2 Samwele 3
3
1Nzita ya akati ka mashwalale vemanenene naanga ya Saulu na mashwalale vaje vemanenene naanga ya Ndaviti yakele simbu yakama. Co nzili ya mashwalale va naanga ya Ndaviti yapwile yakama manene, oloni nzili ya mashwalale va naanga ya Saulu yakele nakuzeya.
Vana va Ndaviti
2Ava vakevo vana va Ndaviti va vanalume vaje vasemukilile ku Hevelone, munendi wa ntwatwa wapwile Aminone, vaina Ahinowame, wa ku Njezelele, 3wamucivali Kilyave, vaina Avingaile, fwile ya Navale, wa ku Kalemele, wamucitatu Avisalome, vaina Maka, muna Talemai mwene wa ku Ngeshule, 4wamuciwana Andoniya, vaina Hangite, wamucitanu Shefatiya, vaina Avitale, 5wamucitanu na umo Iteleame, vaina Engela. Vana voshe ava vasemukilile mu Hevelone.
Avinele alipandakana na Ndaviti
6Nzita anga yakele akati ka mashwalale va Ndaviti na mashwalale vaje vapwile va kulongwa ku naanga ya Saulu, co Avinele wakele nakulwa na nzili manene akati ka mashwalale va Saulu.
7Saulu wakele na lishano lya mbanja, lizina lyendi Lizepa, muna Aiya, co Ishemboshete wendekele kuli Avinele ngwendi, “Omwo vikajo unalalela na lishano lya tate lya mbanja?” 8Co Avinele waluvalele manene a majwi a Ishemboshete, wendekele ngwendi, “Kuma yove wayongola ngwove yange njenda Saulu vungungu ndi? Kutunda a litangwa lyakulivanga njapwile wa kulongwa kuli isho Saulu, na kuli vishongo vendi, na kuli vasamba vendi, oloni njamikwasele ngeci Ndaviti kesi amifungulule, co ku litangwa lya lelo unjiwanene mulonga wa munakazi! 9Njambi alinge eci kuli Avinele, nambe kutuvakana eci lalo, nga kunjilingilako Ndaviti vije vyalisingile Shukulu Kalunga kuli ikeye, 10#1 Sam 15:28 Shukulu Kalunga wakulaesele Ndaviti ngeci akatundisa vumwene ku njuvo ya Saulu na vatekulwila vendi, co akapwisa Ndaviti mwene wa Isalele na Yunda, kutunda ku Ndani kweta na ku Mbeleshemba.” 11Co Ishemboshete wazivile lyova ali Avinele, ngeci kasele lalo kumukumbulula lijwi limo.
12Avinele watumine miluwa kuli Ndaviti, a simbu ije Ndaviti wakele ku Hevelone, vendekele ngwavo, “Iyajo akashwana eli lifuti? Linga cikumiiyo nange, co njikakukwasa ngeci ufungulule Isalele yoshe ikale ku mutambela wove.” 13Co Ndaviti wamukumbulwile ngwendi, “Mwamuvwa! Njikalinga cikumiiyo nove, oloni cuma cimo cinjishaka kuli yove eci, kuukamono cihanga cange kuvanga unaija na Mikale muna Saulu omo wija nakunjimona.” 14#1 Sam 18:27 Co lalo Ndaviti watumine vanu kuli Ishemboshete wendekele ngwendi, “Njiilwisile munakazi wange Mikale. Njondele vikonde 100 vya vaFilisitiya ngeci njamwambatele.” 15Ngecivene, Ishemboshete wamutundisile kuli munalume wendi Palatiyele muna Laishe. 16Co Palatiyele wamukavele nakulila ngila yoshe noo wetele ku nganda ya Mbahulime. Oloni omo Avinele wendekele ngwendi, “Iluka kwimbo,” co welukile.
17Avinele waile kuli vantwama va Isalele wendekele navo ngwendi, “Simbu yakama manene mwashakele Ndaviti ngeci apwe mwene yeni. 18Co eyi ikeyo simbu yeni. Anukeni ngeci Shukulu Kalunga wendekele ngwendi, ‘Njikapangesa ngamba yange Ndaviti akapatule vanu vange vaIsalele kuli vaFilisitiya na kuli vitozi vavo voshe.’ ” 19Co Avinele wendekele lalo kuli vanu va muyati wa Mbenjemani, asinoni waile kuli Ndaviti ku Hevelone nakumuleka vije vivalitavelele kulinga vanu va muyati wa Mbenjemani na Isalele.
20Omo Avinele waile kuli Ndaviti ku Hevelone na vanalume makumi avali, co Ndaviti wavalingilile ciwano. 21Co Avinele wendekele kuli Ndaviti ngwendi, “Ololo oni njikafungulula Isalele yoshe ngeci ikale ku mutambela wove shukulu yange. Vakakutambula kupwa mwene, co ukambata vyoshe viwushaka, co ukashwana lifuti lyoshe.” Ngecivene, Ndaviti washuwile Avinele, co waile mwamuvwa.
Avinele vamutsiya
22Munima yevi, Yowave na vamyata vakwavo va Ndaviti vatundile ku nzita, vezile na vyuma vyavingi vivakapukwile. Oloni Avinele kakele amo na Ndaviti ku Hevelone, omwo Ndaviti wamushuwile ngeci aye mwamuvwa. 23Omo Yowave na vanu vendi vetele, vamulekele ngwavo, “Avinele na vanu vendi vanezile kuli Mwene Ndaviti, co namushuula nai mwamuvwa.” 24Ngecivene, Yowave waile kuli mwene wendekele ngwendi, “Vika unalingi? Kenga, Avinele nezile kuli yove, omwo vikajo unamwecelela aye ngacije? 25Wazivuka ngeci ikeye nezile kuno nakukukwisa, ngeci azivuke vyuma vije viwulinakulinga kwoshe kuje kuuli nakuya. Mwa vushunga vene unazivuka ngacije!”
26Omo Yowave watundile kuli Ndaviti, watumine miluwa vakashake Avinele, co vakamuwanene ku lisima lya Sila, oloni Ndaviti kazivukile. 27Omo Avinele wetele ku Hevelone, co Yowave wamutwalele kwavo lika ku cikolo, ngwe ashaka kumuleka vyakushweka, kuje vene wamutivile mu lifu. Co watsile omwo ikeye watsiile Ashahele ndolome ya Yowave. 28Omo Ndaviti wazivile muzimbu ou, co wendekele ngwendi, “Yange na vumwene vwange kutwesi na mulonga ku mesho a Shukulu Kalunga ku myaka yoshe a kutsa kwa Avinele. 29Mulonga wa kutsa kwa Avinele ukale ali Yowave na naanga yendi yoshe! Co mu cisemwa cendi coshe mukakale munalume umo mu naanga yendi muka-kususula, na muka-mbumba, na cilema, na muka-kutsila mu nzita, na muka-kujeneka vyakulya!” 30Ngecivene, Yowave na ndolome yendi Avishai valingile shambandinga ali Avinele omwo watsiile ndolome yavo Ashahele mu nzita ku Ngimbiyone.
Avinele vamutsinda
31Asinoni Ndaviti washikile Yowave na vanu vendi kutavula vuzalo vwavo, vazale vikeleya, ngeci valile Avinele. Co akuya ku vimbumbo Mwene Ndaviti wakavele vwango vwa mutsi, 32co vatsindile Avinele mu Hevelone, mwene walilile nakukangoka ku mbumbo ya Avinele, co na vanu voshe valilile. 33Asinoni Ndaviti wembile mwaso wakulila Avinele ngwendi,
“Omwo vikajo Avinele natsi ngwe cilema?
34Mavoko endi kuvaakutile,
nambe mendi endi kuvaakele mu tukunju,
watsile ngwe munu wakutsiya ku mapwepwe!”
Co vanu vamulilile lalo.
35Litangwa lije lyoshe vanu vesekele kusindiya Ndaviti ngeci alyeko cuma cimo, oloni walisingile ngwendi, “Njambi anjitsiye nga njilya cuma cimo omo litangwa kanda litoke!” 36Co vanu voshe vanangukile a vije, co vavwaelelele. Mwa vushunga vene, vyuma vyoshe vyalingile mwene vyavwaelelesele vanu. 37Ngecivene, vanu voshe va Ndaviti, na vanu voshe va mu Isalele vazivukile a litangwa lije ngwavo mwene kakele na cizango cakutsiya Avinele. 38Ngecivene, mwene wendekele kuli vamyata vendi ngwendi, “Kuma yeni kumwazivukile ngweni ku litangwa lya lelo ntwama wakama wa mu Isalele natsi ndi? 39Nameme njapwa nji mwene yanaangula Njambi, oloni litangwa lya lelo njazeye. Vana va Zeluya ava vanapu vaka-kunjilwisa. Shukulu Kalunga ahise mapwepwe ava ngwe muvanalingi vakevo.”
Currently Selected:
2 Samwele 3: MBB
Highlight
Share
Copy
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006