2 Samwele 5
5
Ndaviti apwa mwene wa mu Isalele na mu Yunda
(1 Miz 11:1-9, 14:1-7)
1Asinoni miyati yoshe ya Isalele vaile kuli Ndaviti ku Hevelone nakwendeka kuli ikeye ngwavo, “Yetu tunapu tu vavushoko vwove na maninga ove. 2A simbu ya kunima, nameme omo Saulu wapwile mwene yetu, yove watwamenenene vanu va Isalele mu nzita, co Shukulu Kalunga wakukulaesele ngeci ukatwamenena vanu vendi nakupwa mwene yavo.” 3Ngecivene, vantwama voshe va Isalele vezile kuli Mwene Ndaviti ku Hevelone. Ngecivene, walikumiiye cikumiiyo cakujela navo, co vamuvwavesele, wapwile mwene wa mu Isalele. 4Ndaviti wakele na myaka makumi atatu omo wapwile mwene, washwanene myaka makumi awana. 5#1 Vim 2:11; 1 Miz 3:4; 29:27 Ndaviti wakele ku Hevelone omo washwanene mu Yunda myaka itanu na ivali na vingonde vitanu na imo, co waile ku Yelusalema kuje washwanene Isalele na Yunda myaka makumi atatu na myaka itatu.
6 #
Yos 15:63; Maa 1:21 Simbu yetele omo Mwene Ndaviti na vanu vendi vaile nakulwisa Yelusalema. Co vaNjevushi vaje vatungile muje, vayongwele ngwavo Ndaviti kasa kufungulula ije nganda, co vendekele kuli ikeye ngwavo, “Yove kuukasa kukovela muno, nameme vene tupuputwa na vilema vasa kukushekamo.” 7(Nameme ngoco Ndaviti wafungulwile cimpaka cavo cakukola ca Siyone, ivatumbwile ngwavo “Nganda ya Ndaviti.”)
8Co a litangwa lije Ndaviti wendekele kuli vanu vendi ngwendi, “Mukati keni mwali umo munu wazinda manene vaNjevushi ngwe yange ngeci avatsiye? Akandwise muna ndonga, akalwise tupuputwa na vilema.” (Omu mukemwo vendekele ngwavo, “Tupuputwa na vilema kuvakasa kukovela mu Njuvo ya Shukulu Kalunga.”)
9Omo nafungulula laja cije cimpaka cakukola, co Ndaviti wakelemo wacilukile ngwendi, “Nganda ya Ndaviti.” Watungilileko cimpaka, kushangumukila ku mutambela kuje kwakele livu ku mutambela wa mu ngangela ku lilundu. 10Co Ndaviti wakele na lutsimo simbu yoshe, omwo Shukulu Kalunga Njambi Muka-nzili yoshe wakele amo nendi.
11Mwene Hilame wa ku Tile watumine tunganda kuli Ndaviti, co wamukwasele viti vya kendale, na vaka-kushonga, na vaka-kupazula mamanya akutungisa lipela. 12Co Ndaviti wanangukile ngwendi Shukulu Kalunga ikeye namupwisa mwene wa mu Isalele, co nakolesa vumwene vwendi, omwo ya vanu vendi vaIsalele.
13Omo watundile ku Hevelone kuya ku Yelusalema, Ndaviti wambatele mashano va mbanja vavangi na mashano, co wakele na vana vavangi va vanalume na ava va vanakazi. 14Vana vendi vasemukilile mu Yelusalema vapwile, Shamwa, Shombambe, Natane, Solomoni, 15Imbehale, Elishwa, Nefenge, Njafiya, 16Elishama, Elyanda, na Elifelete.
Ndaviti afungulula vaFilisitiya
(1 Miz 14:8-17)
17Omo vaFilisitiya vazivile ngeci Ndaviti vanamwangula kupwa mwene wa mu Isalele, ngeci mbunga ya mashwalale vavo valivwaesele kukafungulula Ndaviti. Omo Ndaviti wavizivile, co waile ku cimpaka. 18Co vaFilisitiya vezile nakulikwalaleka ku Cana ca Lefaime nakukalamo. 19Co Ndaviti wehwile kuli Shukulu Kalunga ngwendi, “Njikalwise vaFilisitiya ndi? Ukanjihyanesa ndi?”
Shukulu Kalunga wamukumbulwile ngwendi, “Eyo, ya ukalwe navo! Njikakuhyanesa!”
20Ngecivene, Ndaviti waile ku Mbale Pelazime,#5:20 MBALE PELAZIME: Eli lizina mu ciHevelu lyanunguluka ngwalyo, Shukulu Kalunga Muka-kukupula. co wakafungulwile vaFilisitiya kuje. Asinoni wendekele ngwendi, “Shukulu Kalunga nakupula vitozi vange ngwe mema a livazi.” Ngeci mutambela uje vautumbwile ngwavo Mbale Pelazime. 21Omo vaFilisitiya vatewele, vasezele tumponya twavo kunima, co Ndaviti na vanu vendi vatwambatele. 22VaFilisitiya velukile lalo nakulikwalaleka ku Cana ca Lefaime. 23Co Ndaviti wehwile lalo Shukulu Kalunga, co wamukumbulwile ngwendi, “Kesi uvalwisile kuno embwe, oloni zenguluka kunima ngeci ukavalwisile ku mutambela ukwavo lalo, kuyehi na miti ya vushuka vwa fuluta.
24“Omo ukaziva cililimo akamwa ya miti, co valwise, omwo yange njikatwama kulutwe lwove nakufungulula mbunga ya mashwalale va vaFilisitiya.” 25Ndaviti walingile ngwe muje mwamushikile Shukulu Kalunga, co wafungulwile vaFilisitiya kutunda ku Ngeva kweta na ku Ngezele.
The Bible in Mbunda ©The Bible Society of Zambia, 2006