Kwituluka mu Mashiko 4
4
Mosesa ashika Isalele vononoke
1Asinoni Mosesa wendekele kuli vanu va Isalele ngwendi, “Ononokeni mashiko oshe aje anjimilongesa, ngeci mukayoye nakukala mu lifuti lije lyakamyana Shukulu Kalunga Njambi ya vakukulwila veni. 2#Kuj 22:18-19 Kesi mukawezeleleko cuma cimo ku evi vinjimishika, co kesi mukatundiseko lalo cuma cimo embwe. Oloni ononokeni mashiko a Shukulu Kalunga Njambi yeni aje anjinamishiki. 3#Kul 25:1-9 Yeni vavenya mwalimwenenene na mesho eni vije vyalingile Shukulu Kalunga ku Munkinda wa Peole. Wanyongesele voshe vaje valemesele Mbale, 4oloni yeni mwakakateyeye nakukulaela Shukulu Kalunga Njambi yeni, na lelo lino mucili nakuyoya.
5“Njinamilongesa mashiko oshe, ngwe muje mwanjishikile Shukulu Kalunga Njambi yange ngeci mukawononoke mu lifuti lije limukakovela nakulishwana. 6Ngecivene, ononokeni mashiko, co eci cikamwesa vanu va miyati yeka mana eni. Omo vakaziva mashiko oshe awa, co vakendeka ngwavo, ‘Mwa vushunga muyati ou vali na mana nakuzivisisa kwakuvwa!’
7“Kukwesi muyati weka wakama lalo, nambe wakufwa vati, vaje vali na njambi yavo muyehi, omo vakevo vamushaka, ngwe Shukulu Kalunga Njambi yetu ali netu. Ikeye atukumbulula omo tulomba kuli ikeye. 8Kukwesi muyati weka wakama lalo nambe wakufwa vati, uje uli na mashiko akushungama ngwe awa njamilongesa ku litangwa lya lelo.
9“Nyanyameni nakulinyunga! Kesi mwivale vije mwamwene na mesho eni, kutewa vitunda mu vimbunge vyeni matangwa oshe akuyoya kweni, ngeci mukavileke vana veni na vatekulwila veni. 10Anukeni litangwa lije mwemanene ku mesho a Shukulu Kalunga Njambi yeni ku Munkinda wa Sinai, omo Shukulu Kalunga wendekele kuli yange ngwendi, ‘Kungulula vanu. Njishaka valizivile vakevo vavenya evi njendeka, ngeci valilongese kunjizivila lyova matangwa oshe akuyoya kwavo mu lifuti, ngeci vakavilongese kuli vana vavo.’
11“Mwashwenyele kuyehi nakwimana kwisi ya munkinda uje washwamene na tuhya twakweta ndo na mwilu, na mashelwa akuzivala na lisusulungu vwi. 12#Kut 19:16-18; VaHe 12:18-19 Asinoni Shukulu Kalunga wendekele kuli yeni oku ali mukati ka tuhya, co mwazivile lika omo mwakele nakwendeka, oloni kumwamwene cifwa cendi embwe. 13#Kut 31:18; 34:28; Kwi 9:10 Ikeye wamilekele vije mwapande kulinga mukunyunga cikumiiyo cije mwalikumiiye nendi, cakunyunga Mashiko Likumi, aje ikeye waasonekele a vitale vivali vya mamanya. 14#Kut 21:1 Shukulu Kalunga wanjilekele ngeci njimilongese vilongesa na mashiko oshe aje amunapande kunyunga mu lifuti lije limukashwana lili musambwa ya Ndonga ya Yondau.
Mosesa anangula vanu va Isalele kesi valemese tumponya
15“Anukeni simbu ije omo Shukulu Kalunga wendekele neni oku ali mukati ka tuhya ku Munkinda wa Sinai, mwazivile lijwi lyendi, oloni kumwamwene cifwa cendi embwe. Ngecivene, linyungeni. 16#Kut 20:4; VaLe 26:1; Kwi 5:8; 27:15 Nyanyameni ngeci kesi muliviise yeni vavenya, nakulishongela kamponya ka cifwa ca munalume, nambe ca munakazi, 17nambe ca kasitu, nambe ca kazila, 18#Lom 1:23 nambe ca vyakulikoka asi, nambe ca isi. 19Linyungeni kutewa mukawila mu ceseko cakulemesa nakupangesa vije mumona mwilu, litangwa, na ngonde, na vingongonosi. Shukulu Kalunga Njambi yeni navyaana vanu voshe veka vali ano asi ngeci vavilemese. 20#Kut 19:5; Kwi 7:6; 14:2; 26:18; Tit 2:14; 1 Pet 2:9 Oloni yeni mwapwa mu vanu vaje vapatwile Shukulu Kalunga mu Ingito, muje mwakele mu tuyando ngwe tuhya twa lutengo twakushukuma. Ikeye wamitundisile muje nakumipwisa vanu vendi, ngwe mumunafu lelo. 21#Kul 20:12 Cooni Shukulu Kalunga Njambi yeni waluvalele nange, omwo yeni, co walisingile nakwendeka ngwendi kunjikajavuka Ndonga ya Yondau nakukovela mu lifuti lije lyalivwa lije lyakamyana kupwa vushwana vweni. 22Oloni yange njikatsila mu lifuti lino, kunjikajavukila musambwa ya Ndonga ya Yondau embwe, oloni yeni muli kuyehi nakujavukilamo, co mukakala mu lifuti lije lyalivwa. 23Nyanyameni ngeci kesi mwivale cikumiiyo cije Shukulu Kalunga Njambi yeni walikumiiye neni. Co kesi mulishongele cifwa ca kamponya. 24#VaHe 12:29 Omwo Shukulu Kalunga Njambi yeni wapwa ngwe tuhya twakunyongesa, ikeye Njambi wa lifuwa, katava kulipandakana na vinjambi veka.
25“Nameme omo mukakala simbu yakama mu lifuti lije nakukitilamo vana na vatekulu, kesi mukalinge vuvi vwakulishongela kamponya mu cifwa cimo embwe. Eci cinapu vuvi ku mesho a Shukulu Kalunga, co cikamuluvalesa. 26Nga mukalingamo, co mukanyongela mu lifuti lije limukashwana lili musambwa ya Yondau. Kumukatumisa matangwa eni mu lifuti lije oloni muvavoshe mukanyonga njwa, omwo lilu na asi vinapu vukaleo vwange ku litangwa lya lelo. 27Ngecivene, Shukulu Kalunga akamishandwela akati ka mafuti eka, co vavandondo lika va ali yeni vakasalao akati ka mafuti aje akamishandwela Shukulu Kalunga. 28#Kwi 28:36 Kuje mukapangela vinjambi vakushonga na mavoko a vanu, vinjambi va viti, na va mamanya, vinjambi vaje kuvesi kuziva nambe kumona, nambe kulya, nambe kuziva kunika. 29#Njele 29:13 Co kuje mukashakezeka Shukulu Kalunga Njambi yeni, co nga mukamushakezeka na vimbunge vyeni vyoshe, na mwonyo weni woshe, co mukamuwana. 30Omo mukamona tuyando na vyoshe vije vikasholoka kuli yeni, asinoni akukotoka mukatengulukila kuli Shukulu Kalunga Njambi yeni nakumwononoka. 31Omwo Shukulu Kalunga Njambi yeni ikeye Njambi wa mema ku mbunge. Co ikeye kakamiseze nambe kuminyongesa embwe, nambe kwivala cikumiiyo cije walikumiiye na vakukulwila veni.
32“Ihuleni vya kunima a simbu ije omo kanda musemuke, kutunda a litangwa lije Njambi watangele munu ano asi. Co ihuleni lalo ano asi oshe, nga kwalingiwile cuma cimo cakama cakufwa ngwe eci. 33Kuli vanu vamo vazivile lijwi lya njambi weka lyendeka kuli vakevo kutunda mukati ka tuhya ngwe mumwazivile yeni, co vayoye ndi? 34Kuma kwakele njambi weka watundisile muyati umo ku muyati ukwavo, ngeci akavapwise vanu vendi, ngwe mwalingile Shukulu Kalunga Njambi yeni ali yeni mu Ingito ndi? Ku mesho eni vene ikeye washolwele nzili yendi yakama na vukama, wanenele mishongo yakulitambwisa amo na nzita, co walingile vizivukiso na vikomokeso, co washolwele vyuma vyakujajesa mu Ingito mwoshe.
35 #
Mak 12:32
“Shukulu Kalunga washolwele evi kuli yeni ngeci muzivuke ngweni Shukulu Kalunga ikeye Njambi, kukwesi weka lalo wai. 36Ikeye watavele ngeci yeni muzive lijwi lyendi oku ali mwilu ngeci amilongese. Co ano asi wamitavesele ngeci mumone tuhya twendi twakama twakushukuma, co ikeye wendekele kuli yeni oku ali mukati ka tuhya. 37Shukulu Kalunga wamyangwile nakukala akati keni, ngeci wamitundisile mu lifuti lya Ingito na nzili yendi yakama omwo wazemene vakukulwila veni. 38Omo mwakele nakuya kulutwe, ikeye washekele miyati yakama ya nzili kutuvakana yeni, ngeci amikovelese mu lifuti lyavo nakumyanalyo kupwa vushwana vweni.
39“Ngecivene, anukeni litangwa lya lelo nakulinyunga mu vimbunge vyeni, ngweni Shukulu Kalunga ikeye wapwa Njambi wa mwilu na ano asi. Co kukwesi njambi weka lalo wai. 40Ngecivene, ononokeni mashiko endi oshe aje anjinamyana ku litangwa lya lelo, ngeci mukamone vyavivwa, yeni na vatekulwila veni. Co mukakala simbu yoshe mu lifuti lije lyakamyana Shukulu Kalunga Njambi yeni kupwa vushwana vweni ku myaka yoshe.”
Vinganda mwakutewela vya mu ngangela ku Ndonga ya Yondau
41Asinoni Mosesa waangunwine vinganda vitatu vya mu ngangela ku Ndonga ya Yondau, 42muje mwasa kutewela munu nakukakalamo nga natsii mukwavo munu na cintulu uje kapwile citozi cendi. Nga atewela ku nganda imo ya vinganda vije vitatu, co ovoka. 43#Yos 20:8-9 Nganda ya Mbezele ije yakele mu mambo yakushalama, yapwile yakutewela muyati wa Luvena. Nganda ya Lamote ije yakele mu Ngilyande, yapwile yakutewela muyati wa Ngande. Co nganda ya Ngolane ije yakele mu Mbashane, yapwile yakutewela muyati wa Manase.
Cizivukiso cakwana mashiko a Njambi
44Awa akewo mashiko a Njambi aje aanene Mosesa kuli vanu va Isalele nakuvalongesawo. 45Ovu vukevwo vukaleo, na mashiko, na vilongesa vije Mosesa waanene kuli vanu va Isalele omo vanatundu laja mu Ingito. 46Vakele mu cana ca mu ngangela ku Yondau, calishungama na nganda ya Mbetepeole, mu lifuti lya Sihone mwene wa vaAmoli, uje washwanene mu Heshevone. Vamufungulwile kuli Mosesa na vanu va Isalele omo vatundile ku Ingito. 47Co vafungulwile lifuti lya Sihone amo na lifuti lya Mwene Onge wa ku Mbashane, vimyene vaje vavali va vaAmoli vakele mu ngangela ya Yondau. 48Co lifuti eli lyaamene kutunda ku nganda ya Aloele ku ngenge ya Ndonga ya Alenone, kutwala na ku kunto ku Munkinda wa Silyone, ukewo vene Munkinda wa Helemone. 49Co lalo amo na mutambela woshe wa mu ngangela ku Ndonga ya Yondau na ku mutambela wa mu mbwela kweta na ku Lishali lya Mwongwa, na mu ngangela kweta kwisi ya Munkinda wa Pisenga.
Currently Selected:
Kwituluka mu Mashiko 4: MBB
Highlight
Copy
Compare
Share
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006
