Kwituluka mu Mashiko 13
13
1“Nga akati keni akasholoka muka-kwimanena, nambe muka-kunungulula vinjozi akamikulaesa vizivukiso nambe vikomokeso, 2ngeci amitwamenene kukulemesa nakupangela vinjambi vaje kumwalemesele laja. Nameme nga vije vyakendeka vikapwa vya vushunga, 3kesi mukatolilile ku majwi endi. Omwo Shukulu Kalunga Njambi yeni alinakumupangesa nakumyeseka, kumona nga muzema Shukulu Kalunga Njambi yeni na vimbunge vyeni vyoshe, na mwonyo weni woshe. 4Mukakavangeya Shukulu Kalunga Njambi yeni nakumukomoka, nakunyunga mashiko endi oshe, nakwononoka ku lijwi lyendi, co mukamupangela nakumukakateya. 5Oloni mukatsiye muka-kunungulula vinjozi nambe muka-kwimanena, uje akamileka kutengulukila Shukulu Kalunga Njambi yeni, uje wamitundisile mu lifuti lya Ingito nakumipatula ku vunzinda. Munu wa cifwa cangacije akamitangula ku ngila ije yamishikile Shukulu Kalunga Njambi yeni kwendamo. Munapande kumutsiya, ngeci mukatundise vuvi vuje vuli akati keni.
6“Nga ndolome yove, nambe munove wa munalume, nambe munove wa munakazi, nambe munakazi wove iwazema, nambe musamba wove wa a mbunge akushongangeya ngeci mulemese vinjambi veka, vaje yeni na vakukulwila veni kumwalemesele. 7Umo wavo asa kumikokweya ngeci mulemese vinjambi va vanu vaje vanamizengeleka vaje vali muyehi neni, nambe vinjambi va vanu vaje vali kulyala neni. 8Kesi mukamutave amisindiye nambe kumutolilila embwe. Kesi mukamutetele nambe kumuzivila mema ku mbunge embwe, co kesi mukamwamene embwe. 9Oloni mukamutsiye. Pweni vakulivanga kumwasha mamanya, asinoni munu na munu akamwashe mamanya. 10Mukamutsiye na mamanya omwo ikeye nesekele kumitundisa kuli Shukulu Kalunga Njambi yeni, uje wamitundisile ku Ingito, kuje mwakele mu vunzinda. 11Omo vanu va Isalele voshe vakaziva evi vinalingiwa, co vakakala na lyova, co naumo wai lalo akalinga vuvi vwa cifwa cangacije.
12“Omo mukakala mu membo eni aje akamyana Shukulu Kalunga Njambi yeni, co mukaziva lingwavo 13ngeci kuli vanalume vamo vitangwizi va ku muyati weni, vanatangula laja vanu va mu limbo lyavo kulemesa vinjambi vaje kumwalemesele laja. 14Co nga mukaziva lingwavo lyangacije, munapande kwilula nga ikeyo inapu n̄anda ya vushunga, cuma cangacije ca vunyengwe cinalingiwa akati keni, 15co tsiyeni vanu voshe vakala muje mu nganda na vingombe vavo voshe. 16Ngecivene, mukakungulwila vivala vyavo vyoshe mukati ka nganda, co mukenyeka ije nganda na vyoshe vilimo kupwa n̄ombelo kuli Shukulu Kalunga Njambi yeni. Co ije nganda ikapwe ngundu ku myaka yoshe. Naumo wai akaitungulula lalo. 17Kesi mukambateko cuma cimo ku vije vivasompelele kunyonga, asinoni Shukulu Kalunga akatenguluka ku vukalu vwendi nakumizivila mema ku mbunge, co akamitumisa ngwe mwalisingile na vakukulwila veni, 18nga mukononoka ku lijwi lya Shukulu Kalunga Njambi yeni nakunyunga mashiko endi oshe awa njinamishiki ku litangwa lya lelo, nakulinga vije vyashaka.
Currently Selected:
Kwituluka mu Mashiko 13: MBB
Highlight
Copy
Compare
Share
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006
