2 Samwele 6
6
Cikasa ca Cikumiiyo vacinena ku Yelusalema
(1 Miz 13:1-14, 15:25-16:6,43)
1Ndaviti wakungulwile lalo mashwalale 30,000 vavaangwile mu Isalele, 2#Kut 25:22 wavatwalele ku Mbala mu Yunda, vakashake Cikasa ca Cikumiiyo ca Njambi, cije vatumbwile mu lizina lya Shukulu Kalunga Muka-nzili yoshe, uje natumbama akamwa ya vakelumbi. 3#1 Sam 7:1-2 Vacitundisile ku njuvo ya Avinandave yakele a lilundu, vacakele a litemba lyaliha. Co Uza, na Ahiyo, vana va Avinandave vakele nakwendesa lije litemba, 4Ahiyo watwamene kulutwe lwa Cikasa. 5Ndaviti na vaIsalele voshe vakele nakukina nakwimba na nzili yavo yoshe nakusingimika Shukulu Kalunga. Vakele nakwimba tulyalya, na visanzi, na vingoma, na misambo, na vingenjo.
6Omo vetele ku lijungwilo lya Nakone, vingombe vatanukile, co Uza wolwele livoko lyendi wakwatele ku Cikasa ca Cikumiiyo. 7Aje vene Shukulu Kalunga Njambi waluvalele na Uza, co wamutsiile omwo wakwatele livoko lyendi ku Cikasa ca Cikumiiyo. Uza watsililile kuje ku Cikasa ca Cikumiiyo, 8Ndaviti waluvalele manene omwo Shukulu Kalunga wanyanyamesele Uza, co mutambela uje vautumbwile ngwavo Peleze Uza#6:8 PELEZE UZA: Eli lizina mu ciHevelu linanunguluka ngwalyo, cihiso ca Uza. na ku lelo lino.
9Ngecivene, Ndaviti wakele na lyova lya Shukulu Kalunga, co wendekele ngwendi, “Vati njambata Cikasa ca Cikumiiyo?” 10Ngecivene, Ndaviti wayongwele ngeci kesi aye naco ku Yelusalema, oloni, ikeye waangunukile mu ngila, co wacitwalele ku njuvo ya Ovende Endome, wa mu nganda ya Ngate. 11#1 Miz 26:4-5 Cakele kuje vingonde vitatu, co Shukulu Kalunga wavezikisile Ovende Endome na naanga yendi.
12Mwene Ndaviti wazivile ngwavo, “Shukulu Kalunga navezikisa Ovende Endome na naanga yendi na vyoshe vije vyali navyo omwo ya Cikasa ca Cikumiiyo.” Ngecivene, Ndaviti waile wakashakele Cikasa ca Cikumiiyo ku njuvo ya Ovende Endome wacitwalele ku Yelusalema nakuvwaelela manene. 13Omo vanu vaje vambatele Cikasa ca Cikumiiyo vendele manambo atanu na limo, Ndaviti wavalekele ngeci vemane akombelele kuli Shukulu Kalunga n̄ombelo ya ngombe na muna ngombe wakununa. 14Ndaviti wazalele nanga ya linyu mu mbunda yendi, co wakinine na nzili yendi yoshe nakusingimika Shukulu Kalunga. 15Ngecivene, Ndaviti na vaIsalele voshe vatwalele Cikasa ca Cikumiiyo ku Yelusalema, vatwile tuwelele twakuvwaelela nakwimba malupembo.
16Omo Cikasa cakovelele mu nganda, Mikale, muna Saulu, wemanene mu njanena, co wamwene Mwene Ndaviti alinakukina nakujombozoka na kusingimika Shukulu Kalunga mukukina cakujela, co wamushendumwine mu mbunge yendi. 17Asinoni vaakele Cikasa mu mwela waco mu Mbalaka ije yatungile Ndaviti. Ngecivene, Ndaviti wakombelelele vin̄ombelo vya kwenyeka, na milambu ya kulitombola kuli Shukulu Kalunga. 18Omo wamanesele kukombelela vin̄ombelo vya kwenyeka, na vin̄ombelo vya kulitombola, wavezikisile vanu mu lizina lya Shukulu Kalunga Muka-nzili yoshe, 19co waanene vanu voshe vyakulya. Waanene munu na munu, munalume na munakazi mu Isalele, mukasha wa likende, na cipuka ca situ yakwoca, na likasha-kasha lya vinyu vyakuma. Asinoni vanu voshe vaile ku membo avo.
20 #
1 Miz 16:43
Omo vanamanesa, Ndaviti waile kwimbo nakwindwisa naanga yendi, co Mikale watuukile nakuliwana nendi, wendekele kuli ikeye ngwendi, “Mwene wa vaIsalele naliwanena lizina lyakama ku litangwa lya lelo! Nalipwisa ngwe cilema ku mesho a vangamba va vambanda va vamyata vendi!”
21Co Ndaviti wamukumbulwile ngwendi, “Yange njakinine nakusingimika Shukulu Kalunga, uje wanjangwile kuhyana isho na naanga yendi nakunjipwisa ntwama ya vanu vendi va Isalele. Anga njicitwalao vene kumusingimika Shukulu Kalunga, 22co njicilishaula vene kutuvakana akulivanga. Yove amo unjiyongola ngwove kesi nji munu, oloni vaje vambanda vakevoco vakanjiyongola nakunjisingimika manene.” 23Mikale, muna Saulu, kakele na mwana noo kutsa kwendi.
The Bible in Mbunda ©The Bible Society of Zambia, 2006