako, nambe ololo njili mu kamenga. Lombeleni ngeci njisimpe mukwambulula muzimbu wauvwa ngwe munjinapande.
Viindu vyakumanesela
21 #
Vil 20:4; 2 Tim 4:12 Ngecivene, Taikikase, ndolome yetu na ngamba yetu itwazema mu vipangi vya Mwene, akamileka muzimbu woshe wa ali yange, ngeci muzivuke vati njinendukila. #Kol 4:7-8 22Eci cikeco cuma njamutumina kuli yeni, ngeci akumileke vati yetu voshe mutunendukila, co akatakamesa lalo vimbunge vyeni.
23Njambi Tatetu na Mwene Yesu Kilistu vaane kuli vaka-Yesu voshe kwoloka na cizemo mukukulaela. 24Kutetela kwa Njambi kukale na voshe vaje vazema Mwene yetu Yesu Kilistu na cizemo ca ku myaka yoshe.
The Bible in Mbunda ©The Bible Society of Zambia, 2006