Muka-kwambulula 11
11
Vije vyanapande kulinga munu wa mana
1Pangesa vimbongo vyove mu vipangi vyakulanda nakulandulula, co a litangwa limo ukawanao vimo. 2Aka vyove vije ulinavyo mu mitambela yakuliseza-seza, omwo kuuzivuka litangwa lije tuyando tukwizila.
3Kuje kuwila muti kukekwo vene kuukalala. Omwo mashelwa anatimiiya, co nyonzi inyoka. 4Nga uvandamena lihunzi kuukakunu, co uje avandamena mashelwa kakateje. 5Naumo wai azivuka vati mwana akahwimi omo ali mwimo, ngecivene, naumo wai azivuka vipangi vya Njambi uje watangele vyuma vyoshe. 6Kuna mbuto yove mutondo, co twalao nakupanga noo cingwezi. Iyajo azivuka? Amo vipangi vyove vikapwa vyakuvezika, na vimbuto vyove vikamena nakwima vyakulya.
7Ceke cinapu cacivwa, co mbunge ivwaelela a kumona litangwa. 8Kandelela a mwaka na mwaka omwo ulinakuyoya, nambe uyoya simbu yakama, anuka ngeci ukatsa. Kukwesi cuma cimo ciwukakengelela kulutwe.
Kunangula vakwenje
9Vakwenje vwaeleleni a vukwenje vweni, pweni vaka-kuvwaelela simbu mucili mu vakwenje. Lingeni vyoshe vimushaka kulinga, co kaveni mashungu a vimbunge vyeni. Oloni anukeni ngweni, Njambi akamisompa a vije vyoshe vimulinakulinga.
10Kesi mulishoshomwene mu vimbunge vyeni, nambe kuvavalesa vimbunge vyeni, omwo simbu ya vukwenje vweni inapu yaindondo.
The Bible in Mbunda ©The Bible Society of Zambia, 2006